ឯកឧត្តម ជិន អង្គារិទ្ធិ ចូលរួមវេទិកាអាស៊ាន ស្តីពីសេរីភាពនៃការជួបជុំដោយសន្តិវិធី មាត្រា២៤ នៃសេចក្តីប្រកាសសិទ្ធិមនុស្សអាស៊ាន

ភ្នំពេញ៖ ឯកឧត្តម កែវ រ៉េមី ទេសរដ្ឋមន្រ្តី ប្រធានគណៈកម្មាធិការសិទ្ធិមនុស្សកម្ពុជា ក្នុងនាមតំណាងកម្ពុជាប្រចាំគណៈកម្មការអន្តររដ្ឋាភិបាលអាស៊ានទទួលបន្ទុកសិទ្ធិមនុស្ស (AICHR-អាយឆា) បានចាត់ ឯកឧត្តម ជិន អង្គារិទ្ធិ សមាជិក និងជាប្រធាននាយកដ្ឋានសិទ្ធិមនុស្សតំបន់និងអាស៊ាន ចូលរួមវេទិកាអាស៊ានស្តីពីសេរីភាពនៃការជួបជុំដោយសន្តិវិធី មាត្រា២៤ នៃសេចក្តីប្រកាសសិទ្ធិមនុស្សអាស៊ាន តបតាមការអញ្ជើញពីតំណាងប្រទេសឥណ្ឌូណេស៊ី និងតំណាងប្រទេសថៃ ប្រចាំអាយឆា ដែលបានរៀបចំវេទិកាអាស៊ានស្តីពីសេរីភាពនៃការជួបជុំដោយសន្តិវិធី មាត្រា២៤ នៃសេចក្តីប្រកាសសិទ្ធិមនុស្សអាស៊ាន (AHRD) នៅថ្ងៃទី១៥-១៦ ខែកក្កដា ឆ្នាំ២០២៤ នៅទីក្រុងបានទែន ប្រទេសឥណ្ឌូនេស៊ី ដោយមានការអញ្ជើញចូលរួមពីសំណាក់តំណាងប្រទេសសមាជិកអាស៊ានប្រចាំអាយឆា អង្គភាពតាមវិស័យអាស៊ាន ក្រសួងយុត្តិធម៌ពីបណ្តាប្រទេសសមាជិកអាស៊ាន ក្រសួងការបរទេសនៃប្រទេសមាជិកអាស៊ាន ស្ថាប័នសិទ្ធិមនុស្សជាតិ អង្គការសង្គមស៊ីវិល និងអង្គភាពអង្គការសហប្រជាជាតិផងដែរ។

វេទិកានេះ រៀបចំឡើងក្នុងគោលបំណងផ្តល់ជូននូវវេទិកាសម្រាប់ចែករំលែកនូវវិធានការណ៍នានា និងការកសាងសមត្ថភាពតួអង្គពាក់ព័ន្ធក្នុងការអនុវត្តមាត្រា២៤ នៃសេចក្តីប្រកាសិទ្ធិមនុស្សអាស៊ាន (AHRD) ស្តីពីសេរីភាពនៃការជួបជុំដោយសន្តិវិធី ព្រមទាំងបង្កើតអនុសាសន៍លម្អិត ឬការពន្យល់អំពីការអនុវត្តមាត្រា មាត្រា២៤ នៃ AHRD។

ជាមួយគ្នានេះដែរ វេទិកានេះ ក៏មានការរំពឹងទុកថា វានឹងក្លាយជាវេទិកាថ្នាក់តំបន់ដើម្បីក្នុងការចែករំលែកការអនុវត្តល្អក្នុងការអនុវត្តមាត្រា២៤ នៃ AHRD ការពង្រឹងជំនាញនិងចំណេះដឹងរបស់អ្នកអនុវត្តន៍ក្នុងការអនុវត្តមាត្រា ២៤ នៃ AHRD និងការផ្តល់អនុសាសន៍របស់អាយឆា ស្តីពីការអនុវត្តមាត្រា ២៤ នៃ AHRD ស្តីពីការអនុវត្តល្អបំផុតទាក់ទងនឹងការគោរព ការពារ បំពេញសិទ្ធិសេរីភាពក្នុងការជួបប្រជុំដោយសន្តិវិធី។

នៅចុងបញ្ចប់ វេទិកានេះក៏រៀបចំជាក្រុមពិភាក្សាគ្នាក្នុងការចែករំលែកបទពិសោធន៍ និងបញ្ហាប្រឈមនានាក្នុងការអនុវត្ត២៤ នៃ AHRD ស្តីពីសេរីភាពនៃការជួបជុំដោយសន្តិវិធីផងដែរ៕