តុលាការរដ្ឋធានីប៉េកាំង កាត់ទោសអ្នកកាសែតជើងចាស់ម្នាក់ឱ្យជាប់ពន្ធនាគារ ៧ឆ្នាំពី «បទចារកម្ម»
ប៉េកាំង៖ តុលាការរដ្ឋធានីប៉េកាំង បានកាត់ទោសអ្នកសារព័ត៌មានរដ្ឋចិនជើងចាស់ម្នាក់ឈ្មោះ ដុង យូយូ (Dong Yuyu) នៅថ្ងៃសុក្រទី២៩ ខែវិច្ឆិកា ឱ្យជាប់ពន្ធនាគាររយៈពេលប្រាំពីរឆ្នាំពី«បទចារកម្ម» ខណៈក្រុមគ្រួសាររបស់លោក ចាត់សាលក្រមនេះថាជា«រឿងក្ដីអយុត្តិធម៌ធ្ងន់ធ្ងរ»។
ក្លឹបសារព័ត៌មានជាតិអាម៉េរិក បានអះអាងនៅក្នុងសេចក្ដីថ្លែងការណ៍មួយថា ប៉ូលិសនៅក្នុងរដ្ឋធានីប៉េកាំង បានសម្រេចឃុំខ្លួនអតីតនិពន្ធនាយក និងអ្នកកាសែតស្ថាប័នសារព័ត៌មាន Guangming Daily កាលពីខែកុម្ភៈ ឆ្នាំ២០២២។ នៅពេលដែលលោកកំពុងទទួលទានអាហារថ្ងៃត្រង់ជាមួយអ្នកការទូតជប៉ុន ក្រោយមកលោកក៏ត្រូវបានចោទប្រកាន់ពីបទចារកម្ម។
ជុំវិញរឿងរ៉ាវនេះ គ្រួសាររបស់អ្នកការសែតជើងចាស់រូបនេះ បានអះអាងនៅក្នុងសេចក្ដីថ្លែងការណ៍មួយថា៖«ការកាត់ទោសលោក យូយូ ឱ្យជាប់ពន្ធនាគាររយៈពេល៧ឆ្នាំដោយគ្មានភស្តុតាង គឺជាសារប្រកាសប្រាប់ពិភពលោកអំពីភាពអយុត្តិធម៌នៅក្នុងប្រទេសចិន»។
ក្រុមគ្រួសាររបស់លោកបានបន្ថែមថា៖«សាលក្រមថ្ងៃនេះ គឺជាភាពអយុត្តិធម៌យ៉ាងធ្ងន់ធ្ងរ មិនត្រឹមតែចំពោះលោក យូយូ និងក្រុមគ្រួសារប៉ុណ្ណោះទេ ថែមទាំងចំពោះអ្នកសារព័ត៌មានចិនទាំងអស់»។
លោក បេ លីយី (Beh Lih Yi) អ្នកគ្រប់គ្រងកម្មវិធីអាស៊ីនៅគណៈកម្មាធិការការពារអ្នកសារព័ត៌មានបានអះអាងថា៖«អាជ្ញាធរចិន ត្រូវតែលុបចោលសាលក្រមដ៏អយុត្តិធម៌នេះ ហើយការពារសិទ្ធិរបស់អ្នកសារព័ត៌មានក្នុងការធ្វើការដោយសេរី និងសុវត្ថិភាពនៅក្នុងប្រទេសចិន។
លោក ដុង យូយូ គួរតែជួបជុំគ្រួសារលោកវិញជាបន្ទាន់»។ មែនទែនទៅ លោក ដុង តែងផ្លាស់ប្ដូរយោបល់ និងគំនិតផ្ទាល់ជាមួយអ្នកការទូតមកពីស្ថានទូត និងអ្នកសារព័ត៌មានផ្សេងៗ។
ទន្ទឹមគ្នានេះ អង្គការមិនមែនរដ្ឋាភិបាល(NGOs) តស៊ូមតិសេរីភាពសារព័ត៌មាន បានអំពាវនាវឱ្យមានការដោះលែង ដោយមានអ្នកសារព័ត៌មាន អ្នកសិក្សា និងបុគ្គលិកអង្គការក្រៅរដ្ឋាភិបាលជាង៧០០នាក់ បានចុះហត្ថលេខាលើញត្តិតាមប្រព័ន្ធអ៊ីនធឺណែត ដើម្បីឱ្យលោក ដុង យូយូ មានសេរីភាព។ គួររំឭកថា កាល ពី ខែ កុម្ភៈ តុលាការរដ្ឋធានី ប៉េកាំង បាន កាត់ ទោស ប្រហារ ជីវិត អ្នក និពន្ធ ជនជាតិ អូស្ត្រាលី និង ជា អ្នក សរសេរ ប្លុក គាំទ្រលទ្ធិប្រជាធិបតេយ្យ លោក យ៉ាង ហេងជុន (Yang Hengjun) ពីបទចោទ ប្រកាន់ ចារកម្ម៕
