នាយករដ្ឋមន្រ្តីចិន លោក Li Qiang បង្ហាញការគាំទ្ររបស់ទីក្រុងប៉េកាំង ចំពោះកិច្ចប្រឹងប្រែងផ្សះផ្សា និងធ្វើអន្តរកាលនយោបាយ របស់ប្រទេសមីយ៉ាន់ម៉ា

ប៉េកាំង៖ ប្រព័ន្ធផ្សព្វផ្សាយរដ្ឋចិន បានរាយការណ៍នាថ្ងៃព្រហស្បតិ៍ ទី៧ ខែវិច្ឆិកាថា នាយករដ្ឋមន្រ្តីចិន លោក Li Qiang បានបង្ហាញការគាំទ្ររបស់ទីក្រុងប៉េកាំង ចំពោះកិច្ចប្រឹងប្រែងផ្សះផ្សា និងធ្វើអន្តរកាលនយោបាយ របស់ប្រទេសមីយ៉ាន់ម៉ា អំឡុងជំនួបពិភាក្សាជាមួយ ប្រមុខរដ្ឋាភិបាលយោធាមីយ៉ាន់ម៉ា កាលពីថ្ងៃពុធ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោក Li បានជួបលោក Min Aung Hlaing នៅឯទីក្រុង Kunming រដ្ឋធានីខេត្ត Yunnan ភាគនិរតីប្រទេសចិន ដែល មានព្រំប្រទល់ជាប់មីយ៉ាន់ម៉ា។ វត្តមានរបស់លោក Min Aung Hlaing នៅចិន គឺជាការធ្វើទស្សនកិច្ចលើកដំបូងបំផុតមកកាន់ ប្រទេសជិតខាងដ៏មានឥទ្ធិពលមួយនេះ គិតចាប់តាំងពីរូបលោក បានដឹកនាំរដ្ឋប្រហារយោធា នៅមីយ៉ាន់ម៉ា កាលពីឆ្នាំ២០២១។ ប្រទេសអាស៊ានមួយនេះ មានធ្លាក់ទៅក្នុងភាពចលាចល និងសង្រ្គាមស៉ីវិល ចាប់តាំងពីពេលនោះមក រួមមានទាំងនៅតំបន់តាម បណ្តោយព្រំដែនជាមួយចិន។

គួរបញ្ជាក់ថា អំឡុងជំនួបពិភាក្សាគ្នា លោក Li បាននិយាយថា ចិនមានឆន្ទៈពង្រឹងសាមគ្គីភាព និងកិច្ចសហប្រតិបត្តិការ ជាមួយមីយ៉ាន់ម៉ា ហើយមានបំណងចង់លើកកម្ពស់បន្ថែមទៀត នូវច្រករបៀងសេដ្ឋកិច្ចចិន-មីយ៉ាន់ម៉ា។

ទន្ទឹមគ្នានោះ លោកនាយករដ្ឋមន្រ្តីចិន បានឆ្លៀតឱកាសអំពាវនាវឱ្យមីយ៉ាន់ម៉ា ការពារសុវត្ថិភាពពលរដ្ឋនិងក្រុមហ៊ុនចិន នៅក្នុងប្រទេសនេះ ហើយគូសរំលេចអំពី ភាពចាំបាច់ឱ្យប្រទេសទាំងពីរ ត្រូវរួមគ្នាប្រយុទ្ធប្រឆាំងសកម្មភាពបទល្មើសឆ្លងព្រំដែន រួមមានល្បែងស៉ីសង និងការឆបោកតាមប្រព័ន្ធទូរគមនាគមន៍ ជាដើម៕