ឧត្តមសេនីយ៍ទោ ស សំបូរធន ដឹកនាំកិច្ចប្រជុំត្រៀមបើកវគ្គសិក្សានៅភ្នំជុំសែនរីករាយ

ភ្នំពេញ៖ ដោយទទួលបានការអនុញ្ញាតពី ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស នាព្រឹកថ្ងៃអង្គារ ១៤រោច ខែភទ្របទ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១ ខែតុលា ឆ្នាំ២០២៤ នៅមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ ស្ថិតក្នុងភូមិសាស្ត្រ ភូមិច្រកកូវ ឃុំពាម ស្រុកសាមគ្គីមានជ័យ ខេត្តកំពង់ឆ្នាំង លោកឧត្តមសេនីយ៍ទោ ស សំបូរធន មេបញ្ជាការរង និងជានាយសេនាធិការកងរាជអាវុធហត្ថលើផ្ទៃប្រទេស បានអញ្ជើញជាអធិបតីក្នុងកិច្ចប្រជុំត្រៀមរៀបចំបើកវគ្គវិក្រឹត្យការគរុកោសល្យ និងនាយទាហានគ្រប់គ្រងជំនាន់ទី៣ ថែលគ្រោងនឹងប្រព្រឹត្តិទៅនៅថ្ងៃទី៨ ខែតុលា ឆ្នាំ២០២៤ខាងមុខនេះ។

កងរាជអាវុធហត្ថដែលជាផ្នែកមួយរបស់កងយោធពលខេមរភូមិន្ទ តែងតែចាត់ទុកការងារហ្វឹកហ្វឺនគឺជាការងារអាទិភាពចំបងដើម្បីបង្កើនចំណេះដឹង ពង្រឹងសមត្ថភាព គុណភាពនាយទាហាននៃកងរាជអាវុធហត្ថ និងសម្រាប់ការធ្វើកំណែទម្រង់ស្ថាប័នកងរាជអាវុធហត្ថ។

វគ្គវិក្រឹត្យការគរុកោសល្យ និងនាយទាហានគ្រប់គ្រងជំនាន់ទី៣ មានសិក្ខាកាមចូលហ្វឹកហ្វឺនចំនួន៨៨នាក់ រយះពេលហ្វឹកហ្វឺនរួមចំនួន២០ថ្ងៃកន្លះ ស្មើនឹង១៤៣ម៉ោង និងខ្លឹមសារមេរៀនផ្តោតទៅលើមុខវិជ្ជាលំហាត់របៀប មុខវិជ្ជាគ្រប់គ្រង មុខវិជ្ជាអប់រំនយោបាយចិត្តសាស្ត្រ និងការហ្វឹកហាត់កីឡា។

កិច្ចប្រជុំនេះមានការអញ្ជើញចូលរួមពីសំណាក់ស្នងការ ស្នងការរង នាយការិយាល័យជំនាញ នាយក នាយករងមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ មេបញ្ជាការកងអន្តរាគមន៏ និងជំនាញដែលមានការពាក់ព័ន្ធផងដែរ ៕