អគ្គនាយក ប.ស.ស. ជំរុញឱ្យមានការផ្ញើសារដាស់តឿន ឬរំលឹកពាក់ព័ន្ធនឹងការបង់ភាគទានយឺតយ៉ាវមក ប.ស.ស. មុននឹងអនុវត្តការពិន័យតាមនីតិវិធីច្បាប់

ភ្នំពេញ៖ ក្នុងឱកាសដឹកនាំកិច្ចប្រជុំផ្ទៃក្នុងប្រចាំខែ របស់ បេឡាជាតិសន្ដិសុខសង្គម នាព្រឹកថ្ងៃទី១៥ ខែសីហា ឆ្នាំ២០២៤ នេះ ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ បានថ្លែងថា៖ ដើម្បីបង្កភាពងាយស្រួលដល់សាធារណជន ម្ចាស់សហគ្រាស ឬគ្រឹះស្ថាន ក្នុងការផ្ដល់សេវាតាមប្រព័ន្ធបច្ចេកវិទ្យា ប.ស.ស. បានរៀបចំការចុះបញ្ជីបុគ្គលិក និងការបង់ភាគទានតាមរយៈប្រព័ន្ធអនឡាញ ហើយជាពិសេសបុគ្គលស្វ័យនិយោជន៍ និងអ្នកក្នុងបន្ទុក ក៏អាចចុះឈ្មោះតាមរយៈកម្មវិធីទូរស័ព្ទដៃ NSSF Member បានផងដែរ។

ឯកឧត្តមប្រតិភូរាជរដ្ឋាភិបាល បានបន្តថា ទន្ទឹមនឹងការផ្ដល់ភាពងាយស្រួលក្នុងការចុះបញ្ជី និងបង់ភាគទាន តាមប្រព័ន្ធបច្ចេកវិទ្យានេះ នាយកដ្ឋានជំនាញត្រូវបន្តតាមដានចំពោះសហគ្រាស គ្រឹះស្ថាន ឬសមាជិក ប.ស.ស. ដែលបានចុះបញ្ជីរួច ប៉ុន្ដែភ្លេចបង់ភាគទាន ឬបង់ភាគទានមានការយឺតយ៉ាវ ត្រូវមានយន្ដការរំលឹក ដាស់តឿន តាមរយៈការទាក់ទងតាមប្រព័ន្ធទូរស័ព្ទ ការផ្ញើសារ ឬចេញលិខិតដោយផ្ទាល់ ដើម្បីជូនដំណឹង មុននឹងអនុវត្តការពិន័យ ឬដាក់ពាក្យបណ្ដឹងតាមនីតិវិធីច្បាប់។

ឯកឧត្តមប្រតិភូរាជរដ្ឋាភិបាល បានបន្ថែមទៀតថា នាយកដ្ឋានជំនាញត្រូវធ្វើការសិក្សាលើយន្តការជម្រើសក្នុងការបង់ភាគទានជាប្រចាំឆ្នាំ ឬជាប្រចាំឆមាស ឬជាស្វ័យប្រវត្តិកម្ម តាមកម្មវិធីធនាគារ ដើម្បីបង្កលក្ខណៈងាយស្រួលក្នុងការបង់ភាគទាន ជៀសវាងការភ្លេច ឬយឺតយ៉ាវ ក្នុងប្រការណាមួយ។

សូមបញ្ជាក់ថា៖ កិច្ចប្រជុំផ្ទៃក្នុងប្រចាំខែ នាព្រឹកនេះ ប្រព្រឹត្តទៅនៅសាលប្រជុំសន្ដិភាព ស្នាក់ការកណ្ដាល ប.ស.ស. រាជធានីភ្នំពេញ ដោយមានវត្តមានចូលរួមពីអគ្គនាយករង ប្រធាន/អនុប្រធាននាយកដ្ឋាន ប្រធាន/អនុប្រធានការិយាល័យដោយផ្ទាល់ និងប្រធាន/អនុប្រធានសាខា ប.ស.ស. ទូទាំងប្រទេស តាមប្រព័ន្ធអនឡាញ សរុបប្រមាណជា៤០០រូប៕