ឧត្តមសេនីយ៍ទោ ឈុន ម៉ៅ អញ្ជើញបើកវគ្គហ្វឹកហ្វឺនពង្រឹងអង្គភាព តំបន់ប្រតិបត្តិការសឹករងបន្ទាយមានជ័យ ឆ្នាំ២០២៤

ភ្នំពេញ៖ នៅថ្ងៃទី១៥ ខែសីហា ឆ្នាំ២០២៤ ឧត្តមសេនីយ៍ទោ ឈុន ម៉ៅ មេបញ្ជាការរង យោធភូមិភាគទី៥ មេបញ្ជាការ ទិសទី១ បានអញ្ជើញជាអធិបតី ក្នុងពីធីបើកវគ្គហ្វឹកហ្វឺនពង្រឹងអង្គភាព តំបន់ប្រតិបត្តិការសឹករងបន្ទាយមានជ័យ ឆ្នាំ២០២៤។

វគ្គហ្វឹកហ្វឺនពង្រឹងអង្គភាព តំបន់ប្រតិបត្តិការសឹករងបន្ទាយមានជ័យ ឆ្នាំ២០២៤ មានរយៈពេលសិក្សា ចំនួន ៩១ថ្ងៃ និងសិក្ខាកាម ចំនួន ៨០នាក់។

ឧត្តមសេនីយ៍ទោ ឈុន ម៉ៅ មានប្រសាសន៍ថា វគ្គហ្វឹកហ្វឺនពង្រឹងអង្គភាព តំបន់ប្រតិបត្តិការសឹករងបន្ទាយមានជ័យ ឆ្នាំ២០២៤ ដែលប្រារព្ធបើកនាថ្ងៃនេះ ពិតជាមានសារសំខាន់ណាស់ សម្រាប់ការកសាងធនធានមនុស្ស ពង្រឹងសមត្ថភាព គុណភាព ការទទួលខុសត្រូវ និងសក្តានុពលការពារជាតិ ព្រមទាំងសកម្មភាពប្រចាំថ្ងៃរបស់កងទ័ពក្នុងការបំពេញភារកិច្ច ការបង្កើនប្រសិទ្ធភាព ទាំងចំណេះដឹង និងចំណេះធ្វើពិតប្រាកដ ធានាបាននូវប្រសិទ្ធភាព និងសមត្ថភាពខ្ពស់ក្នុងការបំពេញភារកិច្ច។

ឧត្តមសេនីយ៍ទោ មេបញ្ជាការរងយោធភូមិភាគទី៥ មេបញ្ជាការទិសទី១ បានផ្តាំផ្ញើដល់សិក្ខាកាមទាំងអស់ត្រូវខិតខំប្រឹងប្រែងរៀនសូត្រក្រេបជញ្ជក់យកចំណេះដឹងដែលគ្រូឧទ្ទេសនាមបានឡើងថ្នាក់ និងបង្កបរិយាកាសឲ្យមានភាពរស់រវើក ដើម្បីពេលបញ្ចប់វគ្គបានទទួលប័ណ្ណសរសើរ និងលិខិតសរសើរ ជាពិសេស កម្មសិក្សាការីទាំងអស់ត្រូវស្មោះត្រង់ការពារ ជាតិ សាសនា ព្រះមហាក្សត្រ រាជរដ្ឋាភិបាលស្របច្បាប់ និងប្រឆាំងដាច់ខាតចំពោះក្រុមជ្រុលនិយមមួយចំនួនដែលមាននិន្នាការប្រឆាំងនូវសុខសន្តិភាព។

ចុងបញ្ចប់ ឧត្តមសេនីយ៍ទោ ឈុន ម៉ៅ ក៏បានប្រកាសបើកវគ្គចាប់ពីថ្ងៃនេះតទៅ និងឧបត្ថម្ភដល់វគ្គហ្វឹកហ្វឺន ចំនួន ២.០០០.០០០រៀល ផងដែរ៕