ស្នងការដ្ឋាននគរបាលខេត្តបន្ទាយមានជ័យ បិទវគ្គបំប៉នជំនាញ ស្តីពីបច្ចេកទេសសង្គ្រោះជីវិតជនរងគ្រោះដោយគ្រោះថ្នាក់ចរាចរណ៍ផ្លូវគោក
ភ្នំពេញ៖ នៅស្នងការដ្ឋាននគរបាលខេត្តបន្ទាយមានជ័យ នាថ្ងៃទី៩ ខែកញ្ញា ឆ្នាំ២០២៤ បានរៀបចំពិធីបិទវគ្គ បំប៉នជំនាញស្តីពីបច្ចេកទេសសង្គ្រោះជីវិតជនរងគ្រោះ ដោយគ្រោះថ្នាក់ចរាចរណ៍ផ្លូវគោក ក្រោមអធិបតីភាពលោកឧត្តមសេនីយ៍ត្រី រ៉ែម វីរៈ ស្នងការរង ទទួលផែនការងារសេនាធិការ តំណាង លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ។
ធ្វើសេចក្តីរាយការណ៍សង្ខេបនាឱកាសនោះ លោកវរសេនីយ៍ឯកគី មករា នាយការិយាល័យ នគរបាលចរាចរណ៍ផ្លូវគោក បានលើកឡើងថា៖ ដោយអនុវត្តតាមចំណាដ៏ខ្ពង់ខ្ពស់ ចុះថ្ងៃទី០៤ ខែកក្កដា ឆ្នាំ២០២៤ របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ស្តីពីការរៀបចំវគ្គបណ្តុះបណ្តាលពង្រឹងសមត្ថភាពជំនាញ ដើម្បី ឆ្លើយតបចំពោះការសង្គ្រោះជនរងគ្រោះដោយគ្រោះថ្នាក់ចរាចរណ៍និងបង្ការរបួសស្នាមចំនួន២វគ្គគឺ៖ជំនាញសង្គ្រោះជីវិតជនរងគ្រោះដោយគ្រោះថ្នាក់ចរាចរណ៍និងជំនាញឆ្លើយតបការសង្រ្គោះក្នុងហេតុការណ៍គ្រោះថ្នាក់ចរាចរណ៍ធ្ងន់ធ្ងរ ដល់ មន្ត្រីនគរបាលនៃស្នងការដ្ឋាននគរបាលខេត្តបន្ទាយមានជ័យ ចំនួន៤២រូប ស្រី១០រូប ក្នុងនោះ៖មន្ត្រីនគរបាលការិយាល័យចរាចរណ៍ខេត្តចំនួន១៤រូប ស្រី៣រូប ,ការិយាល័យសុខាភិបាលចំនួន៥រូប ស្រី២រូប, ការិយាល័យបង្ការ-ពន្លត់ អគ្គីភ័យចំនួន៥រូប ស្រី៤រូប និងមន្ត្រីនគរបាលចរាចរណ៍មកពីតាមបណ្តា ស្រុក ក្រុងទាំង៩ចំនួន១៨រូប ស្រី១រូប ។ សិក្ខាកាមទាំងអស់ទន្ទឹមនឹងការតក់ត្រានៃមេរៀននីមួយៗ គឺ បានអនុវត្តជាក់ស្តែងតាមខ្លឹមសារនៃមេរៀនផងដែរ ។
លោកឧត្តមសេនីយ៍ត្រី រ៉ែម វីរៈ ស្នងការរង ទទួលផែនការងារសេនាធិការ បានថ្លែងថា៖ ក្នុងនាមលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្ត និងក្នុងនាមលោកផ្ទាល់ សូមថ្លែងនូវការកោតសរសើរដល់មន្ត្រីនគរបាលចរាចរណ៍ នៃស្នងការដ្ឋាននគរបាលខេត្តបន្ទាយមានជ័យ ដែលកន្លងមកបានខិតខំយកអស់ស្មារតីបំពេញភារកិច្ចរបស់ខ្លួនក្នុងការរឹតបន្តឹងច្បាប់ចរាចរណ៍ផ្លូវគោកនិងបានធ្វើផ្សព្វផ្សាយខ្លឹមសារអនុក្រឹត្យ លេខ៣៩អ.ន.ក្រ ទៅដល់គ្រឹះស្ថាននិងវិទ្យាល័យ អនុវិទ្យាល័យនានា បានល្អប្រសើរ សំដៅកាត់បន្ថយអត្រាគ្រោះថ្នាក់ចរាចរណ៍ ។
ជាមួយគ្នានោះដែរ លោកឧត្តមសេនីយ៍ត្រី ស្នងការរង ក៏បានថ្លែងនូវការកោតសរសើរដល់សិក្ខាកាមទាំងអស់ ដែលបានខិតខំក្របជញ្ជក់លើខ្លឹមសារនៃមេរៀន និងអនុវត្តជាក់ស្តែងតាមការបង្ហាត់បង្រៀនរបស់លោកគ្រូ អ្នគ្រូ ទទួលបានលទ្ធផលល្អ ហើយនឹងសូមឲ្យមន្ត្រីដែលបានវគ្គបំប៉ននាពេលនេះ ពេលត្រឡប់ទៅអង្គភាពវិញត្រូវយកចំណេះដឹងទាំងនេះទៅបង្ហាត់បង្រៀនដល់មិត្តរួមការងារក្នុងអង្គភាពរបស់ខ្លួន សំដៅរួមគ្នាជួយសង្រ្គោះជីវិតជនរងគ្រោះដោយគ្រោះថ្នាក់ចរាចរណ៍នេះ និងបន្តរឹតបន្តឹងការអនុវត្តច្បាប់ចរាចរណ៍ផ្លូវគោកនិងបន្តការផ្សព្វផ្សាយខ្លឹមសារអនុក្រឹត្យលេខ៣៩អ.ន.ក្រ តាមគោលការណ៍ណៃនាំរបស់ គ.ស.ច.គ សំដៅកាត់បន្ថយគ្រោះថ្នាក់ចរាចរណ៍ឲ្យនៅកំរិតទាប ។ មួយវិញទៀត ត្រូវមានសាមគ្គីភាពផ្ទៃក្នុងឲ្យបានល្អ អនុវត្តនូវជំនាញវិជ្ជាជីវៈនិងគោរពនូវន័យរបស់នគរបាលជាតិឲ្យបានខ្ជាប់ខ្ជួន ៕
