អភិបាលខេត្តកំពង់ធំ អញ្ជើញប្រកាសចូលកាន់មុខតំណែងលោក ឃន ចាន់ថៃ ជាអភិបាលស្រុកបារាយណ៍
ភ្នំពេញ៖ នារសៀលថ្ងៃទី៣០ ខែកញ្ញា ឆ្នាំ២០២៤ ឯកឧត្តម នួន ផារ័ត្ន អភិបាលខេត្តកំពង់ធំ អញ្ជើញប្រកាសចូលកាន់មុខតំណែងលោក ឃន ចាន់ថៃ ជាអភិបាលស្រុកបារាយណ៍ នៃខេត្តកំពង់ធំ។
ពិធីប្រកាសចូលកាន់មុខតំណែងខាងលើនេះ ត្រូវបានធ្វើឡើង នៅបរិវេណសាលាស្រុកបារាយណ៍ ដោយមានការចូលរួមពីសំណាក់ លោកអភិបាលរងខេត្ត តំណាងអយ្យការអមសាលាដំបូងខេត្ត ក្រុមការងារចុះជួយស្រុក ឃុំ ថ្នាក់ដឹកនាំមន្ទីរអង្គភាពនានាជុំវិញខេត្ត កងកម្លាំងប្រដាប់អាវុធទាំង៣ប្រភេទ ក្រុមប្រឹក្សាឃុំ និងមន្ត្រីរាជការជាច្រើនរូប។
ជាមួយគ្នានេះ ឯកឧត្តម នួន ផារ័ត្ន អបអរសាទចំពោះលោក ឃន ចាន់ថៃ ដែលត្រូវបានសម្តេចមហាបវរធិបតី នាយករដ្ឋមន្ត្រី បានចេញអនុក្រឹត្យតែងតាំងជាអភិបាលស្រុកបារាយណ៍នាឱកាសនេះ ព្រមទាំងជំរុញ ដល់មន្ត្រីរដ្ឋបាលស្រុកទាំងអស់ ខិតខំបម្រើសេវាសាធារណៈជូនប្រជាពលរដ្ឋឲ្យកាន់តែប្រាសាទឡើង ស្របតាមបរិបទ នៃកំណែទម្រង់របស់រាជរដ្ឋាភិបាល អាណត្តិទី៧នេះ។
លើសពីនេះទៀត ឯកឧត្តម អភិបាលខេត្តកំពង់ធំ បានផ្ដល់នូវគោលការណ៍មួយចំនួនបន្ថែមទៀត រួមមាន៖
១. អំពីការចូលរួមអនុវត្តកម្មវិធីកំណែទម្រង់នានារបស់រាជរដ្ឋាភិបាលកម្ពុជា
២. អំពីការផ្តល់សេវាសាធារណៈ និងការដោះស្រាយបញ្ហាប្រឈមនៅមូលដ្ឋាន
៣. អំពីសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម
៤. អំពីក្រុមការងាររបស់រាជរដ្ឋាភិបាល
៥. អំពីការងារគ្រប់គ្រងបុគ្គលិក
៦. អំពីការងារផ្សេងៗ។
គួរបញ្ជាក់ផងដែរថា ការតែងតាំង លោក ឃន ចាន់ថៃ ជាអភិបាលស្រុកបារាយណ៍នាពេលនេះ គឺធ្វើឡើងដោយអនុលោមតាមច្បាប់ ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ បន្ទាប់ពីលោក អួង សារឿន អតីតអភិបាលស្រុកបារាយណ៍ ត្រូវដល់អាយុចូលនិវត្តន៍ ៕
