ម៉ិកស៊ិកកំពុងដុតដៃដុតជើង ដើម្បីការពារកិច្ចព្រមព្រៀងពាណិជ្ជកម្មជាមួយអាមេរិក-កាណាដា

ម៉ិកស៊ិក៖ ម៉ិកស៊ិកកំពុងធ្វើអ្វីគ្រប់យ៉ាងដែលអាចធ្វើទៅបានដើម្បីការពារកិច្ចព្រមព្រៀងពាណិជ្ជកម្មក្នុងតំបន់ជាមួយសហរដ្ឋអាមេរិក និងកាណាដា។

ដៃគូពាណិជ្ជកម្មធំៗរបស់អាម៉េរិកដូចជាម៉ិកស៊ិក ចិន និងកាណាដាអាចឈានចូលជម្លោះពាណិជ្ជកម្ម បន្ទាប់ពីប្រធានាធិបតីជាប់ឆ្នោតរបស់សហរដ្ឋអាមេរិក លោក ដូណាល់ ត្រាំ បានគំរាមយកពន្ធលើប្រទេសនៅភាគខាងជើង និងភាគខាងត្បូង ប្រសិនបើពួកគេមិនទប់ស្កាត់គ្រឿងញៀន និងជនចំណាកស្រុកដែលចូលទៅក្នុងសហរដ្ឋអាម៉េរិក។

ចាប់តាំងពីការគម្រាមកំហែងពន្ធរបស់លោក ត្រាំ ម៉ិកស៊ិកបានចាប់ផ្តើមបង្ក្រាបបទល្មើសលើទំនិញខុសច្បាប់ពីអាស៊ីចូលទៅក្នុងប្រទេសអាម៉េរិក ខណៈក្រុមមន្ត្រីបានរឹបអូសបានចំនួនដ៏ច្រើននៃសារធាតុហ្វេតានីល។

លោក ត្រាំ ក៏ដូចជាមេដឹកនាំឧស្សាហកម្មមួយចំនួនរបស់សហរដ្ឋអាម៉េរិកបានចោទប្រកាន់ម៉ិកស៊ិកថាជាអ្នកនៅពីក្រោយខ្នងចំពោះទំនិញ និងការវិនិយោគរបស់ចិន យ៉ាងណាម៉ិកស៊ិកបានបដិសេធយ៉ាងដាច់អហង្កា។

សូមបញ្ជាក់ថា លោក ត្រាំ បានគម្រាមដាក់ពន្ធ ១០០ភាគរយលើគ្រប់រថយន្តដែលឆ្លងកាត់ព្រំដែនម៉ិកស៊ិកដើម្បីឆ្លើយតបទៅនឹងផែនការរបស់ក្រុមហ៊ុនចិន BYD។