ឯកឧត្តម ឈា ប៊ុនរិទ្ធ អញ្ជើញចុះពិនិត្យវឌ្ឍនភាពគម្រោងហេដ្ឋារចនាសម្ព័ន្ធសាធារណៈប្រព័ន្ធស្រោចស្រព កញ្ចប់ទី១ នៃគម្រោងពិពិធកម្មកសិកម្មកម្ពុជា ក្នុងខេត្តកំពង់ចាម
ភ្នំពេញ៖ ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការ អមដំណើរដោយឯកឧត្តមទីប្រឹក្សាក្រសួង លោកអគ្គនាយករងនៃអគ្គនាយកដ្ឋានកិច្ចការបច្ចេកទេស លោកប្រធានមន្ទីរធនធានទឹក និងឧតុនិយមខេត្តកំពង់ចាម និងមន្រ្តីនៃក្រុមការងារអនុវត្តគម្រោងពិពិធកម្មកសិកម្មកម្ពុជា(PIU-CASDP) បានអញ្ជើញចុះពិនិត្យវឌ្ឍនភាពការងារសាងសង់គម្រោងហេដ្ឋារចនាសម្ព័ន្ធសាធារណ:ប្រព័ន្ធស្រោចស្រព កញ្ចប់ទី១ នៃគម្រោងពិពិធកម្មកសិកម្មកម្ពុជា (CASDP) ដែលទទួលហិរញ្ញប្បទានពីធនាគារពិភពលោក (WB) នៅសហគមន៍កសិកម្មអភិវឌ្ឍន៍មូលដ្ឋានយើង ដែលមានទីតាំងស្ថិតក្នុងភូមិស្តុកធំ ឃុំតាំងក្រសាំង ស្រុកបាធាយ ខេត្តកំពង់ចាម។
ឯកឧត្តមរដ្ឋលេខាធិការប្រចាំការបានបញ្ជាក់ឱ្យដឹងថា គម្រោងនេះបានចាប់ផ្តើមសាងសង់នៅថ្ងៃទី៥ ខែកក្កដា ឆ្នាំ២០២៤ ហើយគ្រោងនឹងបញ្ចប់ក្នុងរយៈពេល ៦ខែ។ គិតរហូតមកដល់ពេលនេះ ការងារសាងសង់សម្រេចបានប្រមាណ ២៦% លើផែនការដែលបានគ្រោងទុក។
ទន្ទឹមនឹងនេះ ឯកឧត្តមរដ្ឋលេខាធិការប្រចាំការបានបញ្ជាក់បន្ថែមថា ក្រសួងធនធានទឹក និងឧតុនិយម ដែលជាអង្គភាពអនុវត្តគម្រោងក្នុងសមាសធាតុទី២ នៃគម្រោងពិពិធកម្មកសិកម្មកម្ពុជា ទទួលបន្ទុកអនុវត្តលើការងារកែលម្អហេដ្ឋារចនាសម្ព័ន្ធសាធារណៈ តាមរយៈការធ្វើឱ្យប្រសើរឡើងនូវប្រព័ន្ធស្រោចស្រពក្រៅកសិដ្ឋាន។
សូមបញ្ជាក់ថា ការអនុវត្តការងារសាងសង់គម្រោងហេដ្ឋារចនាសម្ព័ន្ធសាធារណៈប្រព័ន្ធស្រោចស្រពក្រៅកសិដ្ឋាន កញ្ចប់ទី១ បានធ្វើឡើងនៅ ២ទីតាំងផ្សេងគ្នា គឺក្នុងខេត្តស្ទឹងត្រែង និងខេត្តកំពង់ចាម ដែលរួមមានគម្រោងការធ្វើឱ្យប្រសើរឡើងប្រព័ន្ធបូមទឹកក្រោមដីដោយប្រើថាមពលពន្លឺព្រះអាទិត្យ សម្រាប់សហគមន៍កសិកម្មព្រះរំកិល ស្ថិតក្នុងភូមិក្រឡាពាស ឃុំព្រះរំកិល ស្រុកបុរីអូរស្វាយសែនជ័យ ខេត្តស្ទឹងត្រែង និងគម្រោងការធ្វើឱ្យប្រសើរឡើងនូវស្រះទឹកសហគមន៍ ដោយបំពាក់នូវប្រព័ន្ធបូមទឹកក្រោមដីប្រើថាមពលពន្លឺព្រះអាទិត្យសម្រាប់សហគមន៍កសិកម្ម អភិវឌ្ឍន៍មូលដ្ឋានយើង ស្ថិតក្នុងភូមិស្តុកធំ ឃុំតាំងក្រសាំង ស្រុកបាធាយ ខេត្តកំពង់ចាម។
ឆ្លៀតក្នុងឱកាសនោះដែរ ឯកឧត្តមរដ្ឋលេខាធិការប្រចាំការ ក៏បានអញ្ជើញចុះពិនិត្យវឌ្ឍនភាពការងារអន្តរាគមន៍ស្តារប្រឡាយចំនួន ២ខ្សែ ដែលមានប្រវែងសរុប ១៥០៥ម៉ែត្រ ដើម្បីទាញយកទឹកពីអាងទឹកឆា ជួយសង្គ្រោះស្រូវវស្សាប្រមាណ ១៣២ហិកតា ដែលកំពុងជួបបញ្ហាខ្វះទឹកស្រោចស្រព ស្ថិតក្នុងស្រុកជើងព្រៃ។
សូមជម្រាបថា ការងារស្តារប្រឡាយ ២ខ្សែនេះគឺ៖ ខ្សែទី១ មានប្រវែង ៣០៥ម៉ែត្រ ស្ថិតនៅឃុំសំពងជ័យ ស្រុកជើងព្រៃ សម្រេចបាន ១០០% ដើម្បីជួយសង្គ្រោះវស្សាចំនួន ២០ហិកតា និងខ្សែទី២ មានប្រវែង ១២០០ម៉ែត្រ ស្ថិតនៅឃុំត្រពាំងគរ ស្រុកជើងព្រៃ សម្រេចបាន ១០០% ដើម្បីជួយសង្គ្រោះស្រូវវស្សាចំនួន ១១២ហិកតា៕
