លោក ចូ បៃឌិន ហៅទូរស័ព្ទទៅលោក ដូណាល់ ត្រាំ ដើម្បីអបអរសាទរក្រោយជាប់ឆ្នោត ជាប្រធានាធិបតីអាមេរិក
បរទេស៖ ប្រធានាធិបតីអាម៉េរិកលោក ចូ បៃឌិន បានហៅទូរស័ព្ទទៅអបអរសាទរលោក ដូណាល់ ត្រាំ បន្ទាប់ពីបេក្ខជនមកពីគណបក្សសាធារណរដ្ឋបានឈ្នះឆ្នោត ហើយលោកសន្យាថានឹងធានាបាននូវការផ្ទេរអំណាចដោយរលូន។
អ្នកនាំពាក្យសេតវិមានបានលើកឡើងខ្លឹមសារនៃការហៅទូរស័ព្ទកាលពីថ្ងៃទី៦ ខែវិច្ឆិកា រវាងលោក បៃឌិន និងលោក ត្រាំ ថា«ប្រធានាធិបតី បៃឌិន ប្តេជ្ញាធានាឱ្យមានការផ្លាស់ប្តូរដោយរលូន និងសង្កត់ធ្ងន់លើសារៈសំខាន់នៃកិច្ចសហប្រតិបត្តិការដើម្បីបង្រួបបង្រួមប្រទេស»។
លោក បៃឌិន ក៏បានអញ្ជើញលោក ត្រាំ ទៅកាន់សេតវិមាន និងបានទូរស័ព្ទទៅអនុប្រធានាធិបតី កាម៉ាឡា ហារីស ដើម្បីសរសើរអំពីយុទ្ធនាការជាប្រវត្តិសាស្ត្ររបស់លោកស្រី។ សេតវិមានបានបន្ថែមថា ប្រធានាធិបតីអាម៉េរិកគ្រោងនឹងថ្លែងសុន្ទរកថាទៅកាន់ប្រជាជាតិអំពីលទ្ធផលបោះឆ្នោតនៅថ្ងៃទី៧ ខែវិច្ឆិកា។
លោក Steven Cheung អ្នកនាំពាក្យយុទ្ធនាការរបស់លោក ត្រាំ លើកឡើងថា ប្រធានាធិបតីជាប់ឆ្នោតបានកោតសរសើរចំពោះការអំពាវនាវរបស់លោក បៃឌិន ដោយបន្ថែមថាកិច្ចប្រជុំរវាងភាគីទាំងពីរនឹងប្រព្រឹត្តទៅក្នុងពេលឆាប់ៗនេះ។ លោក Cheung បញ្ជាក់ថា ៖« លោក ត្រាំ កំពុងទន្ទឹងរង់ចាំកិច្ចប្រជុំនេះ»។
នៅក្នុងសារដែលបានចេញផ្សាយបន្ទាប់ពីលោកស្រី ហារីស បានទទួលស្គាល់ការបរាជ័យចំពោះលោក ត្រាំ, ប្រធានាធិបតីអាម៉េរិកលោក បៃឌិន បានសរសើរអនុប្រធានរបស់លោកថាជា«ដៃគូដ៏អស្ចារ្យ និងជាមន្ត្រីរាជការដែលស្មោះត្រង់ និងក្លាហាន»។
លោក បៃឌិន សង្កត់ធ្ងន់ថា ៖« នៅក្នុងកាលៈទេសៈដ៏ពិសេសនោះ លោកស្រីបានឈានជើងឡើង និងដឹកនាំយុទ្ធនាការជាប្រវត្តិសាស្ត្រ ដោយបង្ហាញពីអ្វីដែលអាចធ្វើបានក្រោមការដឹកនាំដែលមានសីលធម៌ខ្ពស់ និងចក្ខុវិស័យច្បាស់លាស់អំពីប្រទេសដែលមានសេរីភាព យុត្តិធម៌ និងឱកាសកាន់តែច្រើនសម្រាប់ជនជាតិអាម៉េរិកទាំងអស់»។
ចៅហ្វាយសេតវិមានរូបនេះក៏បានបញ្ជាក់ដែរថា ការជ្រើសរើសលោកស្រី ហារីស ជាអនុប្រធានរបស់លោក គឺជាការសម្រេចចិត្តដ៏ល្អបំផុត ដែលលោកមិនធ្លាប់ធ្វើ។ លោក បៃឌិន បន្ថែមថា ៖« សំខាន់ជាងនេះទៅទៀត លោកស្រីនឹងបន្តធ្វើជាអ្នកដឹកនាំដែលកូនៗរបស់យើងកោតសរសើរជាច្រើនជំនាន់ទៅមុខទៀត ដោយបន្សល់ទុកនូវសញ្ញាណរបស់នាងអំពីអនាគតរបស់អាមេរិក»។
អតីតប្រធានាធិបតីអាម៉េរិក លោក បារ៉ាក់ អូបាម៉ា និងភរិយា Michelle នៅថ្ងៃដដែលនោះ ក៏បានផ្ញើសារអបអរសាទរដល់ប្រធានាធិបតីជាប់ឆ្នោត និងអនុប្រធានរបស់លោក ត្រាំ នៅលើបណ្តាញសង្គម។
លោកអូបាម៉ា និងភរិយាបានលើកឡើងតាមរយៈសំណេរលើបណ្តា្ញញសង្គមថា នេះមិនមែនជាលទ្ធផលដែលពួកគេបានរំពឹងទុកនោះទេ ដោយពិចារណាលើការខ្វែងគំនិតគ្នាយ៉ាងជ្រាលជ្រៅរវាងពួកគេនិងអ្នកនយោបាយសាធារណរដ្ឋទាំងពីរ។ ទោះយ៉ាងណាក៏ដោយ ពួកគេបានសង្កត់ធ្ងន់ថា ដើម្បីរស់នៅក្នុងលទ្ធិប្រជាធិបតេយ្យ មនុស្សម្នាក់ត្រូវតែទទួលយកថា ទស្សនៈរបស់ពួកគេនឹងមិនតែងតែឈ្នះ ហើយសង្កត់ធ្ងន់លើសារៈសំខាន់នៃការផ្ទេរអំណាចដោយសន្តិវិធី។
លោក ត្រាំ ត្រូវបានជាប់ឆ្នោតជាប្រធានាធិបតីបន្ទាប់ពីថ្ងៃបោះឆ្នោតថ្ងៃទី៥ ខែវិច្ឆិកា ដោយទទួលបានជ័យជម្នះជាបន្តបន្ទាប់ក្នុងរដ្ឋប្រទាញប្រទង់។ លោកជាប្រធានាធិបតីអាម៉េរិកដំបូងគេក្នុងមួយសតវត្សដែលបានកាន់តំណែងពីរអាណត្តិមិនជាប់គ្នា។ នៅក្នុងសុន្ទរកថាទៅកាន់អ្នកគាំទ្រនៅព្រឹកព្រលឹមថ្ងៃទី៦ ខែវិច្ឆិកា លោក ត្រាំ បានប្រកាសថា លោក«បានបង្កើតប្រវត្តិសាស្ត្រ» ៕
