ឧបនាយករដ្ឋមន្ត្រី សុខ ចិន្តាសោភា និងឯកអគ្គរាជទូតជប៉ុនប្រចាំកម្ពុជា ចុះហត្ថលេខាលើលិខិតប្តូរសារស្តីពីការផ្តល់ឥណទានប្រមាណ ៥៥លានដុល្លារ ដើម្បីគាំទ្រដល់គម្រោងពង្រីកប្រព័ន្ធខ្សែបញ្ជូន និងចែកចាយក្នុងរាជធានីភ្នំពេញ

ភ្នំពេញ៖ នៅថ្ងៃទី៦ ខែកញ្ញា ឆ្នាំ២០២៤ ឯកឧត្តម ឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងឯកឧត្តម UENO Atsushi ឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុនប្រចាំកម្ពុជា បានចុះហត្ថលេខាលើលិខិតប្តូរសារស្តីពីការផ្តល់ឥណទាន ប្រាក់យ៉េនប្រមាណ ៧.៩៨៨.០០០.០០០ យ៉េន (ប្រមាណ ៥៥លានដុល្លារអាមេរិក) ដើម្បីគាំទ្រដល់គម្រោងពង្រីកប្រព័ន្ធខ្សែបញ្ជូន និងចែកចាយក្នុងរាជធានីភ្នំពេញ (ដំណាក់កាលទី២ វគ្គទី៣)។

គម្រោងដែលកំពុងដំណើរការនេះ ត្រូវបានផ្តួចផ្តើមឡើងនៅក្នុងឆ្នាំ២០១៥ និងមានគោលបំណងបង្កើនស្ថិរភាពនៃការផ្គត់ផ្គង់អគ្គិសនី ក្នុងរាជធានីភ្នំពេញ តាមរយៈការសាងសង់បណ្តាញបញ្ជូន និងអនុស្ថានីយ។

គម្រោងនេះមានសារសំខាន់យ៉ាងខ្លាំង ក្នុងការធានាឲ្យបាននូវការផ្គត់ផ្គង់អគ្គិសនីសម្រាប់ប្រតិបត្តិការធុរកិច្ច និងការលើកកម្ពស់ជីវភាពរបស់ប្រជាពលរដ្ឋ ដែលនឹងរួមចំណែកដល់ការជំរុញកំណើនសេដ្ឋកិច្ច និងការទាក់ទាញវិនិយោគ។

តាងនាមរាជរដ្ឋាភិបាល និងប្រជាជនកម្ពុជា ឯកឧត្តមឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅចំពោះប្រទេសជប៉ុន សម្រាប់ការបន្តជំនួយអភិវឌ្ឍន៍ផ្លូវការ ដែលបានចូលរួមចំណែកយ៉ាងសំខាន់ដល់ការអភិវឌ្ឍសេដ្ឋកិច្ច-សង្គមរបស់កម្ពុជា លើវិស័យនានាព្រមទាំងការបញ្ជូនអ្នកជំនាញ ដើម្បីគាំទ្រការបង្កើតផែនទីបង្ហាញផ្លូវស្តីពីអន្តរកាលថាមពលស្អាត ដែលនឹងពង្រឹងបន្ថែមទៀតនូវភាពជាដៃគូក្នុងការសម្រេចបាននូវថាមពលប្រកបដោយចីរភាព ៕