ឧបនាយករដ្ឋមន្ត្រី កើត រិទ្ធ នឹងស្នើដាក់ឈ្មោះ ស្រី ស៊ីណា ក្នុងបញ្ជីឧក្រិដ្ឋជនប្រព្រឹត្តទង្វើ សាហាវព្រៃផ្សៃ មិនអាចសុំបន្ធូរបន្ថយទោស
ភ្នំពេញ៖ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ នឹងស្នើទៅគណៈកម្មាធិការជាតិ ដើម្បីពិនិត្យ និងវាយតម្លៃបញ្ជីឈ្មោះ ទណ្ឌិតស្នើសុំបន្ធូរបន្ថយទោស និងលើកលែងទោស ដាក់ឈ្មោះ ស្រី ស៊ីណា ទៅក្នុងបញ្ជីឧក្រិដ្ឋជន ដែលប្រព្រឹត្តទង្វើសាហាវព្រៃផ្សៃ ដែលមិនអាចស្នើសុំបន្ធូរបន្ថយទោសបានឡើយ។
នាឱកាសអញ្ជើញធ្វើសន្និសីទសារព័ត៌មានពាក់ព័ន្ធករណីឃាតកម្ម ប្រព្រឹត្តដោយជនល្មើសឈ្មោះ ស្រី ស៊ីណា នារសៀលថ្ងៃទី២៦ ខែមិថុនា ឆ្នាំ២០២៤ ឯកឧត្តមឧបនាយករដ្ឋមន្ត្រី កើត រិទ្ធ បានលើកឡើងថា ទោះបីជាទង្វើរបស់ជនល្មើសឈ្មោះ ស្រី ស៊ីណា ដែលបានបាញ់សម្លាប់មនុស្សនៅបុរី ប៉េង ហួត បឹងស្នោ កាលពីពេលកន្លងទៅ មានភាពសាហាវព្រៃផ្សៃយ៉ាងណាក៏ដោយ ក៏វិស័យយុត្តិធម៌ មិនអាចធ្វើអ្វីតាមអំពើចិត្តរបស់ខ្លួនបានឡើយ ក្រៅតែពីការអនុវត្តច្បាប់ ដែលបានចែងជាធរមាន។
ឯកឧត្តមឧបនាយករដ្ឋមន្ដ្រី បានបន្ដថា តែយ៉ាងណាក៏ដោយ ស្រី ស៊ីណា មិនត្រូវបានដាក់ឈ្មោះ ក្នុងបញ្ជីនៃការបន្ធូរបន្ថយទោសនោះឡើយ ដោយសារតែសកម្មភាពឃាតកម្មរបស់ជននេះ ជាទង្វើកាចសាហាវ។
ឯកឧត្តមឧបនាយករដ្ឋមន្ដ្រី បានបញ្ជាក់យ៉ាងដូច្នេះថា «បន្ទាប់ពីសេចក្ដីសម្រេចរបស់តុលាការ ដែលផ្ដន្ទាទោសជនល្មើសបានចូលជាស្ថាពរហើយនោះ ខ្ញុំក៏ទទួលបានគោលការណ៍ដឹកនាំដ៏ខ្ពង់ខ្ពស់ពី សម្ដេចមហាបវរធិបតី ហ៊ុន ម៉ាណែត ប្រមុខរាជរដ្ឋាភិបាលកម្ពុជា ក្នុងនាមខ្ញុំជារដ្ឋមន្ដ្រីក្រសួងយុត្តិធម៌ និងជាប្រធានគណៈកម្មាធិការជាតិដើម្បីពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោស ខ្ញុំ នឹងស្នើសុំទៅគណៈកម្មាធិការជាតិ ដើម្បីដាក់ឈ្មោះ ស្រី ស៊ីណា ទៅក្នុងបញ្ជីគេហៅថា ឧក្រិដ្ឋជនសាហាវៗ ដែលមិនអាចទទួលបានការស្នើសុំបន្ធូរបន្ថយទោស និងលើកលែងទោស បានឡើយ»។
ឯកឧត្តមឧបនាយករដ្ឋមន្ដ្រី បានបន្ដទៀតថា ក្នុងករណីស្នើដាក់ឈ្មោះ ស្រី ស៊ីណា ក្នុងបញ្ជីឈ្មោះ ក្នុងឧក្រិដ្ឋជនសាហាវៗ គឺដើម្បីធានាថា អំពើសម្លាប់ដ៏សារហាវបែបនេះ ត្រូវតែទទួលរងការអនុវត្តទោសពន្ធនាគារ បានធ្ងន់ធ្ងរសាកសមទៅនឹងអំពើដែលខ្លួនបានប្រព្រឹត្ត ៕
