ឯកឧត្ដមឧបនាយករដ្ឋមន្ត្រី សុខ ចិន្តាសោភា មានភារកិច្ចថ្មីគឺជួយនាយករដ្ឋមន្រ្តីពង្រីកវិសាលភាពសេដ្ឋកិច្ច និងពាណិជ្ជកម្ម

ភ្នំពេញ៖ ក្រោយត្រូវផ្ទេរចេញពីតំណែងរដ្ឋមន្ត្រីក្រសួងការបរទេស ឯកឧត្ដមឧបនាយករដ្ឋមន្ត្រី សុខ ចិន្តាសោភា ក៏ត្រូវប្រមុខរាជរដ្ឋាភិបាលកម្ពុជាប្រគល់ភារកិច្ចថ្មីដោយទទួលបន្ទុកលើកិច្ចការងារពាក់ព័ន្ធផ្នែកសេដ្ឋកិច្ច និងពាណិជ្ជកម្ម។

ផ្អែកតាមសេចក្ដីសម្រេចកែសម្រួលរបៀបរបបការងារ និងការបែងចែកភារកិច្ចរបស់ថ្នាក់ដឹកនាំរាជរដ្ឋាភិបាល ចុះថ្ងៃទី២៧ ខែវិច្ឆិកា ឆ្នាំ២០២៤ សម្តេចនាយករដ្ឋមន្រ្តី ហ៊ុន ម៉ាណែត កំណត់យ៉ាងដូច្នេះថា៖«ឯកឧត្តម សុខ ចិន្តាសោភា ឧបនាយករដ្ឋមន្ត្រី ទទួលបន្ទុកជួយនាយករដ្ឋមន្ត្រីលើការងារពិពិធកម្មសេដ្ឋកិច្ច និងពាណិជ្ជកម្ម ព្រមទាំងទទួលបន្ទុកអនុវត្តការងារពិសេស ឬបេសកកម្មពិសេសផ្សេងទៀតដែលនាយករដ្ឋមន្ត្រីប្រគល់ជូន»។

ឯកឧត្ដម សុខ ចិន្តាសោភា ត្រូវប្រមុខរាជរដ្ឋាភិបាលចាត់ទុកថា ជាអ្នកមានបទពិសោធផ្នែកវិនិយោគ និងពាណិជ្ជកម្ម។ នៅឆ្នាំ១៩៩៧ ឯកឧត្ដមត្រូវបានតែងតាំងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា ហើយនៅឆ្នាំ២០០៨ លោក ក៏ទទួលបានតំណែង១ថែមទៀត គឺតំណែងជារដ្ឋមន្ត្រីប្រតិភូអមនាយករដ្ឋមន្ត្រី។ គេកត់សម្គាល់ឃើញថា ឯកឧត្ដម ជាមន្រ្តីជាន់ខ្ពស់ម្នាក់ក្នុងចំណោមមន្រ្តីជាន់ខ្ពស់ដទៃទៀត ដែលតែងតែអមដំណើរ សម្ដេចតេជោ ហ៊ុន សែន អតីតប្រមុខរាជរដ្ឋាភិបាល ទៅបំពេញទស្សនកិច្ចនៅក្រៅប្រទេស ហើយជារឿយៗក្នុងអំឡុងពេលអមដំណើរនោះ ឯកឧត្ដម តែងតែឆ្លៀតពេលជួបប្រាស្រ័យទាក់ទងជាមួយវិនិយោគិនបរទេស ដើម្បីធ្វើបទបង្ហាញអំពីបរិយាកាសវិនិយោគនៅកម្ពុជា។

ឯកឧត្ដមឧបនាយករដ្ឋមន្រ្តី សុខ ចិន្តាសោភា បានឡើងកាន់តំណែងរដ្ឋមន្ត្រីក្រសួងការបរទេស នៅខែសីហា ឆ្នាំ២០២៣ ក្នុងរាជរដ្ឋាភិបាលជំនាន់ថ្មីដែលដឹកនាំដោយសម្តេចធិបតី ហ៊ុន ម៉ាណែត។ ទោះយ៉ាងណា ប្រមាណ១៥ខែក្រោយមក រាជរដ្ឋាភិបាល ក៏យកឯកឧត្ដមឧបនាយករដ្ឋមន្រ្តី ប្រាក់ សុខុន ដែលធ្លាប់ធ្វើជារដ្ឋមន្រ្តីការបរទេសក្នុងជំនាន់សម្តេចតេជោ មកកាន់តំណែងនេះសាជាថ្មី ជំនួសលោកឧបនាយករដ្ឋមន្រ្តី សុខ ចិន្តាសោភា។

រាជរដ្ឋាភិបាលអះអាងថា ការដោះដូររដ្ឋមន្រ្តីការបរទេសនេះ ដើម្បីបង្កើនប្រសិទ្ធភាពការងារផ្នែក«កិច្ចការបរទេស» សំដៅ ឆ្លើយ តប នឹង ការ វិវត្ត កាន់ តែ ស្មុគ ស្មាញ នៃភូមិសាស្ត្រនយោបាយ និងសេដ្ឋកិច្ចនៅលើពិភពលោក៕