ព្រៃផ្សៃណាស់! ផឹកស៊ីជាមួយគ្នាសុខៗ ក៏ទាស់សម្ដីគ្នា វាយសម្លាប់បុរសម្នាក់រួចធាក់ទម្លាក់ទឹកស្រះ បង្វែរសាច់រឿងទៅជាករណីលង់ទឹកស្លាប់
ភ្នំពេញ៖ ជនសង្ស័យ២នាក់ ត្រូវបានកម្លាំងកងរាជអាវុធហត្ថចាប់ខ្លួនពាក់ព័ន្ធករណីឃាតកម្មវាយសម្លាប់បុរសម្នាក់ ពោលគឺបន្ទាប់ពីធ្វើសកម្មភាពរួចពួកគេទាំង២នាក់ បានបង្វែរសាច់រឿងទៅជាករណីលង់ទឹកស្លាប់ ស្ថិតនៅចំណុចភូមិក្នុង ឃុំស្វាយជ្រុំ ស្រុករលាបៀរ កាលពីថ្ងៃទី១៥សីហា ឆ្នាំ២០២៤ កន្លងទៅ។
យោងតាមការបញ្ជាក់របស់កងរាជអាវុធហត្ថ បានឱ្យដឹងថា ប្រតិបត្តិការនេះ ធ្វើឡើងនៅថ្ងៃទី២០ ខែសីហា ឆ្នាំ២០២៤ ក្រោមបទបញ្ជាពីអភិបាលខេត្តកំពង់ឆ្នាំង បញ្ជាឱ្យកម្លាំងស៊ើបអង្កេតដឹកនាំដោយលោក ហង្ស សុជាតិ មេបញ្ជាការរងកងរាជអាវុធហត្ថខេត្ត បើកការស្រាវជ្រាវបន្ទាន់ ករណីខាងលើដែលដាក់ការសង្ស័យជាឃាតកម្ម ដោយប្រើរូបភាពជាលង់ទឹកស្លាប់យ៉ាងអាណោចអធម្ម ខណៈក្រុមគ្រួសារសពមិនអស់ចិត្ត ស្របជាមួយការសន្និដ្ឋានរបស់សមត្ថកិច្ចនគរបាលខេត្តកំពង់ឆ្នាំងផងដែរនោះ ការស៊ើបអង្កេតមួយត្រូវបានស្រាវជ្រាវជាសម្ងាត់។ មន្ត្រីកងរាជអាវុធហត្ថបានឱ្យដឹងបន្ថែមថា សមត្ថកិច្ចជំនាញបានដាក់ការសង្ស័យលើសព ដោយពិនិត្យឃើញក្បាលរបស់សពមានសភាពដាច់ស្លឹកត្រចៀក របួសរង្វង់ភ្នែក និងបែកជាំក្បាលពីខាងក្រោយហូរឈាមយ៉ាងខ្លាំង។
ក្រោយកម្លាំងជំនាញធ្វើការស្រាវជ្រាវយ៉ាងយកចិត្តទុកដាក់ កម្លាំងកងរាជអាវុធហត្ថខេត្តកំពង់ឆ្នាំង បានសម្រេចនាំខ្លួនជនសង្ស័យចំនួនពីរនាក់៖ ទី១.ឈ្មោះ ប៊ុត សំប៊ុន ហៅ កិ ភេទប្រុស និងទី២.ឈ្មោះ មាស កាក់ អ្នកទាំងពីរមានទីលំនៅភូមិក្នុង ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង មកទីបញ្ជាការកងរាជអាវុធហត្ថខេត្ត ដើម្បីសាកសួរ។ ក្រោយពីបានសាកសួរជាច្រើនម៉ោងនៅព្រឹកថ្ងៃទី២១សីហានេះ ជនដៃដល់ឈ្មោះ ប៊ុត សំប៊ុន ហៅកិ បានសារភាពថា ខ្លួនពិតជាបានវាយសម្លាប់ជនរងគ្រោះពិតប្រាកដមែន។ គួររម្លឹកថា កាលពីថ្ងៃកើតហេតុខាងលើ បើយោងតាមការបញ្ជាក់ពីអ្នកស្រី សុខ ពៅ ជាម្ចាស់ផ្ទះ ដែលបានឃើញហេតុការណ៍ បានឱ្យដឹងថា ជនសង្ស័យទាំង២នាក់ ព្រមទាំងជនរងគ្រោះ បាននាំគ្នាទិញស្រា-ស មកអង្គុយផឹកស៊ីក្រោមម្លប់ឈើក្បែរផ្ទះរបស់គាត់ ហើយក៏មិនបានហាមឃាត់អ្វីដែរ ព្រោះថាក្រុមបុរសទាំងនោះធ្លាប់ផឹកស៊ីកន្លែងនេះជាញឹកញាប់ទៅហើយ។
ការផឹកស៊ីនោះ បានអូសបន្លាយរហូតដល់ម៉ោងប្រហែល១០ទៅ១១យប់ ក៏ឃើញទិញស្រាមកផឹកជាបន្តបន្ទាប់ អ្នកស្រីក៏បានចូលទៅសម្រាកក្នុងផ្ទះបាត់ទៅ ស្រាប់តែមួយសន្ទុះក្រោយមក គាត់ក៏បានឮសំឡេងស្រែកអូយៗ គាត់ក៏រត់ចេញពីក្នុងផ្ទះមកមើលស្រាប់តែឃើញឈ្មោះ ប៊ុត សំប៊ុន ហៅ កិ កំពុងធ្វើសកម្មភាពវាយទៅលើឈ្មោះ ប្រាក់ សុម៉ាលី ហៅជុយ និងរុញទម្លាក់ទឹកស្រះ ហើយបានហក់ទៅវ៉ៃក្នុងទឹកថែមទៀត ឃើញដូច្នេះ គាត់មានការភិតភ័យយ៉ាងខ្លាំង គាត់ក៏រត់ចូលទៅក្នុងផ្ទះវិញ ឱបកូនមិនឱ្យស្រែកខ្លាចក្រែងជនដៃដល់មកវាយធ្វើបាបរូបគាត់ដែរ។ លុះរហូតដល់ម៉ោងប្រហែលជា ៣រសៀលថ្ងៃដដែល ក៏មានការភ្ញាក់ផ្អើលដល់កម្លាំងប្រជាការពារភូមិ អាជ្ញាធរ សមត្ថកិច្ច និងក្រុមគ្រួសារ បានមកចុះរាវរកជនរងគ្រោះក្នុងស្រះទឹកក្រោយផ្ទះអ្នកស្រី ស្រាប់តែប្រទះឃើញសាកសពលោក ប្រាក់ សុម៉ាលី ហៅជុយ ស្លាប់បាត់ទៅហើយ។
បច្ចុប្បន្ន ជនសង្ស័យរួមទាំងវត្ថុតាង កម្លាំងជំនាញកំពុងធ្វើការសាកសួរ និងកសាងសំំណុំរឿងបញ្ចូនបន្តទៅកាន់តុលាការចាត់ការបន្តតាមនីតិវិធីច្បាប់ ៕
