ទេសរដ្ឋមន្ត្រី លី ធុជ អនុញ្ញាតឱ្យអនុរដ្ឋមន្រ្តីការបរទេស ប៊ួគីណាហ្វាសូ ជួបសម្តែងការគួរសម និងឈ្វេងយល់ពីសកម្មភាពមីនកម្ពុជា

ភ្នំពេញ៖ ឯកឧត្តមបណ្ឌិត លី ធុជ ទេសរដ្ឋមន្រ្តី អនុប្រធានទី១ អាជ្ញាធរមីន និងជាប្រធានអនុសញ្ញាអូតាវ៉ាឆ្នាំ២០២៤ នាថ្ងៃទី២៧ ខែវិច្ឆិកា ឆ្នាំ២០២៤ បានអនុញ្ញាតឱ្យលោកជំទាវ Kabre Stella Eldine អនុរដ្ឋមន្រ្តីការបរទេសនៃប្រទេសប៊ួគីណាហ្វាសូ (Burkina Faso) ចូលជួបសម្តែងការគួរសម និងឈ្វេងយល់ពីវិស័យសកម្មភាពមីននៅកម្ពុជា។

ក្នុងជំនួបនោះ លោកជំទាវ Kabre Stella Eldine បានថ្លែងការគាំទ្រភាពជាប្រធាន និងម្ចាស់ផ្ទះរៀបចំកិច្ចប្រជុំកំពូលសៀមរាប-អង្គររបស់កម្ពុជា ហើយលោកជំទាវ បានលើកឡើងអំពីអស្ថិរភាពនយោបាយ និងបញ្ហាផលប៉ះពាល់អវិជ្ជមានរបស់ប្រទេសប៊ួគីណាហ្វាសូ ដោយសារគ្រាប់មីនដែលតម្រូវឱ្យមានការដោះស្រាយ ផងដែរ។

ឯកឧត្តមបណ្ឌិត លី ធុជ បានថ្លែងអំណរគុណប្រទេសប៊ួគីណាហ្វាសូ ដែលចូលរួមថ្លែងនូវសេចក្តីថ្លែងការណ៍ក្នុងកិច្ចប្រជុំកំពូលសៀមរាប-អង្គរ និងបានលើកឡើងតម្រូវការក្នុងការដោះស្រាយបញ្ហាមីននៅក្នុងប្រទេសប៊ួគីណាហ្វាសូ។

ជាមួយគ្នានោះ ឯកឧត្តមទេសរដ្ឋមន្រ្តី បានលើកឡើងអំពីបទពិសោធន៍របស់កម្ពុជា និងវឌ្ឍនភាពក្នុងការដោះស្រាយបញ្ហាមីន ដែលការងារបោសសម្អាតមីនអាចប្រព្រឹត្តិទៅបានលុះត្រាតែប្រទេសនោះទទួលបានសុខសុវត្ថិភាព និងស្ថិរភាពនយោបាយ។ ដូចករណីប្រទេសកម្ពុជា ប្រតិបត្តិករដោះមីនអាចចូលទៅដោះមីនបាននៅគ្រប់ទីកន្លែង ក្រោយទទួលបានសុខសន្តិភាពពេញលេញតាមរយៈនយោបាយឈ្នះឈ្នះរបស់សម្តេចតេជោ ហ៊ុន សែន ៕