ឯកឧត្តម ប៊ុន ហុន អញ្ជើញដឹកនាំកិច្ចប្រជុំអន្តរក្រសួង ដើម្បីពិនិត្យនិងពិភាក្សាលើខ្លឹមសារសេចក្តីព្រាងកំណត់ហេតុនៃកិច្ចប្រជុំអភិបាលខេត្តជាប់ព្រំដែនកម្ពុជា-ថៃ លើកទី៨

ភ្នំពេញ៖ នៅទីស្ដីការក្រសួងមហាផ្ទៃនាព្រឹកថ្ងៃទី១៧ ខែតុលា ឆ្នាំ២០២៤ ឯកឧត្តម ប៊ុន ហុន រដ្ឋលេខាធិការ ក្រសួងមហាផ្ទៃ បានអញ្ជើញដឹកនាំកិច្ចប្រជុំ អន្តរក្រសួង ដើម្បីពិនិត្យនិងពិភាក្សាលើខ្លឹមសារសេចក្តីព្រាងកំណត់ហេតុនៃកិច្ចប្រជុំអភិបាលខេត្តជាប់ព្រំដែនកម្ពុជា-ថៃ លើកទី៨។

កិច្ចប្រជុំនេះ មានការអញ្ជើញចូលរួមពី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយក អគ្គស្នងការរង អគ្គនាយករង អភិបាលខេត្ត អភិបាលរងខេត្ត លោក លោកស្រី មន្រ្តីតំណាងអន្តរក្រសួង ពាក់ព័ន្ធជាច្រើនរូបទៀតផងដែរ។

កិច្ចប្រជុំនេះមានរបៀបវារៈសំខាន់ៗចំនួន២ គឺ៖
១.ខ្លឹមសារដែលបានស្នើឡើងដោយខាងភាគីថៃ
២.ការពិនិត្យ និងពិភាក្សាលើខ្លឹមសារ សេចក្តីព្រាងកំណត់ហេតុនៃកិច្ចប្រជុំ អភិបាលខេត្តជាប់ព្រំដែនកម្ពុជា-ថៃ លើកទី៨ ដែលស្នើដោយក្រសួង ស្ថាប័ន អាជ្ញាធរខេត្ត នៃព្រះរាជាណាចក្រកម្ពុជា។

ឯកឧត្តមរដ្ឋលេខាធិការ និងជាប្រធានអង្គប្រជុំ បានអនុញ្ញាតឱ្យ តំណាងអន្តរក្រសួង អភិបាលខេត្ត នៅជាប់ព្រំដែន និងអង្គប្រជុំទាំងអស់ ជួយពិនិត្យ និងពិភាក្សាលើខ្លឹមសារសេចក្តីព្រាងកំណត់ហេតុ តាមបណ្ដាអន្តរក្រសួងពាក់ព័ន្ធ និងខេត្តដែលជាប់ព្រំដែនកម្ពុជា-ថៃ ដែលខាងភាគីថៃបានស្នើឡើងនូវខ្លឹមសារមួយចំនួន ព្រមទាំងបញ្ហាប្រឈមដែលបានជួបកន្លងមក ដើម្បីយកមកពិភាក្សារកដំណោះស្រាយ៕