ស្រូវជាង ៣ពាន់ហិកតា នៅខេត្តព្រៃវែងជួបបញ្ហាគ្រោះរាំងស្ងួត ខណៈអាជ្ញាធរបើកទ្វារទឹកប្រឡាយវ៉ៃគោជំហាន១ ដើម្បីសង្គ្រោះ
ភ្នំពេញ៖ មន្ទីរធនធានទឹកខេត្តព្រៃវែង នឹងបើកទ្វារទឹកតាមប្រព័ន្ធប្រឡាយវ៉ៃគោជំហាន១ ជាបណ្ដើរៗ ដើម្បីបញ្ជូនទឹកទៅកាន់តំបន់ដែលជួបប្រទះភាពរាំងស្ងួតប្រឈមនឹងការខ្វះទឹក។ ក្រោយពិនិត្យឃើញស្រូវរបស់ប្រជាកសិករក្នុងខេត្តព្រៃវែង និងខេត្តស្វាយរៀង ៣៤៣៧ហិកតា កំពុងជួបបញ្ហារាំងស្ងួត។ ។
ក្រសួងបញ្ជាក់ថា នៅថ្ងៃទី១៥ ខែសីហា ឆ្នាំ២០២៤ ឯកឧត្ដម តន់ វ៉ាន់ថារ៉ា រដ្ឋលេខាធិការ និងជាប្រធានក្រុមសម្របសម្រួលការងារគ្រប់គ្រងធនធានទឹក និងឧតុនិយមប្រចាំខេត្តស្វាយរៀង រួមជាមួយមន្ត្រីពាក់ព័ន្ធ បានចុះពិនិត្យស្ថានភាពប្រភពទឹកទន្លេតូច ស្ថិតក្នុងភូមិសាស្ត្រខេត្តកំពង់ចាម និងខេត្តព្រៃវែង។ ការចុះពិនិត្យស្ថានភាពទឹកទន្លេតូចនោះ គឺដើម្បីបើកទ្វារទឹកឱ្យហូរកាត់តាមប្រព័ន្ធប្រឡាយវ៉ៃគោជំហាន១ មកជួយសង្គ្រោះស្រូវនៅប៉ែកខាងក្រោមក្នុងខេត្តព្រៃវែង និងបន្តហូរចូលតាមប្រព័ន្ធប្រឡាយកូនភ្លោះ និងអាងទឹកកំពង់ជ្រៃ ដើម្បីជួយសង្គ្រោះស្រូវក្នុងខេត្តស្វាយរៀង ស្រុកស្វាយជ្រំ ចំនួន៧ឃុំ ស្មើនឹង៣១០២គ្រួសារ។
ជាលទ្ធផល មន្ទីរធនធានទឹក និងឧតុនិយមខេត្តព្រៃវែង នឹងបើកទ្វារទឹកតាមប្រព័ន្ធប្រឡាយវ៉ៃគោជំហាន១ ជាបណ្ដើរៗ ដើម្បីបញ្ជូនទឹកទៅកាន់តំបន់ដែលជួបប្រទះភាពរាំងស្ងួតប្រឈមនឹងការខ្វះទឹក។ ក្រោយពិនិត្យឃើញ ស្រូវមួយចំនួនក្នុងខេត្តព្រៃវែង និងខេត្តស្វាយរៀង ស្រុកស្វាយជ្រំប្រឈមការខ្វះទឹក។ ឃុំទាំងនោះរួមមាន៖ ឃុំស្វាយយាឃុំក្រោលគោ ឃុំស្វាយធំ ឃុំឈើទាល ឃុំគ្រួស ឃុំចំបក់ និងឃុំចំឡង សរុបប្រមាណ ៣៤៣៧ហិកតា កំពុងជួបបញ្ហារាំងស្ងួតហើយនឹងប្រឈមស្ថានភាពខ្វះទឹក ប្រសិនបើមិនមានភ្លៀងធ្លាក់ក្នុងរយៈពេល១សប្តាហ៍ទៀត។ គួរជម្រាបថា ការងារបង្កបង្កើនផលស្រូវរដូវវស្សារបស់ប្រជាកសិករនៅតាមបណ្ដាក្រុង ស្រុក នៅក្នុងខេត្តស្វាយរៀងក្នុងឆ្នាំនេះ មានចំនួនសរុបបាន១៤ម៉ឺន៣៦៨១ហិកតា ស្មើនឹង៨៥,៧៨ភាគរយនៃផែនការគ្រោង ចំនួន១៦ម៉ឺន៧៥០០ហិកតា៕
