ស្នងការខេត្តកំពង់ចាម៖ ទោះបីស្ថានភាពបទល្មើសថយចុះក៏ពិតមែន ប៉ុន្តែគ្រប់កម្លាំងជំនាញ ត្រូវបន្ដពង្រឹងវិធានការទប់ស្កាត់ និងបង្ក្រាបរាល់សកម្មភាពបទល្មើសគ្រប់រូបភាព

ភ្នំពេញ៖ លោកឧត្តមសេនីយ៍ទោ ហេង វុទ្ធី ស្នងការនគរបាលខេត្តកំពង់ចាម នៅថ្ងៃទី២៣ ខែកក្កដា ឆ្នាំ២០២៤នេះ បានអញ្ជើញដឹកនាំកិច្ចប្រជុំបូកសរុបលទ្ធផល កិច្ចប្រតិបត្តិការរក្សាសន្តិសុខសង្គម ការងារនគរបាល និងសមាគមន៍ ប្រចាំខែមិថុនា ឆ្នាំ២០២៤ និងលើកទិសដៅអនុវត្តបន្ដ ។

យោងតាមសេចក្តីរាយការណ៍របស់លោកឧត្តមសេនីយ៍ត្រី វ៉ា សុធារ៉ា ស្នងការរងទទួលផែនសេនាធិការ បានឱ្យដឹងថា បទល្មើសមានការថយចុះគួរឱ្យគត់សម្គាល់ ដែលអាចវាយតម្លៃបានអំពីការខិតខំអនុវត្តការងារជំនាញ ប្រកបដោយប្រសិទ្ធភាពខ្ពស់ ក្រោមការដឹកនាំដ៏ឆ្លៀសវៃ និងបិនប្រសព្វពីសំណាក់លោក ឧត្តមសេនីយ៍ទោ ហេង វុទ្ធី ស្នងការនគរបាលខេត្តកំពង់ចាម ។

លោកឧត្តមសេនីយ៍ស្នងការ មានប្រសាសន៍ក្នុងកិច្ចប្រជុំនេះថា បើទោះបីជាស្ថានភាពបទល្មើសមានការថយចុះក៏ពិតមែន ប៉ុន្តែគ្រប់កម្លាំងជំនាញ ត្រូវបន្ដពង្រឹងវិធានការ ទប់ស្កាត់ និងបង្ក្រាបរាល់សកម្មភាពបទល្មើសគ្រប់រូបភាព ក្នុងប្រធានបទ “ងើបមួយ វៃមួយ ងើបពីរ វៃពីរ” យុទ្ធនាការនេះ ត្រូវបន្ដបង្ក្រាបឱ្យដូចភ្លើងរលឹម ។

ជាចុងក្រោយលោកឧត្តមសេនីយ៍ស្នងការ ក៏បានណែនាំឱ្យមន្ត្រីនគរបាលទាំងអស់ បន្ដការផ្សព្វផ្សាយដល់បងប្អូនប្រជាពលរដ្ឋ អាណាព្យាបាលគ្រប់រូប សូមជម្រុញការណែនាំ កូនៗ ក្មួយៗ កុំឱ្យប្រព្រឹត្តអំពើខុសច្បាប់ ដែលនាំឱ្យមានទោសទណ្ឌ នាំឱ្យខាត់បង់ដល់ការសិក្សា ទ្រព្យសម្បត្តិ ប៉ះពាល់ដល់កិត្តិយសបុគ្គល និងក្រុមគ្រួសារ ព្រមទាំងបង្កឱ្យមានភាព អសន្តិសុខ បាត់បង់សណ្តាប់ធ្នាប់ សុវត្ថិភាពសង្គមជាតិទាំងមូល ។ ក្រៅពីនេះទៀត ក៏សូមអំពាវនាវដល់អ្នកប្រើប្រាស់ផ្លូវ សូមចូលរួមគោរពច្បាប់ចរាចរណ៍ ដើម្បីកាត់បន្ថយអត្រាគ្រោះថ្នាក់ចរាចរណ៍ឱ្យមកនៅកម្រិតអតិបរមា ៕