ប្អូនស្រីរបស់មេដឹកនាំកូរ៉េខាងជើងថា សមយុទ្ធរវាងសហរដ្ឋអាមេរិក ជប៉ុន និងកូរ៉េ បង្ហាញពីភាពត្រឹមត្រូវនៃការពង្រឹងនុយក្លេអ៊ែររបស់ខ្លួន

សេអ៊ូល៖ ប្រព័ន្ធផ្សព្វផ្សាយរដ្ឋ KCNA បានរាយការណ៍នៅថ្ងៃអង្គារនេះថា លោកស្រី Kim Yo Jong ដែលជាប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង លោក Kim Jong Un បានបញ្ជាក់ថា សមយុទ្ធយោធារបស់សហរដ្ឋអាមេរិក ជប៉ុន និងកូរ៉េខាងត្បូង បង្ហាញអំពីភាពត្រឹមត្រូវនៃការពង្រឹងនុយក្លេអ៊ែររបស់កូរ៉េខាងជើង។

លោកស្រី Kim Yo Jong បានរិះគន់សមយុទ្ធដែនអាកាសដែលពួកគេបានធ្វើបន្ទាប់ពីកូរ៉េខាងជើងបានសាកល្បងកាំជ្រួចមីស៊ីលអន្តរទ្វីបឥន្ធនៈរឹងថ្មីមួយដែលមានឈ្មោះថា Hwasong-19 កាលពីសប្តាហ៍មុន ក៏ដូចជាសមយុទ្ធយោធាជាង២០ ដែលសម្ព័ន្ធមិត្តបានធ្វើនៅឆ្នាំនេះ។

KCNA បានរាយការណ៍បន្តថា ដោយសារការគំរាមកំហែងបែបនេះ កូរ៉េខាងជើងនឹងមិនងាកចេញពីផ្លូវនៃការពង្រឹងការរារាំងនុយក្លេអ៊ែររបស់ខ្លួនឡើយ។

ការបាញ់បង្ហោះ ICBM របស់កូរ៉េខាងជើងកាលពីសប្តាហ៍មុន បានហោះខ្ពស់ជាងកាំជ្រួចកូរ៉េខាងជើងមុនៗ នេះបើយោងតាមកូរ៉េខាងជើង ក៏ដូចជាយោធានៅកូរ៉េខាងត្បូង និងជប៉ុន ដែលបានតាមដានការហោះហើររបស់ខ្លួនជ្រៅទៅក្នុងលំហ មុនពេលវាធ្លាក់ក្នុងមហាសមុទ្ររវាងប្រទេសជប៉ុន និងរុស្ស៊ី។

កងទ័ពអាកាសកូរ៉េខាងត្បូងបានឲ្យដឹងថា បន្ទាប់ពីការបាញ់បង្ហោះ កងកម្លាំងទ័ពអាកាសកូរ៉េខាងត្បូង និងសហរដ្ឋអាមេរិកបានធ្វើសមយុទ្ធបាញ់គ្រាប់ពិតរួមគ្នាជាលើកដំបូងដែលពាក់ព័ន្ធនឹងយន្តហោះគ្មានមនុស្សបើក Global Hawk និង Reaper ដោយទម្លាក់គ្រាប់បែកដែលដឹកនាំដោយ GPS ក្នុងការវាយប្រហារក្លែងធ្វើប្រឆាំងនឹងគោលដៅសត្រូវ។

ការបាញ់បង្ហោះ ICBM កាលពីសប្តាហ៍មុនបានកើតឡើងភ្លាមៗបន្ទាប់ពីកូរ៉េខាងជើងបានចាប់ផ្តើមបញ្ជូនទាហានទៅជួយដល់សង្គ្រាមរបស់រុស្ស៊ីនៅអ៊ុយក្រែន ដោយបានទាក់ទាញការថ្កោលទោសយ៉ាងឆាប់រហ័សពីទីក្រុងវ៉ាស៊ីនតោន និងសម្ព័ន្ធមិត្តនៅក្នុងប្រទេសកូរ៉េខាងត្បូង ជប៉ុន និងអឺរ៉ុប ព្រមទាំងអគ្គលេខាធិការអង្គការសហប្រជាជាតិផងដែរ។

KCNA បានបន្ថែថា ទន្ទឹមនឹងនោះ មេដឹកនាំកូរ៉េខាងជើង លោក Kim Jong Un បានត្រួតពិនិត្យកាលពីថ្ងៃចន្ទអំពីការកសាងឡើងវិញនូវតំបន់ដែលធ្លាប់រងគ្រោះដោយភ្លៀងធ្លាក់ខ្លាំង និងទឹកជំនន់នៅជិតព្រំដែនរបស់ប្រទេសជាមួយប្រទេសចិន។