ឯកឧត្តមសន្តិបណ្ឌិត ម៉ៅ ច័ន្ទតារា អញ្ជើញដឹកនាំកិច្ចប្រជុំក្រុមការងារអន្តរក្រសួង ស្តីពីការធ្វើមាតុភូមិនិវត្តន៍ពលរដ្ឋខ្មែរពីសហរដ្ឋអាមេរិក
ភ្នំពេញ៖ នាព្រឹកថ្ងៃព្រហស្បតិ៍ ទី២៥ ខែកក្កដា ឆ្នាំ២០២៤ ដោយមានការអនុញ្ញាតពី ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ឯកឧត្តមសន្តិបណ្ឌិត ម៉ៅ ច័ន្ទតារា រដ្ឋលេខាធិការប្រចាំការ ដែលមានការអញ្ជើញចូលរួមជាមួយ ឯកឧត្តម អនុរដ្ឋលេខាធិការ ក្រសួងការបរទេស និងកិច្ចសហប្រតិបត្តិអន្តរជាតិ ក្រុមការងារអន្តរក្រសួង ដើម្បីជំរុញការអនុវត្តការងារមាតុភូមិនិវត្តន៍របស់ពលរដ្ឋខ្មែរពីសហរដ្ឋអាមេរិក ដែលមាន ឯកឧត្តម ឧត្តមសេនីយ៍ឯក អគ្គនាយក នៃអគ្គនាយកដ្ឋានអត្តសញ្ញាណកម្ម ជាប្រធានក្រុមការងារ ឯកឧត្តម អគ្គលេខាធិការនៃអគ្គលេខាធិការដ្ឋានក្រសួងមហាផ្ទៃ តំណាងក្រសួងយុត្តិធម៌ និងក្រសួងសង្គមកិច្ច អតីតយុទ្ឋជន និងយុវនីតិសម្បទា និងសមាសភាពភាគី ទីភ្នាក់ងារអនុវត្តច្បាប់អន្តោប្រវេសន៍ និងគយ (ICE) នៃសហរដ្ឋអាមេរិក ដឹកនាំលោក Corey Katz ឧបការីនាយកទីភ្នាក់ងារ ICE និងមន្រ្តីចូលរួមជា ឧបការីរង ជំនួយការអនុព័ន្ឋ អ្នកអង្កេត និងសហការី ចំនួន០៤រូបចូលរួមផងដែរ។
សូមបញ្ជាក់ថា កិច្ចជំនួបនេះបានពិភាក្សាអំពីការអនុវត្តអនុស្សរណៈនៃការយោគយល់គ្នា រវាងរាជរដ្ឋាភិបាលកម្ពុជា និងរដ្ឋាភិបាលសហរដ្ឋអាមេរិកស្តីពីការធ្វើមាតុភូមិនិវត្តន៍ពលរដ្ឋខ្មែរពីសហរដ្ឋអាមេរិកដែលមានសេចក្តីសម្រេចបណ្តេញចុងក្រោយដែលបានចុះហត្ថលេខាកាលពីថ្ងៃទី១២ ខែឧសភា ឆ្នាំ ២០២៣ ការវិវឌ្ឍន៍នៃកិច្ចសហប្រតិបត្តិការក្នុងការធ្វើមាតុភូមិនិវត្តន៍ និងបញ្ហាផ្សេងៗមួយចំនួន ៕
