ឧត្តមសេនីយ៍ត្រី អ៊ុំ សុភា នាំយកថវិកាបេឡាមរណសង្គ្រោះ និងអំណោយដ៏ថ្លៃថ្លារបស់សម្តេចធិបតី និងលោកជំទាវ ឧបត្ថម្ភដល់ក្រុមគ្រួសារសពសពអតីតយុទ្ធជន
ភ្នំពេញ៖ ឯកឧត្តម ឧត្តមសេនីយ៍ត្រី អ៊ុំ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង និងជាប្រធានសមាគមអតីតយុទ្ធជនកម្ពុជាខេត្ត អមដំណើរដោយ លោក ឈាង ចន្ធី ប្រធានមន្ទីរសង្គមកិច្ច អតីតយុទ្ធជន និង យុវនីតិសម្បទា ខេត្តកំពង់ឆ្នាំង លោកស្រី ពេជ ឃន អភិបាលរងក្រុងកំពង់ឆ្នាំង នៅថ្ងៃពុធ ទី១០ ខែកក្កដា ឆ្នាំ២០២៤ បានដឹកនាំក្រុមការងារលេខាធិការដ្ឋាន ស.អ.ក ខេត្ត នាំយកថវិកាបេឡាមរណសង្គ្រោះ ចំនួន១២លានរៀល និង លិខិតចូលរួមរំលែកមរណទុក្ខ ជូនដល់គ្រួសារសពអតីតយុទ្ធជន ចំនួន ០៣គ្រួសារ ក្នុងនោះមាន ក្រុងកំពង់ឆ្នាំង ០១គ្រួសារ ស្រុកកំពង់លែង ០១គ្រួសារ និង ស្រុករលាប្អៀរ ០១គ្រួសារ ។
ក្នុងឱកាសនេះ ឯកឧត្តម ឧត្តមសេនីយ៍ត្រី អ៊ុំ សុភា បាននាំយកអំណោយដ៏ថ្លៃថ្លារបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា អនុប្រធានទី១ សមាគមអតីតយុទ្ធជនកម្ពុជា និងលោកជំទាវបណ្ឌិត ពេជ ច័ន្ទមុន្នី ហ៊ុន ម៉ាណែត ក្នុងនោះមាន អង្ករ ៧៥គីឡូក្រាម មី ០៣កេះ ត្រីខ ០៣យួរ ទឹកត្រី ០៣យួរ ទឹកស៊ីអ៉ីវ ០៣យួរ មុង ០៣ ឧបត្ថម្ភពួកគាត់ទាំង០៣គ្រួសារ ផងដែរ ។
ឯកឧត្តម ប្រធានសមាគមអតីតយុទ្ធជនកម្ពុជាខេត្ត បានពាំនាំប្រសាសន៍ ផ្តាំផ្ញើ សួរសុខទុក្ខ និងសោកស្ដាយជាទីបំផុត ពីសំណាក់ សម្តេចមហាបវរធិបតី និង លោកជំទាវបណ្ឌិត ជូនដល់គ្រួសារសពអតីតយុទ្ធជនទាំង០៣គ្រួសារ និងបានជូនពរពួកគាត់ មានសុខភាពល្អ ទទួលបាននូវសេចក្តីសុខ សេចក្តីចម្រើន រកទទួលទានមានបានចាប់ពីពេលនេះតទៅ ។
តំណាងក្រុមគ្រួសារសពអតីតយុទ្ធជនទាំង០៣គ្រួសារ សូមគោរពថ្លែងអអំណរគុណយ៉ាងជ្រាលជ្រៅជាទីបំផុតចំពោះសម្តេចមហាបវរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី និង ឧត្តមសេនីយ៍ត្រី អ៊ុំ សុភា ព្រមទាំងក្រុមការងារ ដែលបានយកចិត្តទុកដាក់ចំពោះបងប្អូនអតីតយុទ្ធជន គ្រប់ពេលវេលា គ្រប់ទីកន្លែង និងសូមគោរពជូនពរសម្តេច និងលោកជំទាវ ព្រមទាំងឯកឧត្តម អស់លោក លោកស្រី ទាំងអស់ សូមទទួលបាននូវពុទ្ធពរទាំងបួនប្រការ កុំបីឃ្លៀងឃ្លាតឡើយ ។
ដោយឡែកនៅព្រឹកថ្ងៃដដែលនេះដែរ ឯកឧត្តម អ៊ុំ សុភា បានចាត់តាំង លោក វរសេនីយ៍ឯក ស្រី ម៉ាច មេបញ្ជាការរង ជាតំណាង ដឹកនាំក្រុមការងារនាំយកថវិកាបេឡាមរណសង្គ្រោះ ចំនួន ៤លានរៀលទៀត រួមនឹងលិខិតចូលរួមរំលែកមរណទុក្ខ ជូនដល់លោកស្រី ម៉ូត ជូត ត្រូវជាប្រពន្ធរបស់សពអតីតជនពិការ ឈ្មោះ យុង គឿន ID(HA97000665) ទទួលមរណភាព នៅភូមិឡ ឃុំទួលខ្ពស់ ស្រុកទឹកផុស ខេត្តកំពង់ឆ្នាំង ។
