សហភាពសិទ្ធិកម្មករកម្ពុជា ដាក់លិខិតនៅក្រសួងមហាផ្ទៃរួចហើយ ដើម្បីស្នើសង់ត្រាល់ កែតម្រូវខ្លឹមសារ នៃរបាយការណ៍របស់ខ្លួនឡើងវិញ

ភ្នំពេញ៖ សហភាពសិទ្ធិកម្មករកម្ពុជា បានដាក់លិខិតនៅក្រសួងមហាផ្ទៃរួចហើយ ដើម្បីស្នើអង្គការសង់ត្រាល់ កែតម្រូវខ្លឹមសារ នៃរបាយការណ៍របស់ខ្លួនឡើងវិញ ដែលរបាយការណ៍នេះមិនបានឆ្លុះបញ្ចាំងពីការពិតនិងមិនមានមូលដ្ឋានច្បាស់លាស់ធ្វើឲ្យប៉ះពាល់កិត្តិយសជាតិ ប៉ះពាល់ស្ថេរភាពការងារនិងផលប្រយោជន៍រួមរបស់កម្មករ និយោជិតនៅកម្ពុជាទាំងមូល។
លោក គឹម ចាន់សំណាង ប្រធានសភាពសិទ្ធិកម្មករកម្ពុជា បានប្រាប់អ្នកសារព័ត៌មានថា នៅព្រឹកថ្ងៃទី២១ ខែមិថុនា ឆ្នាំ២០២៤ សហភាពសិទ្ធិកម្មករកម្ពុជា-CCWR បានដឹកនាំថ្នាក់ដឹកនាំសហជីពតាមមូលដ្ឋានរោងចក្រ សហគ្រាស តំណាងឲ្យសមាជិក សមាជិកាជាកម្មករនិយោជិតជាង៩ម៉ឺននាក់ ដាក់លិខិតមកដាក់នៅក្រសួងមហាផ្ទៃ ដើម្បីគោរពជូនឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ស្នើសុំពិនិត្យការអនុវត្តសកម្មភាពនិងការប្រើប្រាស់កញ្ចប់ថវិកាជំនួយបរទេសរបស់មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់”សង់ត្រាល់”ដែលធ្វើសកម្មភាពមិនស្របតាមច្បាប់ស្តីពីសមាគមនិងអង្គការមិនមែបរាជរដ្ឋាភិបាល និងលក្ខន្តិកៈរបស់ខ្លួន និងបានចេញរបាយការណ៍កាលពីថ្ងៃទី៤ ខែមិថុនា ឆ្នាំ២០២៤ ស្តីពីស្ថានភាពសេរីភាពសហជីព ដែលរបាយការណ៍នេះមិនបានឆ្លុះបញ្ចាំងពីការពិតនិងមិនមានមូលដ្ឋានច្បាស់លាស់ធ្វើឲ្យប៉ះពាល់កិត្តិយសជាតិ ប៉ះពាល់ស្ថេរភាពការងារនិងផលប្រយោជន៍រួមរបស់កម្មករ និយោជិតនៅកម្ពុជាទាំងមូល។
លោក បានបញ្ជាក់ថា ការដាក់លិខិតមកដាក់នៅក្រសួងមហាផ្ទៃនេះ ដោយអង្គការសង់ត្រាល់បានចុះបញ្ជីនៅក្រសួងមហាផ្ទៃ មិនមែននៅក្រសួងការងារនោះទេ ដោយក្រុមសហភាពសហជីពដែលបានមកតវ៉ានេះ គឺចង់ឱ្យសង់ត្រាល់ពេលចេញរបាយការណ៍អ្វីមួយ គឺមានការពិភាក្សាគ្នា និងសក្សាអំពីទិដ្ឋភាពសង្គមជាក់ស្ដែង ដើម្បីអនុវត្ដដំណោះស្រាយតាមផ្លូវច្បាប់ និងទទួលយកបានទាំងអស់គ្នា។
