កម្ពុជា-ហ្វីលីពីន នប្តេជ្ញាបន្តលើកកម្ពស់កិច្ចសហប្រតិបត្តិប្រទេសទ្វេភាគី ដើម្បីនាំមកនូវផលប្រយោជន៍ ដល់ពលរដ្ឋប្រទេសទាំងពីរ និងតំបន់ រួមទាំងសកលលោក
ភ្នំពេញ៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នៅព្រឹកថ្ងៃទី៣០ ខែកក្កដា ឆ្នាំ២០២៤ បានទទួលជួបពិភាក្សាការងារជាមួយ លោកជំទាវ ផ្លេរីដា អាន កាមីល ប៉េ ម៉ាយ៉ូ (Flerida Ann Camille P. Mayo) ឯកអគ្គរដ្ឋទូតហ្វីលីពីន ប្រចាំនៅកម្ពុជា នៅវិមានរដ្ឋសភា។
នៅក្នុងជំនួបនេះ សម្តេចប្រធានរដ្ឋសភា និងលោកជំទាវឯកអគ្គរដ្ឋទូត បានលើកឡើងពីទំនាក់ទំនងដ៏ល្អរវាងកម្ពុជា និងហ្វីលីពីន ទាំងស្ថាប័នរដ្ឋសភា រដ្ឋាភិបាល និងទំនាក់ទំនងរវាងប្រជាជន និងប្រជាជន។
ភាគីទាំងពីរបានបានប្តេជ្ញាចិត្តយ៉ាងមោះមុត បន្តលើកកម្ពស់កិច្ចសហប្រតិបត្តិការប្រទេសទាំងពីរឱ្យកាន់តែទូលំទូលាយដើម្បីនាំមកនូវផលប្រយោជន៍ជូនប្រជាពលរដ្ឋកម្ពុជា និងហ្វីលីពីន ក៏ដូចជាការរួមចំណែកដល់ការសម្រេចបាននូវគោលដៅជោគវាសនារួមរបស់អាស៊ាន និងការធានាបាននូវសុខសន្តិភាព ស្ថិរភាព និងការអភិវឌ្ឍប្រកបដោយចីរភាព ដល់តំបន់ និងសកលលោកផងដែរ។
សម្តេចរដ្ឋសភាធិបតីបានគូសបញ្ជាក់ថា វត្តមានរបស់លោកជំទាវឯកអគ្គរដ្ឋទូតនៅកម្ពុជានាពេលនេះ ចំពេលដែលកម្ពុជាបានកំពុងឆ្លងកាត់នៅរបត់ថ្មីជាប្រវត្តិសាស្រ្តមួយនៃការផ្ទេរការដឹកនាំប្រទេសពីឥស្សរជនជំនាន់មុនមកឥស្សរជនបន្តវេន តាមរយៈការបោះឆ្នោតថ្នាក់ជាតិឆ្នាំ២០២៣ កន្លងទៅ ដែលមានប្រជាពលរដ្ឋយ៉ាងច្រើនលើសលប់ ចំនួនជាង៨៤% បានចេញទៅបោះឆ្នោតជ្រើសរើសថ្នាក់ដឹកនាំ ដែលមានគណបក្សចំនួន១៨ ចូលរួមប្រកួតប្រជែង។ ជាលទ្ធផលពលរដ្ឋបានបោះឆ្នោតជូនគណបក្សប្រជាជនកម្ពុជាជាង ៨២% និងមានគណបក្សចំនួនពីរទទួលបានអាសនៈក្នុងរដ្ឋសភា។
លទ្ធផលបោះឆ្នោតជាប្រវត្តិសាស្រ្តនេះបានធ្វើឱ្យសម្តេចតេជោ ហ៊ុន សែន ស្ថាបនិកមគ្គទេសក៍ឯកនៃសន្តិភាព និងជាប្រតិបត្តិករនៃនយោបាយឈ្នះ-ឈ្នះរបស់កម្ពុជា បានសម្រេចចិត្តប្រកបដោយគតិបណ្ឌិត ក្នុងការផ្ទេរការដឹកនាំប្រទេសជូនឥស្សរជនបន្តវេន មាន សម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី និងដែលមានសមាសភាពគណៈរដ្ឋមន្រ្តី ភាគច្រើនជាយុវជន មានទាំងចំណេះដឹង ឆន្ទៈ និងសីលធម៌ ដើម្បីធានាការពារនូវសុខសន្តិភាព និងការអភិវឌ្ឍជូនប្រជាពលរដ្ឋ ក្នុងរយៈពេលយូរអង្វែងតទៅ។
