ក្រុមការងាររួមជាមួយអាជ្ញាធរនិងប្រជាពលរដ្ឋ ចូលរួមដាំកូនឈើដើម្បីបណ្តុះផ្នត់គំនិត«ពន្លកបៃតង» នៅឧទ្យានទន្លេស្ងួត

ភ្នំពេញ៖ កូនឈើចំនួន១០០ដើម ក្នុងនោះដើមចារ ចំនួន ៥០ដើម និងដើមរាំង ចំនួន ៥០ដើម ត្រូវបានក្រុមការងាររាជរដ្ឋាភិបាលចុះមូលដ្ឋានស្រុកអូររាំងឪ សហការជាមួយរដ្ឋបាលស្រុក អាជ្ញាធរឃុំព្រះធាតុ និងប្រជាពលរដ្ឋ ដាំក្នុក្នុងតំបន់ឧទ្យានទន្លេស្ងួត ក្នុងភូមិថ្នល់កែង ឃុំព្រះធាតុ ស្រុកអូររាំងឪ ខេត្តត្បូងឃ្មុំ នៅព្រឹកថ្ងៃអាទិត្យ ទី១៦ ខែមិថុនា ឆ្នាំ២០២៤។

ពិធីដាំដើមឈើ នៅសួនឧទ្យានទន្លេស្ងួត រៀបចំឡើងដើម្បីអបអរសាទរទិវាបរិស្ថានជាតិ និងបរិស្ថានពិភពលោក ៥មិថុនា ក្រោមអធិបតីភាព ឯកឧត្តម ខ្វៃ អាទិត្យា អនុប្រធានក្រុមការងារក្រុមការងាររាជរដ្ឋាភិបាលចុះមូលដ្ឋានស្រុក ដោយមានការចូលរួមពី ឯកឧត្តម ឈរ រតនៈ អនុរដ្ឋលេខាធិការក្រសួងបរិស្ថាន កញ្ញា អឿន បញ្ចនាថ ប្រធានក្រុមការងារចុះមូលដ្ឋានឃុំព្រះធាតុ ថ្នាក់ដឹកនាំ និងមន្រ្តីក្រសួងបរិស្ថាន ប្រធាន អនុប្រធាន សមាជិក សមាជិកា ក្រុមការងារចុះមូលដ្ឋានឃុំព្រះធាតុ លោកអភិបាលរងនៃគណៈអភិបាលស្រុកអូររាំងឪ លោកមេឃុំ ក្រុមប្រឹក្សាឃុំ មេភូមិ កងកម្លាំងទាំង៣ប្រភេទ យុវជន លោកគ្រូអ្នកគ្រូ សិស្សានុសិស្ស និង ប្រជាពលរដ្ឋ សរុបចំនួន ២០០នាក់ក្នុងតំបន់ឧទ្យានទន្លេស្ងួត។

សូមបញ្ជាក់ថា ក្រោមគំនិតផ្តួចផ្តើម និងដឹកនាំរបស់ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ បានប្រែក្លាយតំបន់ទន្លេស្ងួត ទៅជាសួនឧទ្យានទន្លេស្ងួត រមណីយដ្ឋានធម្មជាតិគំរូមួយនៅកម្ពុជា ដោយមាន មានដាំដើមឈើ និងប្រើប្រាស់ពន្លឺអគ្គិសនីដើរដោយថាមពលពន្លឺព្រះអាទិត្យ សួនផ្កាស្បៃរឿង កន្លែងជិះទោងកម្សាន្ត កន្លែងលែងកីឡាសម្រាប់កុមារ និងប្រជាពលរដ្ឋ នាំគ្រួសារ កូនចៅមកលម្ហែអារម្មណ៍ ក្រោយនឿយហត់ពីការងារ និងជប់ឲ្យ ទៅជាតំបន់រមណីយដ្ឋានមួយទំនើប និងទាក់ទាញទេសចរ នាំចំណូលបង្កើនជីវភាពសម្រាប់អ្នកភូមិ និងពលរដ្ឋនៅមូលដ្ឋាន។ ទន្លេស្ងួតនឹងលែងមានការស្ងួតហួតហែងនារដូវប្រាំងទៀតហើយ ឆាប់ៗខាងមុខនេះ ទន្លេស្ងួតនឹងមានទឹកពេញប្រៀប ដែលសម្បូរទៅដោយត្រី សម្រាប់ប្រជាពលរដ្ឋក្នុងតំបន់នេះផង និងភ្ញៀវទេសចរមកកម្សាន្តស្ទូចត្រីផង៕