ក្រសួងសុខាភិបាល បើកវគ្គបណ្តុះបណ្តាលស្តីពីសុខភាពផ្លូវចិត្ត និងការបំពានគ្រឿងញៀនសម្រាប់គ្រូពេទ្យព្យាបាល និងគិលានុបដ្ឋាក

ភ្នំពេញ៖ នាថ្ងៃចន្ទ ១៤រោច ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២ ខែកញ្ញា ឆ្នាំ២០២៤ ដោយមានការអនុញ្ញាតដ៏ខ្ពង់ខ្ពស់ពី ឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល, ឯកឧត្តមឱសថការី ឈី ហុង រដ្ឋលេខាធិការក្រសួងសុខាភិបាល បានអញ្ជើញជាអធិបតីបើកវគ្គបណ្តុះបណ្តាលស្តីពីសុខភាពផ្លូវចិត្ត និងការបំពានគ្រឿងញៀនសម្រាប់គ្រូពេទ្យព្យាបាល និងគិលានុបដ្ឋាក នៅមន្ទីរសុខាភិបាលនៃរដ្ឋបាលខេត្តកំពង់ចាម ដោយមាន ឯកឧត្តមវេជ្ជបណ្ឌិត គឹម សួរភីរុណ ប្រធានមន្ទីរសុខាភិបាលនៃរដ្ឋបាលខេត្តកំពង់ចាម និងលោកវេជ្ជបណ្ឌិត ឈិត សុផល ប្រធាននាយកដ្ឋានសុខភាពផ្លូវចិត្ត និងការបំពានគ្រឿងញៀនចូលរួមជាគណៈអធិបតី។

វគ្គបណ្តុះបណ្តាលនេះ រៀបចំឡើងក្រោមកិច្ចសហការរវាងមន្ទីរសុខាភិបាល នៃរដ្ឋបាលខេត្តកំពង់ចាម និងនាយកដ្ឋានសុខភាពផ្លូវចិត្ត និងការបំពានគ្រឿងញៀន នៃក្រសួងសុខាភិបាល ដែលមានរយៈពេល ៥ថ្ងៃ ចាប់ពីថ្ងៃទី២ ដល់ទី៦ ខែកញ្ញា ឆ្នាំ២០២៤ ដោយមានការចូលរួមពីសិក្ខាកាមចំនួន ៥៦រូប មកពីមន្ទីរពេទ្យបង្អែកចំនួន៣ និងមណ្ឌលសុខភាពចំនួន១៨។

ជាមួយគ្នានេះ ឯកឧត្តមឱសថការី ឈី ហុង ក៏បានពាំនាំនូវការផ្តាំផ្ញើសួរសុខទុក្ខ និងការណែនាំរបស់ ឯកឧត្តមសាស្រ្តាចារ្យរដ្ឋមន្រ្តី ជូនដល់មន្ត្រីសុខាភិបាល និងសិក្ខាកាមទាំងអស់ សូមឱ្យមន្ត្រីសុខាភិបាល និងសិក្ខាកាមទាំងអស់ប្រកាន់ខ្ជាប់នូវក្រមសីលធម៌វិជ្ជាជីវៈក្នុងការថែទាំ និងព្យាបាលអ្នកជំងឺ ដោយចាត់ទុកអ្នកជំងឺជាចម្បង ៕