ឯកឧត្តម អ៊ាង សុផល្លែត អំពាវនាវឲ្យក្រសួង ស្ថាប័នពាក់ព័ន្ធ ចូលរួមផ្សព្វផ្សាយពីបញ្ហាបរិស្ថាន ឲ្យបានច្រើនឡើងថែមទៀត កុំឱ្យមានការចោលសំរាមផ្តេសផ្តាស
ភ្នំពេញ៖ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានអំពាវនាវដល់ក្រសួង ស្ថាប័ន ដៃគូអភិវឌ្ឍន៍ អង្គការដៃគូ គ្រឹះស្ថានអប់រំ និងអ្នកពាក់ព័ន្ធទាំងអស់ ក៏ដូចជាសាធារណជន ចូលរួមផ្សព្វផ្សាយពីបញ្ហាបរិស្ថានឱ្យបានច្រើនឡើងថែមទៀត កុំឱ្យមានការចោលសំរាមផ្តេសផ្តាស ជាពិសេសរួមចំណែកសម្រេចឱ្យបាននូវភាពស្អាតលើដី ភាពស្អាតលើផ្ទៃទឹក និងភាពស្អាតលើអាកាស ។
ថ្លែងក្នុងពិធីបើក«ពិព័រណ៍ផ្សព្វផ្សាយនិងចែកកូនឈើក្រោមមូលបទ «ពន្លកបៃតង» និងវេទិកាកេសរកូលជាតិលើកទី៤»នៅមុខទីស្តីការក្រសួងបរិស្ថាន នាថ្ងៃទី១០ ខែកក្កដា ឆ្នាំ២០២៤ ឯកឧត្តមបណ្ឌិត អ៊ាង សុផល្លែត បានលើកឡើងថា ការបណ្តុះកូនឈើ ការដាំកូនឈើ និងស្តារព្រៃឈើឡើងវិញនេះ គឺជាយុទ្ធសាស្រ្តមួយដ៏សំខាន់សម្រាប់ធានាដល់ការការពារជីវៈចម្រុះ ការថែរក្សាសេវាកម្មប្រព័ន្ធអេកូឡូស៊ី និងការកាត់បន្ថយផលប៉ះពាល់នៃការប្រែប្រួលអាកាសធាតុ ក៏ដូចជាជួយលើកកម្ពស់ជីវភាពរស់នៅរបស់ប្រជាសហគមន៍មូលដ្ឋាន ដែលរស់នៅក្នុង និងក្បែរតំបន់ការពារធម្មជាតិ តាមរយៈការលក់ឥណទានកាបូនពីការថែរក្សាការពារព្រៃឈរ និងសកម្មភាពអភិវឌ្ឍន៍ប្រកបដោយចីរភាពនានាដូចជាការអភិវឌ្ឍគោលដៅលំហែរបៃតង និងទេសចរណ៍ធម្មជាតិប្រកបដោយនិរន្តរភាព គុណភាព និងការទទួលខុសត្រូវចំពោះបរិស្ថានជាដើម ហើយការចែកកូនឈើយកទៅដាំនៅក្នុងថ្ងៃនេះ គឺជាការបណ្តុះនូវពន្លកបៃតងសម្រាប់កម្ពុជា នៅលើដីផ្ទាល់ផង រួមទាំងការបណ្តុះស្មារតី និងផ្នត់គំនិតស្រលាញ់ព្រៃឈើដល់សាធារណជនគ្រប់មជ្ឈដ្ឋាន និងតជំនាន់សំដៅឆ្ពោះទៅបង្កើនគម្របព្រៃឈើឱ្យបាន៦០% និងសម្រេចការអភិវឌ្ឍប្រកបដោយអព្យាក្រឹត្យកាបូន នៅឆ្នាំ២០៥០។
ឯកឧត្ដមរដ្ឋមន្ត្រីបញ្ជាក់ថា «ខ្ញុំសូមអំពាវនាវដល់ក្រសួង ស្ថាប័ន ដៃគូអភិវឌ្ឍន៍ អង្គការដៃគូ គ្រឹះស្ថានអប់រំ និង អ្នកពាក់ព័ន្ធទាំងអស់ ក៏ដូចជាសាធារណជនចូលរួមផ្សព្វផ្សាយពីបញ្ហាបរិស្ថានឱ្យបានច្រើនឡើងថែមទៀត កុំឱ្យមានការចោលសំរាមផ្តេសផ្តាស ជាពិសេសរួមចំណែកសម្រេចឱ្យបាននូវភាពស្អាតលើដី ភាពស្អាតលើផ្ទៃទឹក និងភាពស្អាតលើអាកាស និងបន្តចូលរួមដាំដើមឈើឱ្យបានច្រើន ដើម្បីបង្កើនភាពបៃតង នៅតាមទីសាធារណៈ សហគមន៍ សាលារៀន និងវត្តអារាម និងដាំស្តារព្រៃនៅក្នុងដែន និងក្រៅដែនជម្រកធម្មជាតិជាដើម ស្របតាមយុទ្ធសាស្រ្តចក្រាវិស័យបរិស្ថាន ដែលផែនទីចង្អុលផ្លូវមួយនេះ នឹងនាំនាវាវិស័យបរិស្ថានរបស់កម្ពុជាទទួលបានប្រសិទ្ធភាព និងប្រសិទ្ធផល ដើម្បីឈានឆ្ពោះទៅសម្រេចបាននូវចក្ខុវិស័យកម្ពុជាឆ្នាំ២០៥០»។
ឆ្លៀតក្នុងឱកាសនេះដែរ ឯកឧត្ដមក៏បនលើកទឹកចិត្តដល់ថ្នាក់ដឹកនាំ និងមន្រ្តីរាជការរបស់ក្រសួងទាំងអស់ ត្រូវសិក្សាស្វែងយល់បន្ថែមលើយុទ្ធសាស្រ្តស៊ីជម្រៅរបស់រាជរដ្ឋាភិបាល ដើម្បីចូលរួមអនុវត្តយុទ្ធសាស្រ្តចក្រាវិស័យបរិស្ថាន ឱ្យទទួលបានលទ្ធផលល្អប្រសើរ ក្នុងបុព្វហេតុបរិស្ថានកម្ពុជា និងចូលរួមជាមួយអន្តរជាតិ ក្នុងការឆ្លើយតបនឹងបញ្ហាបរិស្ថានសកល ៕
