ប្រមុខរាជរដ្ឋាភិបាល បង្ហើបពីការគិតគូរឲ្យបង្កើតបណ្ណបេឡាជាតិរបបសន្ដិសុខសង្គម ជាកញ្ចប់គ្រួសារ
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានបង្ហើបអំពីផែនការគិតគូរឲ្យបង្កើតបណ្ណបេឡាជាតិរបបសន្ដិសុខសង្គម ជាកញ្ចប់គ្រួសារតែម្ដង បន្ថែមលើអ្វីដែលមាននៅពេលបច្ចុប្បន្នសម្រាប់បុគ្គលម្នាក់ៗប៉ុណ្ណោះ។
ក្នុងឱកាសអញ្ជើញបើកការដ្ឋានសាងសង់មន្ទីរពេទ្យសាកលវិទ្យាល័យ វិទ្យាសាស្ត្រសុខាភិបាល ដែលមានទីតាំងស្ថិតនៅសង្កាត់ឃ្នួញ ខណ្ឌសែនសុខ រាជធានីភ្នំពេញ នៅថ្ងៃទី១០ ខែធ្នូ ឆ្នាំ២០២៤ សម្ដេចធិបតី ហ៊ុន ម៉ាណែត បញ្ជាក់ថា «សមាជិក ប.ស.ស ឥលូវមានផ្ទាល់ខ្លួន ប៉ុន្ដែអ្នកនៅក្នុងបន្ទុកអត់មានទេ យើងបង្កើតក្នុងរូបភាពមួយ របបសន្ដិសុខសង្គមដោយស្ម័គ្រចិត្ត ដោយបង់សេវា១៥៦០០រៀលក្នុងមួយខែ គាត់អាចទទួលបាននូវរបបសន្ដិសុខដូចគ្នា។ ថ្ងៃមុនខ្ញុំប្រជុំជាមួយឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន, ឯកឧត្តម ហេង សួរ ឲ្យគិតមើលកញ្ចប់បន្ថែមទៀតលក្ខណៈគ្រួសារ»។
សម្ដេចធិបតី បានថ្លែងថា សម្រាប់អ្នកដែលស្ម័គ្រចិត្តប្រើប្រាស់សេវាបេឡាជាតិរបបសន្ដិសុខសង្គម ដោយបង់សេវាប្រចាំការ គួរតែផ្ដល់នូវការលើកទឹកចិត្តក្នុងតម្លៃសមរម្យណាមួយ ដើម្បីឲ្យគាត់អាចប្រើប្រាស់ជាកញ្ចប់គ្រួសារតែម្ដង ក្នុងមានទាំងប្ដី ប្រពន្ធ និងកូនៗនៅក្នុងបន្ទុក។ ការណ៍នេះនឹងសម្រួលដល់ការកាត់បន្ថយនូវការចំណាយរបស់ប្រជាពលរដ្ឋ ក្នុងការទៅទទួលសេវាសុខាភិបាល។
សម្ដេច បានបន្ថែមថា គិតមកទល់ពេលនេះ ក្នុងគោលនយោបាយដែលរាជរដ្ឋាភិបាលកម្ពុជា បានគិតគូររៀបចំទាំងកញ្ចប់មូលនិធិសមធម៌សុខាភិបាល ទាំងប.ស.ស កាតព្វកិច្ច និងស្ម័គ្រចិត្ត គ្របដណ្ដប់លើប្រជាពលរដ្ឋចំនួន៧,៣០០,០០០នាក់ ដែលជាចំនួនមួយកើនឡើងគួរឲ្យកត់សម្គាល់៕
