ភ្នំពេញ៖ នៅថ្ងៃសៅរ៍ ៧រោច ខែអាសាឍ ឆ្នាំរោង ឆស័ក ព.ស ២៥៦៨ថ្ងៃទី២៧ ខែកក្កដា ឆ្នាំ២០២៤ សម្តេចវិបុលសេនាភក្តី សាយ ឈុំ អនុប្រធានគណបក្ស ប្រធានគណៈប្រចាំការនៃគណៈអចិន្រ្តៃយ៍គណៈកម្មាធិការកណ្តាល រួមជាមួយជា ឯកឧត្តម លោកជំទាវ ប្រធាន-អនុប្រធានបណ្តាស្ថាប័នជុំវិញគណៈកម្មាធិការកណ្តាល បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបិទវគ្គអប់រំនយោបាយរបស់គណបក្ស ជំនាន់ទី៨១ នៅវិមាន ៧ មករា ដ៏ធំស្កឹមស្កៃ។
ក្នុងឱកាសនោះ សម្តេចវិបុលសេនាភក្តី សាយ ឈុំ បានវាយតម្លៃខ្ពស់ចំពោះវគ្គសិក្សាដែលបានដំណើរការទៅដោយរលូនតាំងពីដើមរហូតដល់ចប់ និងបានអបអរសាទរចំពោះលទ្ធផលសិក្សាដ៏ល្អរបស់សិក្ខាកាមគ្រប់រូប។
សម្តេចវិបុលសេនាភក្តី បានគូសបញ្ជាក់ថា វគ្គអប់រំនយោបាយរបស់គណបក្សដែលបានដំណើរការប្រកបដោយជោគជ័យនេះ អាស្រ័យដោយកត្តាសំខាន់ៗ គឺ៖
ទី១៖ ការដឹកនាំដ៏ត្រឹមត្រូវរបស់គណបក្សក្នុងការងារកសាងធនធានមនុស្សរបស់គណបក្សទាំងក្នុងរយៈពេលកន្លងមក ក៏ដូចបច្ចុប្បន្ន ដែលបានដាក់ចេញនូវគោលការណ៍ ទិសដៅ និងវិធានការបានជាក់ស្តែងត្រឹមត្រូវ ឆ្លើយតបទៅនឹងសំណូមពរនៃសភាពការណ៍ និងភារកិច្ចតាមដំណាក់កាលនីមួយៗ។
ទី២៖ ការខិតខំរបស់គណៈឃោសនាអប់រំនៃគណៈកម្មាធិការកណ្តាលគណបក្ស ព្រមទាំងមន្ត្រីបុគ្គលិកបម្រើការទាំងអស់ ក្នុងការបំពេញតួនាទី និងភារកិច្ចរបស់ខ្លួន។
ទី៣៖ ការយកចិត្តទុកដាក់របស់គណៈកម្មាធិការគណបក្សរាជធានីខេត្ត និងក្រសួង ស្ថាប័នទាំងអស់ចំពោះការងារអប់រំនយោបាយ។
ទី៤៖ ការយកអស់ពីកម្លាំងកាយ កម្លាំងចិត្ត ប្រាជ្ញាស្មារតីរបស់គ្រូឧទ្ទេសនាមគ្រប់រូប ក្នុងការចែករំលែកនូវចំណេះដឹង និងបទពិសោធន៍ល្អៗដល់វគ្គសិក្សា។
ទី៥៖ ការយកចិត្តទុកដាក់របស់សិក្ខាកាមគ្រប់រូប ក្នុងការរៀនសូត្រ ការគោរពវិន័យរបស់វគ្គ ការរឹតចំណងសាមគ្គីភាពរវាងគ្នានិងគ្នា ក្នុងស្មារតីខិតខំកសាងខ្លួនជាមន្ត្រីបន្តវេនដ៏ល្អរបស់គណបក្ស។
ទី៦៖ ដោយបរិយាកាសសង្គម ដែលបានបង្កលក្ខណៈឲ្យសិក្ខាកាមយើងបានរៀនដោយស្ងប់ចិត្ត ជាពិសេសសិក្ខាកាមដែលអញ្ជើញមកពីបណ្ដាខេត្ត។
ព្រមជាមួយគ្នានេះ សម្តេចវិបុលសេនាភក្តី សាយ ឈុំ បានលើកឡើងថា ចំណេះដឹងដែលសិក្ខាកាមបានទទួលពីការរៀនសូត្រក្នុងវគ្គសិក្សានយោបាយរបស់គណបក្ស គឺជាប្រទីបបំភ្លឺផ្លូវអោយក្មួយៗបានយល់ និងអនុវត្តត្រឹមត្រូវតាមលក្ខន្តិកៈ កម្មវិធីនយោបាយ គោលនយោបាយ គោលការណ៍ និងសេចក្តីសម្រេចនានារបស់គណបក្ស ព្រមទាំងជួយអោយក្មួយៗទាំងអស់ពង្រឹងបាននូវគោលជំហរនយោបាយ គោលជំហរសតិអារម្មណ៍ និងគោលជំហរចាត់តាំងរបស់ក្មួយៗឲ្យកាន់តែរឹងមាំឡើង។ ដូច្នេះក្នុងពេលត្រឡប់ទៅកាន់ការងាររៀងៗខ្លួនវិញ ក្មួយៗត្រូវបន្តខិតខំធ្វើការងារ និងពុះពារកសាងខ្លួនជាប់ជានិច្ច ឲ្យឆ្លើយតបទៅនឹងសំណូមពរនៃភារកិច្ចកសាង និងការពារមាតុភូមិ ក៏ដូចភារកិច្ចនៃការកសាង និងពង្រឹងគណបក្ស ៕
