ប្រធានាធិបតី ពូទីន ទាមទារឱ្យអ៊ុយក្រែនចុះចាញ់រុស្ស៊ី ប្រសិនបើពួកគេចង់បើកកិច្ចចរចាសន្តិភាព
មូស្គូ៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន នៅថ្ងៃសុក្រទី ១៤ ខែមិថុនា បានទាមទារឱ្យអ៊ុយក្រែនចុះចាញ់រុស្ស៊ី ប្រសិនបើពួកគេចង់បើកកិច្ចចរចាសន្តិភាព។ ការអត្ថាធិប្បាយនេះបានទាញកំហឹង និងការស្តីបន្ទោសពីរដ្ឋធានីកៀវ និងលោកខាងលិច។
នៅក្នុងសុន្ទរកថាមួយនៅរដ្ឋធានីមូស្គូនៅមុនកិច្ចប្រជុំកំពូលសន្តិភាពអ៊ុយក្រែនដ៏សំខាន់នៅប្រទេសស្វីស លោក ពូទីន បាននិយាយថា រុស្ស៊ីនឹងបញ្ឈប់ការវាយលុករបស់ខ្លួនលុះត្រាតែអ៊ុយក្រែនដកទ័ពទាំងស្រុងពីភាគខាងកើត និងខាងត្បូង ហើយទម្លាក់ចោលបំណងសម្រាប់សមាជិកភាពអង្គការណាតូ។ លោក ពូទីន បាននិយាយនៅក្នុងសុន្ទរកថាតាមទូរទស្សន៍ទៅកាន់អ្នកការទូតរុស្ស៊ីនៅរដ្ឋធានីមូស្គូថា ទាហានអ៊ុយក្រែនត្រូវតែដកចេញទាំងស្រុងពីសាធារណរដ្ឋប្រជាមានិត Donetsk សាធារណរដ្ឋប្រជាមានិត Lugansk តំបន់ Kherson និង Zaporizhzhia ។ រុស្ស៊ីបានអះអាងបញ្ចូលតំបន់ទាំងបួនជាផ្នែកមួយនៃទឹកដីរបស់ខ្លួនក្នុងឆ្នាំ ២០២២ បើទោះជាមិនបានគ្រប់គ្រងទាំងស្រុងលើតំបន់ទាំងនោះក៏ដោយ។
បុរសខ្លាំងរុស្ស៊ីដដែលបានសង្កត់ធ្ងន់ថា៖«នៅពេលដែលរដ្ឋធានីកៀវត្រៀមខ្លួនជាស្រេចដើម្បីធ្វើកិច្ចការនេះ ហើយចាប់ផ្តើមដកទ័ពចេញ ហើយបោះបង់ចោលជាផ្លូវការនូវផែនការចូលរួមជាមួយអង្គការណាតូ នោះយើងនឹងឈប់បាញ់គ្នាភ្លាមៗ ហើយចាប់ផ្តើមកិច្ចចរចា»។
ការអត្ថាធិប្បាយរបស់លោកពូទីនបានធ្វើឡើងមួយថ្ងៃមុនពេលប្រមុខរដ្ឋ និងមន្ត្រីជាន់ខ្ពស់មកពីប្រទេស និងអង្គការចំនួន ៩០ គ្រោងនឹងប្រមូលផ្តុំនៅប្រទេសស្វីសសម្រាប់កិច្ចប្រជុំកំពូលស្តីពីសន្តិភាពនៅអ៊ុយក្រែន។ រដ្ឋធានីនឹងប្រើប្រាស់វេទិកានេះ ដើម្បីគូសបញ្ជាក់របៀបវារៈសន្តិភាពរបស់ខ្លួន និងប្រមូលផ្តុំការគាំទ្រអន្តរជាតិ។ រុស្ស៊ីមិនត្រូវបានអញ្ជើញទេ ហើយលោកពូទីនកាលពីថ្ងៃសុក្របានច្រានចោលគំនិតផ្តួចផ្តើមនេះថាជាល្បិច៕