សម្តេចរដ្ឋសភាធិបតី បានគូសបញ្ជាក់ថា ទំាងរាជរដ្ឋាភិបាល និងរដ្ឋសភានីតិកាលទី៧នេះ បានផ្តល់អាទិភាពលើការភ្ជាប់ទំនាក់ទំនង និងកិច្ចសហប្រតិបត្តិការជាមួយបណ្តាប្រទេសនានា ទាំងក្នុងតំបន់ និងអន្តរជាតិ ដើម្បីនាំមកនូវសេចក្តីសុខ និងការរីកចម្រើនជូនប្រទេសជាតិ និងសកលលោក។ សម្តេចប្រធានរដ្ឋសភា បានគាំទ្រជំនួបទ្វេភាគីរវាងសម្តេចមហាបវរធិបតី ហ៊ុន ម៉ាណែត ជាមួយ ឯកឧត្តមប្រធានាធិបតីហ្វីលីពីន នៅប្រទេសអូស្រ្តាលី កាលពីពេលថ្មីៗ ក៏ដូចជាគាំទ្រដល់គណៈកម្មការចម្រុះសម្រាប់កិច្ចសហប្រតិបត្តិការ នៃប្រទេសទាំងពីរ (JCBC) ដែលបានបង្កើតឡើងកាលពីឆ្នាំ២០០០ ដើម្បីពង្រឹងពង្រីកកិច្ចសហប្រតិបត្តិការលើគ្រប់វិស័យ។
សម្តេចប្រធានរដ្ឋសភា បានវាយតម្លៃខ្ពស់ចំពោះជំនួបរវាងសម្តេចធិបតី ហ៊ុន ម៉ាណែត និងលោកជំទាវទូតហ្វីលីពីន ដែលបានជំរុញឱ្យមានជើងហោះហើរត្រង់កម្ពុជា និងហ្វីលីពីន និងការនាំអង្ករ និងផលិតផលកសិកម្មពីកម្ពុជា ទៅកាន់ប្រទេសហ្វីលីពីនឱ្យបានកាន់តែច្រើនឡើង។ សម្តេចក៏បានអរគុណដល់រដ្ឋាភិបាលហ្វីលីពីន ដែលបានផ្តល់អាហារូបករណ៍ដល់និស្សិតកម្ពុជា និងផ្តល់ជំនួយសង្គមនានាដល់កម្ពុជា។
លោកជំទាវឯកអគ្គរដ្ឋទូតហ្វីលីពីន បានថ្លែងអំណរគុណយ៉ាងជ្រាលជ្រៅជូនសម្តេចប្រធានរដ្ឋសភា ដែលបានចំណាយពេលវេលាទទួលជួបពិភាក្សាការងារនាឱកាសនេះ។ លោកជំទាវ ក៏បានសម្តែងនូវការអរគុណចំពោះរដ្ឋសភាកម្ពុជា ដែលបានបញ្ជូនគណៈប្រតិភូទៅចូលរួមកិច្ចប្រជុំប្រចាំឆ្នាំ នៃវេទិកាសភាអាស៊ី-ប៉ាស៊ីហ្វិកលើកទី៣១ (APPF-31) ដែលជាការបង្ហាញនូវការគាំទ្រ និងពង្រឹងទំនាក់ទំនងឱ្យកាន់តែជិតស្និទ្ធរវាងបណ្តាប្រទេសអាស៊ាន។ ជាមួយគ្នានេះដែរ លោកជំទាវបានបង្ហាញនូវការប្តេជ្ញាចិត្តខ្ពស់ នៅក្នុងការលើកកម្ពស់កិច្ចសហប្រតិបត្តិការប្រទេសទាំងពីរឱ្យកាន់តែរឹងមាំឡើង ទាំងស្ថាប័ននីតិប្បញ្ញត្តិ និងនីតិប្រតិបត្តិ។ លោកជំទាវក៏បានជម្រាបសម្តេចប្រធានរដ្ឋសភា ពីកម្មវិធីមនុស្សធម៌ជាច្រើន ដែលប្រជាជនហ្វីលីពីន បានកំពុងអនុវត្តនៅកម្ពុជា ពិសេសនៅតាមសហគមន៍នានានៅតំបន់ជនបទ។ លោកជំទាវបានលើកឡើងដែរថា ប្រទេសហ្វីលីពីននឹងនៅតែបន្តផ្តល់អាហារូបករណ៍ដល់និស្សិតកម្ពុជា។
លោកជំទាវឯកអគ្គរដ្ឋទូត និងសម្តេចប្រធានរដ្ឋសភា ក៏បានគូសបញ្ជាក់នូវភាពសកម្ម និងការទទួលខុសត្រូវក្នុងវេទិកាអន្តរសភា ដែលសភាប្រទេសទាំងពីរតែងតែគាំទ្រគ្នាទៅវិញទៅមកនៅលើវេទិកាអន្តរសភាជាច្រើនមកហើយ មានដូចជា អន្តរ-សភាអាស៊ាន (AIPA) ភាពជាដៃគូសភាអាស៊ី-អឺរ៉ុប (ASEP) និងសហភាពអន្តរសភា (IPU) សភាតំបន់អាស៊ី(APA) វេទិកាសភាអាស៊ី-ប៉ាស៊ីហ្វិក (APPF) ជាដើម។
សម្តេចរដ្ឋសភាធិបតី បានសង្កត់ធ្ងន់ថា ទំនាក់ទំនងសភា និងសភាមានសារៈសំខាន់ណាស់ ពីព្រោះសភាតំណាងឱ្យប្រជាជន ហើយទំនាក់ទំនងនេះនឹងលើកកម្ពស់ដល់ទំនាក់ទំនងប្រជាជន និងប្រជាជន ដែលជាស្នូលនាំដល់ការបង្កើនទំនាក់ទំនង និងកិច្ចសហប្រតិបត្តិការលើវិស័យនានា ដូចជា សេដ្ឋកិច្ច ពាណិជ្ជកម្ម អប់រំ ទេសចរណ៍ និងសុខាភិបាល ជាដើម ៕