លោក គឹម ចាន់សំណាងបានបញ្ជាក់ថា សង់ត្រាល់ បានចេញរបាយការណ៍ស្តីពីស្ថានភាពសេរីភាពសហជីពឯករាជ្យកម្ពុជា នៅតែប្រឈមឧបសគ្គរារាំងហើយថា សង់ ត្រាល់ បានធ្វើការសម្ភាសដោយវាយតម្លៃពីស្ថានភាពកម្មករ និងសហជីពក្នុងរោងចក្រចំនួន១៤ ដែលស្ថិតក្រោមកម្មវិធីរោងចក្រកាន់តែប្រសើរនៅកម្ពុជានៃអង្គការពលកម្មអន្តរជាតិ (ILO-BFC) ក្នុងចំណោមសហជីពចំនួន ១៤នេះ មានសហជីពចំនួន ១០ រងការបំភិតបំភ័យដោយផ្ទាល់មាត់ ការគំរាមកំហែង ការបៀតបៀន និងការដាក់ក្នុងបញ្ជីខ្មៅដែលធ្វើឱ្យប៉ះពាល់យ៉ាងធ្ងន់ធ្ងរដល់ការបំពេញការងាររបស់ពួកគេ ហើយក៏បានទាមទារឱ្យគ្រប់ភាគីពាក់ព័ន្ធគួរតែពិនិត្យមើលឡើងវិញ ដើម្បីកុំឱ្យមានការរំលោភសិទ្ធិសេរីភាពការងាររបស់កម្មករ-និយោជិត និងសហជីព។
លោក គឹម ចាន់សំណាងបញ្ជាក់ថា របាយការណ៍នេះ មិនបានឆ្លុះបញ្ចាំងពីការពិត និងមិនមានមូលដ្ឋានច្បាស់លាស់ដែលធ្វើឲ្យប៉ះពាល់កិត្តិយសជាតិ ប៉ះពាល់ដល់ស្ថិរភាពការងាររបស់កម្មករនិយោជិត និងផលប្រយោជន៍រួមរបស់កម្មករ និយោជិតនៅកម្ពុជាទាំងមូល ដែលផ្ទុយទាំងស្រុងទៅនិងសភាពការណ៍ជាក់ស្តែង និងមិនរំលេចទាល់តែសោះ នូវសមិទ្ធផលវិជ្ជមានជាច្រើន ដែលជាវឌ្ឍនភាពលក្ខខណ្ឌការងាររួមរបស់កម្មករនិយោជិត និងសហជីពនៅកម្ពុជា ។
លោកបានសម្ដែងការព្រួយបារម្ភយ៉ាងខ្លាំង អំពីផលប៉ះពាល់ដល់ស្ថិរភាពការងារ និងផលប្រយោជន៍របស់កម្មករ ទើបយើងខ្ញុំស្នើសុំដោយទទូចដល់ លោកនាយក សង់ត្រាល់ ដើម្បីធ្វើការកែសម្រួលរបាយការណ៍របស់ខ្លួនឡើងវិញ ដោយបង្ហាញនូវសមិទ្ឋិផលវិជ្ជាមានជាច្រើន ដែលជាវឌ្ឍនភាពលក្ខខណ្ឌការងាររួមរបស់កម្មករនិយោជិត និងសហជីពនៅកម្ពុជា។»
លោកបានប្រកាសថា បើសង់ត្រាល់មិនកែសម្រួលរបាយការនេះវិញទេ ក្រុមសហជីពនិឹងប្រមូលផ្តុំកម្មករ និយោជិត ដើម្បីធ្វើការតវ៉ាទ្រង់ទ្រាយធំនៅមុខ ការិយាល័យ សង់ត្រាល់ និងក្រសួងមហាផ្ទៃ ដើម្បីស្នើសុំឱ្យបិទការិយាល័យរបស់សង់ត្រាល់តែម្ដង៕