នាយករដ្ឋមន្រ្តីថៃ ផែថងថាន សុីណាវ៉ាត់ និយាយទូរស័ព្ទ ជាមួយប្រធានាធិបតីជាប់ឆ្នោតសហរដ្ឋអាមេរិក ដូណាល់ ត្រាំ

បាងកក៖ ការិយាល័យនាយករដ្ឋមន្រ្តីថៃ បានឱ្យដឹងនាថ្ងៃអង្គារនេះថា នាយករដ្ឋមន្រ្តីថៃ លោកស្រី ផែថងថាន ស៉ីណាវ៉ាត់ បាននិយាយទូរស័ព្ទ ជាមួយប្រធានាធិបតីជាប់ឆ្នោតរបស់សហរដ្ឋអាមេរិក គឺលោក ដូណាល់ ត្រាំ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃអង្គារ ទី១៩ ខែវិច្ឆិកា ឆ្នាំ២០២៤។

យោងតាមសេចក្តីថ្លែងការណ៍ពីការិយាល័យរបស់លោកស្រី អំឡុងកិច្ចសន្ទនាខាងលើ លោកស្រីនាយករដ្ឋមន្រ្តីថៃ បានបង្ហាញអំពី​ការត្រៀមខ្លួនជាស្រេចរបស់ប្រទេសថៃ ដើម្បីធ្វើការជាមួយសហរដ្ឋអាមេរិក ហើយអំឡុងពេលនោះ លោក ត្រាំ ក៏បានថ្លែងកោតសរសើរ​ការបំពេញការងាររបស់លោកស្រីផងដែរ។ លោកស្រី ផែថងថាន បានឡើងកាន់តំណែងជានាយករដ្ឋមន្រ្តីថៃ កាលពីខែកញ្ញាកន្លងទៅ និងជា​នាយករដ្ឋមន្រ្តីវ័យក្មេងបំផុត​ របស់ប្រទេសអាស៊ានមួយនេះ។

គួរបញ្ជាក់ថា ថៃគឺជាសម្ព័ន្ធមិត្តសន្ធិសញ្ញាចាស់ជាងគេបង្អស់ របស់ទីក្រុងវ៉ាស៉ីនតោន ប្រចាំតំបន់អាស៉ី។ ថៃព្រមទាំងប្រទេសអាស៊ានផ្សេងទៀត ដែលមានរោងចក្ររថយន្ត និងអេឡិចត្រូនិក ដូចជាវៀតណាមជាដើម នឹងអាចទទួលបានអត្ថប្រយោជន៍ ពីគោលនយោបាយរបស់ លោក ត្រាំ ដែលមានផែនការដំឡើងពន្ធលើ ផលិតផលនាំចូលពីប្រទេសចិន។ រដ្ឋមន្រ្តីពាណិជ្ជកម្មថៃ ធ្លាប់លើកឡើងថា ថៃគួរតែព្យាយាម​រិះរកមធ្យោបាយ ដើម្បីបង្កើនការនាំចេញឱ្យកាន់តែច្រើនថែមទៀត ទៅកាន់សហរដ្ឋអាមេរិក ដើម្បីជំនួសផលិតផលចិន។ វិស័យនាំចេញ គឺជាម៉ាស៉ីនជំរុញដ៏សំខាន់បំផុតមួយ នៃសេដ្ឋកិច្ចរបស់ថៃ ហើយបច្ចុប្បន្ន សហរដ្ឋអាមេរិក គឺជាគោលដៅនាំចេញលេខ១ របស់ថៃ ខណៈគោលដៅលេខ២ គឺប្រទេសចិន៕