អ្នកនាំពាក្យក្រសួងសាធារណការ ផ្តល់ទស្សនទាន ៣ចំណុច លេីការផ្សាយរបស់សារព័ត៌មានក្រៅស្រុកនិយាយពី «ព្រែកជីកហ្វូណនតេជោ»

ភ្នំពេញ៖ ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន បានផ្តល់ទស្សនទានចំនួន ៣ចំណុច លេីការផ្សាយរបស់សារព័ត៌មានក្រៅស្រុកនិយាយភាសាខ្មែរ ដែលបានចុះផ្សាយ ដកស្រង់ប្រសាសន៍មន្ត្រីជាន់ខ្ពស់វៀតណាម ដែលមានសុទិដ្ឋនិយមចំពោះគម្រោងផ្លូវនាវាចរ «ព្រែកជីកហ្វូណនតេជោ» របស់កម្ពុជា។

ឯកឧត្តម ផន រឹម បានបញ្ជាក់ថា ប៉ុន្មានថ្ងៃថ្មីៗនេះ មានសារព័ត៌មានមួយចំនួនបានចាប់អារម្មណ៍ និងដកស្រង់ប្រសាសន៍មន្ត្រីជាន់ខ្ពស់វៀតណាម ដែលមានសុទិដ្ឋនិយមចំពោះគម្រោងផ្លូវនាវាចរ«ព្រែកជីកហ្វូណនតេជោ»របស់កម្ពុជា។

សារព័ត៌មានក្រៅស្រុកនិយាយភាសាខ្មែរបានចុះផ្សាយជាហូរហែថា «វៀតណាមគាំទ្រគម្រោងរបស់កម្ពុជា ក្នុងការជីកព្រែកហ្វូណនតេជោ ពីតំបន់អាងទន្លេមេគង្គទៅកាន់ឆ្នេរសមុទ្រកម្ពុជា ហើយប្រាថ្នាចង់ចូលរួមស្វែងរកដំណោះស្រាយ ចំពោះផលប៉ះពាល់អវិជ្ជមានដែលអាចមានពីព្រែកជីកនេះ»។

ពាក់ព័ន្ធនឹងករណីនេះក្នុងនាមអ្នកនាំពាក្យក្រសួងសាធារណការ និងដឹកជញ្ជូន ឯកឧត្តម ផន រឹម បានផ្តល់ទស្សនទានចំនួន ៣ចំណុចដូចជា៖

ទី១៖ សំណើរបស់វៀតណាមនេះ គឺជាការចាប់អារម្មណ៍របស់ប្រទេសដែលជាសមាជិក១ នៃគណៈកម្មការទន្លេមេគង្គ កម្ពុជា សូមថ្លែងអំណរគុណដល់ប្រទេសវៀតណាម ដែលបានគាំទ្រគម្រោងព្រែកជីកហ្វូណនតេជោនេះ។

ទី២៖ កម្ពុជាបានប្តេជ្ញាចិត្តខ្ពស់ក្នុងការអនុវត្តតួនាទីរបស់ខ្លួនស្របតាមស្មារតីកិច្ចព្រមព្រៀងមេគង្គឆ្នាំ១៩៩៥ ហើយកម្ពុជាបានយកគោលការណ៍កិច្ចសហប្រតិបត្តិការគ្នារវាងប្រទេសដែលជាសមាជិកគណៈកម្មការទន្លេមេគង្គ ជាអាទិភាពគន្លឹះ។

ទី៣៖ ការអនុវត្តទៅតាមសំណើផ្សេងៗនៃប្រទេសដែលជាសមាជិករបស់គណៈកម្មការទន្លេមេគង្គ នឹងត្រូវអនុឡោមទៅតាមកិច្ចព្រមព្រៀងមេគង្គឆ្នាំ១៩៩៥ និងនីតិវិធីពាក់ព័ន្ធនានាដែលនៅមានជាធរមាន។

ឯកឧត្តម ផន រឹម បានបញ្ជាក់ទៀតថា ជារួមកម្ពុជាបានអនុវត្តពេញលេញ ស្របតាមស្មារតីនៃកិច្ចព្រមព្រៀង និងនីតិវិធីនានាដែលមានជាធរមាន របស់គណៈកម្មការទន្លេមេគង្គ ដែលរាប់បញ្ចូលការពង្រឹងកិច្ចសហប្រតិបត្តិការ និងការធានាឱ្យបាននូវការអភិវឌ្ឍប្រកកបដោយចីរភាពនៃអាងទន្លេមេគង្គ ជាពិសេសថែមទៀតនោះ កម្ពុជាមានស្មារតីទទួលខុសត្រូវខ្ពស់ ហើយតម្កល់ស្មារតីនៃឯករាជ្យភាព អធិបតេយ្យភាព និងកិច្ចសហប្រតិបត្តិការជាមូលដ្ឋានគ្រឹះនៃការអនុវត្តគម្រោងនេះ ហើយបានខិតខំប្រឹងប្រែងកាត់បន្ថយ និងជៀសវាងជាអតិបរិមាលើផលប៉ះពាល់ជាអវិជ្ជមាននានាទាំងនៅក្នុងក្របខណ្ឌក្នុងប្រទេស និងឆ្លងដែន។

កម្ពុជាបានធ្វើការសិក្សាលម្អិត និងគ្រប់ជ្រុងជ្រោយ ហើយលទ្ធផលបានបង្ហាញថា គម្រោងនេះជាគម្រោងដែលមានប្រសិទ្ធិភាពសេដ្ឋកិច្ចខ្ពស់ ហើយមិនបង្ករឱ្យមានផលប៉ះពាល់អវីជ្ជមានលើរំហូរទឹក ប្រព័ន្ធអេកូឡូស៊ី និង បរិស្ថាន ក្នុងអាងទន្លេមេគង្គនោះឡើយ ៕