ឥណ្ឌូណេស៊ី ស្នេីឲ្យទីភ្នាក់ងាររដ្ឋ ពិចារណាវិនិយោគជាមួយអ្នកផលិតអង្ករកម្ពុជា ដើម្បីនាំចូលដោយផ្ទាល់
ហ្សាការតា៖ ប្រធានាធិបតីឥណ្ឌូណេស៊ីជិតផុតអាណត្តិ លោក ចូកូវី ដូដូ បានស្នើទៅភ្នាក់ងារភស្តុភាកម្មរបស់រដ្ឋឱ្យពិចារណា លើកិច្ចសហការវិនិយោគជាមួយក្រុមហ៊ុនអ្នកផលិតអង្ករនៅកម្ពុជាតែម្ដង ដើម្បីសម្រួលដល់ការនាំចូលអង្ករពីកម្ពុជា មកកាន់ប្រទេសរបស់ខ្លួន។
ប្រធានាធិបតីរូបនេះទទូចថា ឥណ្ឌូណេស៊ីគួរតែវិនិយោគលើក្រុមហ៊ុនផលិតអង្ករណាមួយក្នុងប្រទេសកម្ពុជាតែម្ដង ដើម្បីសម្រួលដល់ការនាំចូល ជាជាងការបន្តនាំចូលពីប្រទេសក្បែរខាងច្រើនប្រទេសផ្សេងគ្នា។ ទិន្នន័យពីនាយកដ្ឋានកសិកម្មបង្ហាញថា ឥណ្ឌូណេស៊ីជាប្រទេសផលិតស្រូវអង្ករធំជាងគេលំដាប់ទី៤ ពិភពលោក បើគិតតាមទំហំនៃការផលិតបានជាមធ្យមក្នុងមួយឆ្នាំៗ ក្នុងរយៈពេល៥ឆ្នាំចុងក្រោយ។ ទោះយ៉ាងណា នៅមួយរយៈចុងក្រោយនេះ ប្រទេសបងធំនៅអាស៊ាន បាននាំចូលអង្ករពីក្រៅប្រទេសកាន់តែច្រើនឡើង ដោយសារតែតម្លៃនៅក្នុងស្រុកកើនខ្ពស់។ ជាពិសេសនៅអំឡុងពេលដែលអាកាសធាតុក្ដៅខ្លាំងជាមួយនឹងបាតុភូត El Nino ដែលធ្វើឱ្យរដូវប្រាំងនៅក្នុងប្រទេសអាស៊ីអាគ្នេយ៍មួយនេះ មានរយៈពេលយូរជាងមុន។
ប្រការនេះបង្កឱ្យមានផលប៉ះពាល់ជាខ្លាំងដល់ការដាំដុះស្រូវ។ ជាក់ស្តែង ឥណ្ឌូណេស៊ី បានបញ្ជាទិញអង្ករប្រមាណជិត ២លានតោន រួចទៅហើយ នៅប៉ុន្មានខែដំបូងនៃឆ្នាំ២០២៤។ ចំនួននេះស្មើនឹងជាង៥០ភាគរយរួចទៅហើយ នៃគម្រោងនាំចូលអង្ករប្រចាំឆ្នាំ។ កាលពីឆ្នាំ២០២៣ ឥណ្ឌូណេស៊ីនាំចូលអង្ករជាង៣,៣លានតោន។ សូមរំឭកដែរថា ប្រធានព្រឹទ្ធសភាកម្ពុជា សម្តេចតេជោ ហ៊ុន សែន កាលពីដើមខែមិថុនា ក៏បានជំរុញឱ្យប្រទេសឥណ្ឌូណេស៊ី ពិចារណាលើការវិនិយោគដោយផ្ទាល់ ដោយបង្កើតប្រព័ន្ធផលិតកម្មស្រូវ ការស្តុកទុក និងការកិនជាអង្ករ ដែលអាចវេចខ្ចប់សម្រាប់នាំចេញទៅកាន់ប្រទេសឥណ្ឌូណេស៊ីដោយផ្ទាល់តែម្ដង។
សំណើនេះ ត្រូវបានលើកឡើងខណៈដែលសម្តេច ហ៊ុន សែន ទទួលជួបសម្ដែងការគួរសមពីឯកអគ្គរដ្ឋទូតឥណ្ឌូណេស៊ី ប្រចាំនៅកម្ពុជា។ សូមបញ្ជាក់ថា កម្ពុជាបាននាំចេញអង្ករចំនួន២២៥០០តោនទៅប្រទេសឥណ្ឌូណេស៊ី ដែលស្មើនឹងតម្លៃប្រមាណ១៤,៥៤លានដុល្លារ ក្នុងរយៈពេល៥ខែដើមឆ្នាំ២០២៤។
