ឯកឧត្តម សុខ ពុទ្ធិវុធ ណែនាំដល់រចនាសម្ព័ន្ធចំណុះ ស.ស.យ.ក. ខេត្តតាកែវ ទាំងអស់បន្តចូលរួមផ្សព្វផ្សាយឱ្យបានទូលំទូលាយពីការចូលរួមដោយស្ម័គ្រចិត្តនៅក្នុងមូលនិធិកសាងហេដ្ឋារចនាសម្ព័ន្ធតាមព្រំដែន
ភ្នំពេញ៖ នៅព្រឹកថ្ងៃអាទិត្យ ទី១ ខែកញ្ញា ឆ្នាំ២០២៤ ឯកឧត្តម សុខ ពុទ្ធិវុធ សមាជិកគណៈអចិន្ត្រៃយ៍គណៈកម្មាធិការកណ្តាលសហភាពសហព័ន្ធយុវជនកម្ពុជា និងជាប្រធានសហភាពសហព័ន្ធយុវជនកម្ពុជា ខេត្តតាកែវ បានអញ្ជើញដឹកនាំកិច្ចប្រជុំតាមដានវឌ្ឍនភាពការងារ និងផ្សព្វផ្សាយទិសដៅអនុវត្តចំពោះមុខរបស់សហភាពសហព័ន្ធយុវជនកម្ពុជា ខេត្តតាកែវ ដោយមានការអញ្ជើញចូលរួមពី ឯកឧត្តម លោកជំទាវ អនុប្រធាន សមាជិក សមាជិកាគណៈកម្មាធិការ ស.ស.យ.ក. ខេត្តតាកែវ លោកប្រធានគណៈកម្មាធិការ ស.ស.យ.ក. ក្រុង ស្រុកទាំង១០ ទូទាំងខេត្តតាកែវ និងក្រុមការងារ ស.ស.យ.ក. បម្រើការនៅតាមមន្ទីរអង្គភាពជុំវិញខេត្តតាកែវ តាមរយៈប្រព័ន្ធវីដេអូសន្និសីទ Zoom។
ថ្លែងក្នុងកិច្ចប្រជុំខាងលើនេះ ឯកឧត្ដមប្រធាន បានថ្លែងអំណរគុណដល់ថ្នាក់ដឹកនាំ សមាជិក សមាជិកា ស.ស.យ.ក. ខេត្តតាកែវ ទាំងអស់ ដែលបានចូលរួមដោយស្ម័គ្រចិត្តនៅក្នុងមូលនិធិកសាងហេដ្ឋារចនាសម្ព័ន្ធតាមព្រំដែនតាមរយៈសហភាពសហព័ន្ធយុវជនកម្ពុជា ក្រុមការងារ ខុទ្ទកាល័យ សម្ដេចមហាបវរធិបតីនាយករដ្ឋមន្រ្តី ដែលជាការផ្តល់ឱកាសឱ្យប្រជាពលរដ្ឋខ្មែរគ្រប់មជ្ឈដ្ឋាន ទាំងក្នុង និងក្រៅប្រទេស បានចូលរួមចំណែកដោយផ្ទាល់ជាមួយ រាជរដ្ឋាភិបាលនៅក្នុងបុព្វហេតុការពារ និងអភិវឌ្ឍជាតិ ក្នុងស្មារតីមហាសាមគ្គីជាតិខ្មែរ ដើម្បីថែរក្សា សុខសន្តិភាព អធិបតេយ្យ និងបូរណភាពទឹកដី ក៏ដូចជាការជំរុញការអភិវឌ្ឍ នៅតាមតំបន់ព្រំដែនឱ្យបានកាន់តែរឹងមាំ និងប្រកបដោយចីរភាព។
ជាមួយគ្នានេះដែរ ឯកឧត្ដមប្រធាន ក៏បានណែនាំដល់រចនាសម្ព័ន្ធចំណុះ ស.ស.យ.ក. ខេត្តតាកែវ ទាំងអស់បន្តចូលរួមផ្សព្វផ្សាយឱ្យបានទូលំទូលាយពីការចូលរួមដោយស្ម័គ្រចិត្តនៅក្នុងមូលនិធិកសាងហេដ្ឋារចនាសម្ព័ន្ធតាមព្រំដែន និងផ្សព្វផ្សាយពីអត្ថប្រយោជន៍ជាច្រើនដែលប្រទេសកម្ពុជាទទួលបានពីកិច្ចសហប្រតិបត្តិការតំបន់ត្រីកោណអភិវឌ្ឍន៍ កម្ពុជា ឡាវ វៀតណាម ដែលមូលដ្ឋានគ្រឹះមួយសម្រាប់ជំរុញការអភិវឌ្ឍជាតិមាតុភូមិកម្ពុជា ៕
