មនុស្ស ១១នាក់បានស្លាប់បន្ទាប់ពីភ្លើងឆេះអគារក្នុងទីក្រុងម៉ានីល ប្រទេសហ្វីលីពីន
ម៉ានីល៖ អាជ្ញាធរបានបញ្ជាក់ថា យ៉ាងហោចណាស់មនុស្ស ១១នាក់បានស្លាប់ បន្ទាប់ពីអគ្គីភ័យបានឆាបឆេះកាលពីព្រឹកថ្ងៃសុក្រ នៅក្នុងអគារពាណិជ្ជកម្ម និងលំនៅដ្ឋានកម្រិតប្រាំមួយក្នុងទីក្រុងម៉ានីល ក្នុងរដ្ឋធានីហ្វីលីពីន។
លោក Nelson Ty សមាជិកក្រុមប្រឹក្សាភូមិ បានឲ្យដឹងថា ការិយាល័យការពារអគ្គីភ័យ បានបញ្ជាក់ប្រាប់គាត់ថា មនុស្សចំនួន ១១នាក់បានស្លាប់ បន្ទាប់ពីពួកគេបានជាប់នៅខាងក្នុងអាគារ ដោយសារភ្លើងដែលបានឆាបឆេះមុនម៉ោង៧និង៣០នាទីព្រឹក ម៉ោងក្នុងស្រុក។ រថយន្តពន្លត់អគ្គិភ័យបានចំណាយពេល២ម៉ោងដើម្បីពន្លត់។
លោក Ty បានបន្ថែមថា ក្នុងចំណោមអ្នកស្លាប់មានប្រពន្ធរបស់ម្ចាស់អគារ ដែលសាកសពត្រូវបានរកឃើញនៅជាន់ទី៣។
សន្តិសុខអគារម្នាក់បានប្រាប់អ្នកសារព័ត៌មាននៅកន្លែងនោះថា ធុងសាំងរាវក្នុងអាហារដ្ឋាននៅជាន់ទីមួយបានផ្ទុះបណ្តាលឱ្យមានភ្លើងឆេះ។
ទោះយ៉ាងណាការិយាល័យដែលកំពុងធ្វើការស៊ើបអង្កេតនៅមិនទាន់បញ្ជាក់ពីមូលហេតុនៃការឆេះដ៏សន្ធោសន្ធៅនេះនៅឡើយទេ។
