សម្ដេចធិបតី ជឿថា គោលនយោបាយរាជរដ្ឋាភិបាល អាចអនុវត្តទៅបានជោគជ័យ ព្រោះមានសេនាធិការរឹងមាំ ច្បាស់លាស់ និងប្រកបដោយបុរេសកម្ម
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានលើកឡើងថា គោលនយោបាយក្នុងការកំណែទម្រង់របស់សម្ដេចលើវិស័យអប់រំអាចទទួលបានជោគជ័យ គឺអាស្រ័យលើសេនាធិការដែលមានភាពរឹងមាំ ច្បាស់លាស់ និងប្រកបដោយបុរេសកម្ម។
ក្នុងឱកាសអញ្ជើញសម្ពោធដាក់ឲ្យប្រើប្រាស់ជាផ្លូវការនូវបណ្តាញសាកលវិទ្យាល័យសាយប័រកម្ពុជា នៅព្រឹកថ្ងៃទី២៥ ខែមិថុនា ឆ្នាំ២០២៤នេះ សម្ដេចធិបតី ហ៊ុន ម៉ាណែត បញ្ជាក់ថា «ខ្ញុំបានតែដាក់ចេញនូវចក្ខុវិស័យ និងទស្សនៈទាន ប៉ុន្ដែការអនុវត្ត និងការរៀបចំនូវគោលនយោបាយ និងផែនការសកម្មភាព ការដឹកនាំអនុវត្តជាក់ស្ដែង គឺតម្រូវឲ្យសេនាធិការច្បាស់លាស់ ហើយមកដល់ពេលនេះក្រសួងអប់រំ បានដើរតួនាទីសំខាន់ ហើយខ្ញុំជឿថាគោលនយោបាយរបស់ខ្ញុំអាចអនុវត្តទៅបានជោគជ័យ ព្រោះមានសេនាធិការរឹងមាំ ច្បាស់លាស់ និងប្រកបដោយកម្លាំងថាមពល ភាពច្នៃប្រឌិត ភាពបុរេសកម្ម»។
សម្ដេចមហាបវរធិបតី បានសម្ដែងនូវការកោតសរសើរចំពោះក្រសួងអប់រំ យុវជន និងកីឡា ក៏ដូចជាបណ្ដាសាកលវិទ្យាល័យនីមួយៗ ព្រមទាំងនិស្សិតផ្ទាល់ដែលបានខិតខំ និងបង្ហាញនូវសមត្ថភាពរបស់ខ្លួន ជាពិសេសផ្នែកវិទ្យាសាស្ដ្រ។ សម្ដេចបន្ដថា បើទោះបីមិនទាន់មានលទ្ធភាព ក្នុងការអភិវឌ្ឍទៅផ្នែកពាណិជ្ជកម្មធំៗយ៉ាងណាក្ដី ប៉ុន្ដែក្រសួងអប់រំ សាកលវិទ្យាល័យ និងនិស្សិត បានប្រឹងប្រែងរួមគ្នាអភិវឌ្ឍន៍ផ្នែកបច្ចេកវិទ្យានេះ។
សម្ដេចធិបតី បន្ថែមថា រាជរដ្ឋាភិបាល តាមរយៈក្រសួងអប់រំ យុវជន និងកីឡា បានដាក់ចេញនូវការកែទម្រង់ស៊ីជម្រៅ សំដៅជំរុញការធានាបានមូលដ្ឋានមនុស្សប្រកបដោយគុណភាពខ្ពស់ ដើម្បីរួមចំណែកដល់ការកសាងសង្គមកម្ពុជា ដែលមានប្រជាជនប្រកបដោយចំណេះដឹង ទេពកោសល្យ សមត្ថភាពខ្ពស់ និងមានវប្បធម៌ជ្រៅជ្រះ ព្រមទាំងមានផលិតភាពការងារខ្ពស់សម្រាប់ចូលរួមលើកកម្ពស់ភាពប្រកួតប្រជែងកម្ពុជា៕
