ប្រធានាធិបតីឥណ្ឌូណេស៊ីថ្មី លោក ប្រាបូវ៉ូ ស៊ូបៀនតូ នឹងប្រើមន្ត្រីច្រើនជាងគេបំផុតចាប់តាំងពីឆ្នាំ១៩៦៦

ហ្សាការតា៖ សមាជិក១០៩នាក់នៃគណៈរដ្ឋមន្ត្រីថ្មីរបស់ប្រទេសឥណ្ឌូណេស៊ី បានស្បថចូលកាន់តំណែងនៅថ្ងៃចន្ទទី២១ ខែតុលា ។ «គណៈរដ្ឋមន្ត្រីក្រហម និងស» ជាឈ្មោះដែលប្រធានាធិបតិថ្មី ដាក់ឱ្យរដ្ឋមន្ត្រីក្នុងអាណត្តិនៃរដ្ឋបាលរបស់លោក។ នេះជាគណៈរដ្ឋមន្ត្រីដ៏ធំបំផុតរបស់ប្រទេសឥណ្ឌូណេស៊ី ចាប់តាំងពីឆ្នាំ១៩៦៦។

លោក ប្រាបូវ៉ូ ស៊ូបៀនតូ បានចូលកាន់តំណែងកាលពីថ្ងៃអាទិត្យទី២០តុលា ក្នុងនាមជាប្រធានាធិបតីឥណ្ឌូណេស៊ីទី៨ បន្តតំណែងពីលោក ចូកូ វីដូដូ។

ថ្លែងនៅក្នុងសុន្ទរកថា ដ៏ក្ដៅគគុកទៅកាន់សមាជិកសភា លោក ប្រាបូវ៉ូ បានសន្យាថា នឹងលុបបំបាត់អំពើពុករលួយ និងមានបំណងសម្រេចបានខ្លួនឯងនូវការផ្គត់ផ្គង់អាហារ និងថាមពលដោយមិនចាំបាច់ពឹងពាក់បរទេស។ ខុទ្ទកាល័យរបស់ ប្រាបូវ៉ូ មានក្រសួងចំនួន៤៨ មានរដ្ឋមន្ត្រី និងអនុរដ្ឋមន្រ្តីជាង១០០នាក់ ខណៈដែលលោកស្រី ស្រ៊ី មូលីយ៉ានី ឥន្ទ្រាវ៉ាទី (Sri Mulyani Indrawati) បន្តកាន់តំណែងជារដ្ឋមន្ត្រីក្រសួងហិរញ្ញវត្ថុ និងលោក បាលីល ឡាហាដាលីយ៉ា (Bahlil Lahadalia) ជារដ្ឋមន្ត្រីក្រសួងថាមពលដដែល។ ដោយឡែក រដ្ឋមន្ត្រី ការ បរទេស ថ្មី របស់ ឥណ្ឌូណេស៊ី គឺ  លោក ស៊ូហ្គីណូ (Sugiono) ។

លោកស្រី ស្រ៊ី មូលីយ៉ានី នឹងធ្វើជាតួអង្គមិនអាចខ្វះបានក្នុងគោលនយោបាយសំខាន់ៗរបស់លោក ប្រាបូវ៉ូ រួមទាំងការផ្ដល់អាហារឥតគិតថ្លៃដល់កុមារប្រហែល២០លាននាក់ អាចនឹងចំណាយថវិការដ្ឋចំនួន៧១ពាន់ពាន់លានរូពៀ ឬស្មើ៤,៦០ពាន់លានដុល្លារក្នុងឆ្នាំដំបូង។ អតីតនាយកគ្រប់គ្រងធនាគារពិភពលោករូបនេះ ទទួលបានការសរសើរចំពោះការកែទម្រង់ប្រព័ន្ធពន្ធដារ ពេលធ្វើការក្រោមប្រធានាធិបតី២មុន។

លោក ប្រាបូវ៉ូ នឹងនាំសមាជិកគណៈរដ្ឋមន្ត្រីរបស់លោកទៅប្រជុំរយៈពេល៣ថ្ងៃនៅឯសាលាយោធា ដែលមានទីតាំងនៅជួរភ្នំ Javanese ជាកន្លែងដែលពួកគេនឹងដេកនៅក្នុងតង់ ជាការចាប់ផ្តើមមិនធម្មតាសម្រាប់រដ្ឋាភិបាលនៅក្នុងប្រទេសអាស៊ីអាគ្នេយ៍។ សាលាយោធានេះហ៊ុំព័ទ្ធដោយភ្នំភ្លើងប្រហែល៥០០គីឡូម៉ែត្រ ភាគខាងកើតនៃរដ្ឋធានីហ្សាការតា។ កិច្ចប្រជុំនេះ គឺមានគោលបំណងបង្កើតចំណងរវាងរដ្ឋមន្ត្រី និងអនុរដ្ឋមន្ត្រី ដែលជាក្រុមចម្រុះនៃអ្នកនយោបាយ អ្នកបច្ចេកទេស អតីតមន្ត្រីយោធា និងមេដឹកនាំសាសនា។ លោក ប្រាបូវ៉ូ ចង់ធ្វើឱ្យប្រាកដថា សមាជិកគណៈរដ្ឋមន្ត្រីរបស់គាត់យល់ពីចក្ខុវិស័យរបស់គាត់៕