ឧបទ្ទវហេតុក្រឡាប់រថយន្តចូលក្នុងប្រឡាយទឹក ឆក់យកជីវិតមនុស្សចាស់ក្មេង៤នាក់ ក្នុងស្រុកត្រាំកក់
ភ្នំពេញ៖ យ៉ាងហោចណាស់មានមនុស្ស៤នាក់បានបាត់បង់ជីវិត ខណៈម្នាក់ទៀតរងរបួសធ្ងន់កំពុងស្ថិតក្នុងបន្ទប់សង្គ្រោះបន្ទាន់នៅមន្ទីរពេទ្យបង្អែកខេត្ត ក្រោយជួបឧបទ្ទវហេតុគ្រោះថ្នាក់ចរាចរណ៍រថយន្តរេចង្កូតក្រឡាប់ចូលក្នុងប្រឡាយទឹក កាលពីវេលាម៉ោង៧យប់ថ្ងៃទី៣១ ខែសីហា ឆ្នាំ២០២៤ នៅចំណុចលើផ្លូវជាតិលេខ១៣២ ស្ថិតក្នុងភូមិមហាសេនា ឃុំតាភេម ស្រុកត្រាំកក់ ខេត្តតាកែវ។
យោងតាមការបញ្ជាក់ពីមន្ត្រីជំំនាញ បានឱ្យដឹងថា រថយន្តរងគ្រោះម៉ាក តូយ៉ូតា ព្រុស ពណ៌ខៀវ ពាក់ស្លាកលេខ ភ្នំពេញ 2BF-0867 បើកបរពីទិសខាងលិចទៅខាងកេីត លុះមកដល់ចំណុចខាងលើ បានរេចង្កូតធ្លាក់ផ្លូវទៅបុកជាមួយក្បាលលូក្រឡាប់ធ្លាក់ចូលទឹកប្រឡាយពីខាងជើងផ្លូវ បណ្ដាលឱ្យមនុស្សចាស់ក្មេង៤នាក់ បានស្លាប់នៅនឹងកន្លែងកើតហេតុ។ ជនរងគ្រោះរួមមាន៖ ទី១.ឈ្មោះ នុត នាក់ចាន់ណា ភេទប្រុស អាយុ៣២ឆ្នាំ (ស្លាប់), ទី២.ឈ្មោះ ស៊ន សៀងលី ភេទស្រី អាយុ៨ឆ្នាំ ជាសិស្សសាលា (ស្លាប់), ទី៣.ឈ្មោះ គង់ ថៃ ភេទប្រុស អាយុ១៩ឆ្នាំ (ស្លាប់) អ្នកទាំងបីរស់នៅភូមិប្រវង់ ឃុំតាភេម ស្រុកត្រាំកក់ ខេត្តតាកែវ និងទី៤.ឈ្មោះ ប្រាក់ វីរះ ភេទប្រុស អាយុ៣៤ឆ្នាំ រស់នៅភូមិកន្ទោកជើង សង្កាត់កន្ទោក ខណ្ឌកំបូល រាជធានីភ្នំពេញ (ស្លាប់នៅមន្ទីរពេទ្យ) ដោយឡែក ជនរងគ្រោះជាកុមារាឈ្មោះ ស៊ន លីមីង អាយុ០៤ឆ្នាំ (រងរបួសធ្ងន់) រស់នៅភូមិប្រវង់ ឃុំតាភេម ស្រុកត្រាំកក់ ខេត្តតាកែវ។
ក្រោយពេលកើតហេតុ សពជនរងគ្រោះទាំង៤នាក់ត្រូវបានសមត្ថកិច្ចជំនាញធ្វើកំណត់ហេតុ និងប្រគល់ជូនសាច់ញាតិយកទៅធ្វើបុណ្យតាមប្រពែណីនៅឯស្រុកកំណើត ខណៈជនរងគ្រោះដែលនៅមានជីវិត ត្រូវបញ្ជូនទៅសង្គ្រោះនៅមន្ទីរពេទ្យបង្អែកក្រុងដូនកែវ។ ចំណែករថយន្ត ត្រូវបានសមត្ថកិច្ចស្ទូចយកមករក្សាទុកនៅអធិការដ្ឋាននគរបាលស្រុកត្រាំកក់ ៕
