មន្ត្រីជាន់ខ្ពស់ក្រសួងកសិកម្ម អំពាវនាវឲ្យបងប្អូនប្រជាកសិករបង្កើនការប្រុងប្រយ័ត្ន ករណីផ្ទុះដង្កូវហ្វូងបង្កការខូចខាតកសិផល
ភ្នំពេញ៖ ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យ ក្រសួងកសិកម្មរុក្ខាប្រមាញ់ និងនេសាទ នាថ្ងៃទី២១ ខែមិថុនា ឆ្នាំ២០២៤នេះ បានអំពាវនាវដល់ប្រជាកសិករ បង្កើនការប្រុងប្រយ័ត្ន ករណីផ្ទុះដង្កូវហ្វូង ដែលបានរីករាលដាលដល់ ១២ខេត្តហើយរហូតមកដល់ពេលនេះ។
ឯកឧត្តម អនុរដ្ឋលេខាធិការ បានបន្តថា បច្ចុប្បន្ន ក្រសួងកសិកម្មកំពុងប្រើប្រាស់កម្លាំង និងមធ្យោបាយសរុបនៅទូទាំងប្រទេស ដោយបញ្ចូនមន្ត្រីជំនាញជាបន្ទាន់ទាំងកម្រិតក្រសួង កម្រិតមន្ទីរ និងកម្រិតឃុំ ដើម្បីចុះតាមដានវាយតម្លៃពីការរីករាលដាល និងផ្សព្វផ្សាយពីវិធានការឆ្លើយតបភ្លាមៗ ដល់បងប្អូនកសិករនៅតាមមូលដ្ឋាន និងអន្តរាគមន៍ផ្ទាល់ក្នុងករណីចាំបាច់ ។
ឯកឧត្តម ឃឹម ហ្វីណង់ បានបញ្ជាក់ថា តាមការប៉ាន់ស្មានបឋម ស្ថានភាពនេះស្ថិតនៅក្នុងដំណាក់កាលគ្រប់គ្រងបាន ដែលផលប៉ះពាល់នាពេលលបច្ចុប្បន្ននេះ ស្ថិតក្នុងរង្វង់១-២% នៃដំណាំកំពុងដាំដុះ ភាគច្រើនទៅលើដំណាំស្រូវ និងដំឡូងមី តែតួលេខនេះអាចនឹងកើនឡើងបន្តទៀតនាពេលខាងមុខ។ អ្នកជំនាញរំពឹងទុកថា នៅពេលដែលមានភ្លៀងធ្លាក់មក ដង្កូវហ្វូងទាំងនេះនឹងស្លាប់ទៅវិញ ហើយបញ្ហារីករាលដាលនឹងត្រូវបញ្ចប់។
តែទោះជាយ៉ាងណាក៏ដោយ ថ្នាក់ដឹកនាំនៃក្រសួងកសិកម្មខាលើ បានអំពាវនាវដល់ ប្រជាកសិករបន្តដានត្រួតពិនិត្យមើលដំណាំស្រែចម្ការរបស់ខ្លួនជាប្រចាំ និងឱ្យបានទៀងទាត់ និងចាត់វិធានការឱ្យបានទាន់ពេលវេលា ជៀសវាងនូវការខាតបង់ធ្ងន់ធ្ងរមកលើផលដំណាំរបស់ខ្លួន៕
