បរទេស៖ ប្រធានាធិបតីវេណេស៊ុយអេឡា លោក Nicolas Maduro បានឲ្យដឹងកាលពីថ្ងៃចន្ទថា កិច្ចចរចានឹងចាប់ផ្តើមឡើងវិញក្នុងពេលឆាប់ៗនេះជាមួយសហរដ្ឋអាមេរិក ដែលបានដាក់ទណ្ឌកម្មឡើងវិញលើឧស្សាហកម្មប្រេងរបស់ប្រទេសនៅអាមេរិកខាងត្បូង ខណៈដែលលោកសម្លឹងឆ្ពោះទៅរកការបោះឆ្នោតនៅខែនេះ។
លោក Nicolas Maduro បានអះអាងថា ទីក្រុងវ៉ាស៊ីនតោនបានផ្តួចផ្តើមសំណើរនេះ ហើយថាទីក្រុង Caracas បានយល់ព្រមលើវា បន្ទាប់ពីមានការពិចារណាយ៉ាងយកចិត្តទុកដាក់រយៈពេលពីរខែ។
លោក Nicolas Maduro បបានឲ្យដឹងតាមទូរទស្សន៍រដ្ឋថា នៅថ្ងៃពុធក្រោយការចរចាជាមួយសហរដ្ឋអាមេរិកនឹងចាប់ផ្តើមឡើងវិញ។
កាលពីឆ្នាំមុន សហរដ្ឋអាមេរិក និងវេណេស៊ុយអេឡាបានបើកការចរចាសម្ងាត់នៅប្រទេសកាតា។ ទីបំផុត ពួកគេបានយល់ព្រមលើកិច្ចព្រមព្រៀងដោះដូរអ្នកទោសដ៏ធំមួយដែលបានសម្របសម្រួលដោយរដ្ឋឈូងសមុទ្រ។
វ៉ាស៊ីនតោនបានដោះលែងលោក Alex Saab ដែលជាសម្ព័ន្ធមិត្តរបស់លោក Nicolas Maduro ដែលត្រូវបានសហរដ្ឋអាមេរិកចោទប្រកាន់ពីបទលាងលុយកខ្វក់ឱ្យក្រុង Caracas។
ជាថ្នូរនឹងគ្នា វេណេហ្ស៊ុយអេឡាបានប្រគល់ជនរត់គេចខ្លួនម្នាក់ឈ្មោះ Leonard Francis ដែលជាចំណុចកណ្តាលនៃរឿងអាស្រូវពុករលួយដ៏អាក្រក់បំផុតមិនធ្លាប់មានរបស់កងទ័ពជើងទឹកអាមេរិក បានដោះលែងអ្នកទោសនយោបាយវេណេហ្ស៊ុយអេឡា ២០នាក់ និងដោះលែងអ្នកជាប់ឃុំអាមេរិកចំនួន ១០នាក់។
លោក Maduro បានបញ្ជាក់ថា យើងនឹងពិភាក្សាគ្នា និងស្វែងរកកិច្ចព្រមព្រៀងថ្មីដើម្បីឱ្យអ្វីៗត្រូវបានគោរព ជាពិសេសនូវអ្វីដែលយើងបានចុះហត្ថលេខានៅកាតា កាលពីខែកញ្ញា។
មេដឹកនាំវេណេហ្ស៊ុយអេឡាបានឲ្យដឹងថា លោកសង្ឃឹមសម្រាប់ការសន្ទនា ការយោគយល់គ្នា អនាគតសម្រាប់ទំនាក់ទំនងរបស់យើង។
