អាល្លឺម៉ង់ ផ្ដល់ជំនួយឥតសំណងជាង ៣លានដុល្លារ ដល់កម្ពុជាដើម្បីគាំទ្រសកម្មភាពបោសសម្អាតមីន នៅខេត្តបន្ទាយមានជ័យ និងខេត្តឧត្តរមានជ័យ

ភ្នំពេញ៖ រដ្ឋាភិបាលសាធារណរដ្ឋសហព័ន្ធអាល្លឺម៉ង់ បានសម្រេចផ្ដល់ជំនួយដល់កម្ពុជាប្រមាណជាង ៣លានដុល្លារអាមេរិក (៣,១២លានដុល្លារ) ដើម្បីគាំទ្រអង្គភាពស៊ីម៉ាក់ទៅលើសកម្មភាពបោសសម្អាតមីននៅខេត្តបន្ទាយមានជ័យ និងខេត្តឧត្តរមានជ័យសម្រាប់រយ:ពេល២ឆ្នាំ។

យោងហ្វេសប៊ុករបស់មជ្ឈមណ្ឌលសកម្មភាពកម្ចាត់មីនកម្ពុជា (CMAC) នាថ្ងៃទី៤ ខែកញ្ញា បានឲ្យដឹងថា តាមរយៈអង្គការជំនួយប្រជាជនន័រវែស (NPA) រដ្ឋាភិបាលសាធារណរដ្ឋសហព័ន្ធអាល្លឺម៉ង់ បានសម្រេចផ្ដល់ជំនួយចំនួន ៣,១២លានដុល្លារអាមេរិក ដល់កម្ពុជាដើម្បីចូលរួមគាំទ្រ និងលើកកម្ពស់ការងារអង្គភាពស៊ីម៉ាក់លើសកម្មភាពបោសសម្អាតមីននៅខេត្តបន្ទាយមានជ័យ និងខេត្តឧត្តរមានជ័យ ដែលជំនួយនេះនឹងត្រូវអនុវត្តសម្រាប់រយ:ពេល២ឆ្នាំ ដោយចាប់ពីខែកញ្ញា ២០២៤ ដល់ខែសីហា២០២៦។

ក្នុងនោះ ក្នុងឱកាសទទួលជួបពិភាក្សាការងារនេះឯកឧត្ដម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ ក៏បានសម្ដែងការអរគុណដល់លោក Hans Risser ប្រធានអង្គការ NPA ប្រចាំកម្ពុជា ដែលបានពាំនាំនូវដំណឹងនៃការសម្រេចចិត្តជាផ្លូវការលើការផ្ដល់ជំនួយហិរញ្ញប្បទានឥតសំណងរបស់រដ្ឋាភិបាលសារធាណរដ្ឋសហព័ន្ធ័អាល្លឺម៉ង់មកឱ្យកម្ពុជាក្នុងការបោសសម្អាតគ្រាប់មីន និងសំណល់យុទ្ធភណ្ឌសង្គ្រាម។ ជាមួយគ្នានោះ លោក Hans ក៏បានបង្ហាញនូវជំហរខិតខំជួយគាំទ្រអភិវឌ្ឍន៍ធនធានមនុស្សតាមសំណូមពររបស់អង្គភាពស៊ីម៉ាក់ និងបន្តរួមគ្នាដោះស្រាយបញ្ហាប្រឈមផ្សេងៗជាមួយគ្នា៕