ភ្នំពេញ៖ កាលពីរសៀលថ្ងៃទី ៣០ ខែវិច្ឆិកា ឆ្នាំ២០២៤ ឯកឧត្តម ហ៊ុន ម៉ានី សមាជិកគណៈអចិន្រ្តៃយ៍គណៈកម្មាធិការកណ្តាល និងជាអគ្គលេខាធិការគណៈចលនាមហាជន នៃគណៈកម្មាធិការកណ្តាលគណបក្សប្រជាជនកម្ពុជា បានអញ្ជើញជាអធិបតីក្នុងពិធីសំណេះសំណាលជាមួយរចនាសម្ព័ន្ធគណៈចលនាមហាជនខេត្តព្រះវិហារ នៅសាលប្រជុំគណបក្សខេត្តព្រះវិហារ។
ពិធីសំណេះសំណាលនេះ ក៏មានអញ្ជើញចូលរួមអមគណៈអធិបតីរួមមាន ឯកឧត្តមគណៈប្រតិភូអគ្គលេខាធិការដ្ឋានគណៈចលនាមហាជន ថ្នាក់ដឹកនាំគណៈកម្មាធិការបក្ស គណៈចលនាមហាជនខេត្ត និងសមាជិក សមាជិកា សរុបប្រមាណ ២៧៨នាក់។
បន្ទាប់ពីបានស្ដាប់នូវរបាយការណ៍របស់ប្រធានគណៈកម្មាធិការគណបក្សខេត្ត ក៏ដូចជាមតិស្វាគមន៍របស់ឯកឧត្តម គីម រិទ្ធី ប្រធានគណៈចលនាមហាជនខេត្ត ឯកឧត្តម ហ៊ុន ម៉ានី បានវាយតម្លៃខ្ពស់ ចំពោះលទ្ធផលការងារដែលសម្រេចបានរបស់គណបក្សខេត្ត និងគណៈចលនាមហាជនខេត្តព្រះវិហារ។
ឯកឧត្តមបានថ្លែងអំណរគុណដល់មន្រ្តីគណបក្សគ្រប់រចនាសម្ព័ន្ធទាំងអស់របស់ខេត្តដែលបានខិតខំប្រឹងប្រែងអនុវត្តនូវរាល់ការចង្អុលបង្ហាញ និងទិសដៅការងាររបស់គណៈអចិន្រ្តៃយ៍ គណៈកម្មាធិការកណ្តាល ដោយសម្រេចបាននូវសមិទ្ធភាពនានា ជាពិសេសនោះគឺការនាំមកនូវជ័យជំនះលើការបោះឆ្នោតជាបន្តបន្ទាប់ជូនគណបក្ស។
ឯកឧត្តមបានគូសបញ្ជាក់ថា តាមរយៈលទ្ធផលនៃការបោះឆ្នោតជ្រើសតាំងតំណាងរាស្រ្ត នីតិកាលទី៧ ដែលសំទុះគាំទ្រគណបក្សប្រជាជនកម្ពុជាមានកម្រិតខ្ពស់ ទើបបានធ្វើឱ្យថ្នាក់ដឹកនាំគណបក្សធ្វើការសម្រេចចិត្តផ្ទេរអំណាចទៅអ្នកបន្តវេន ដែលនេះអាចកើតឡើងបានដោយសារកិច្ចខិតខំប្រឹងប្រែងរបស់សមាជិក សាមជិកាទាំងអស់របស់គណបក្ស។
នៅចុងបញ្ចប់ ឯកឧត្តមបានលើកទឹកចិត្តឱ្យសមាជិក សមាជិកា ឱ្យបន្តគ្រប់គ្រងបរិយាកាស និងស្វែងយល់ពីសតិអារម្មណ៍មហាជន និងសូមសមាជិកគណបក្សទាំងអស់ត្រូវនៅជិតជាមួយប្រជាជនជានិច្ច ព្រមទាំងថែរក្សានូវសាមគ្គីឯកភាពផ្ទៃក្នុងរបស់គណបក្ស ៕
