ពលរដ្ឋរស់នៅភូមិបឹង សង្កាត់ពញាពន់ ខណ្ឌព្រែកព្នៅ មានជំនឿយ៉ាងម៉ុតមាំ និងតែងតែប្រារព្ធពិធីហែរអ្នកតាព្រីងក្អែក ជារៀងរាល់ឆ្នាំ
ភ្នំពេញ៖ ហែរអ្នកតាព្រីងក្អែក ជាពិធីដែលពលរដ្ឋរស់នៅភូមិបឹង សង្កាត់ពញាពន់ ខណ្ឌព្រែកព្នៅ រាជធានីភ្នំពេញ តែងតែប្រារព្ធជារៀងរាល់ឆ្នាំ ដោយមានរយៈពេលមួយថ្ងៃមួយយប់ ពោលគឺចាប់ផ្តើមនៅល្ងាចថ្ងៃ៤កើត ខែជេស្ឋ និងបញ្ចប់នៅថ្ងៃ៥កើត ខែជេស្ឋ ទៅតាមប្រតិទិនចន្ទគតិរបស់ខ្មែរ ដើម្បីបន់ស្រន់សុំទឹកភ្លៀងដើមរដូវវស្សា ពិសេសសុំពរសេចក្តីសុខចម្រើនដល់មនុស្សសត្វទាំងពួង។
តាមពិតទៅពិធីនេះ គឺជាទំនៀមទម្លាប់ប្រពៃណីសាសនាមានតកូនតចៅ តាំងយូរយាមកម្ល៉េះ ពោលគឺមានអាយុជាង១០០ឆ្នាំទៅហើយ ដោយលោកតាផ្ទាល់បានឃើញ និងស្គាល់តាំងតូចមកម៉្លេះ ខណៈពិធីនេះធ្វើឡើងដើម្បីបន់ស្រន់សុំទឹកភ្លៀងនាដើមរដូវវស្សា សុំពរសេចក្តីសុខ បណ្ដេញឧបទ្រពចង្រៃចេញពីភូមិឋាន និងផ្ដល់ភាពចម្រុងចម្រើនទាំងមនុស្ស និងសត្វទាំងនៅក្នុងភូមិឋាននានា នាក្បែរនឹងដីទួលអ្នកតាព្រីងក្អែក។
មិនត្រឹមតែប៉ុណ្ណោះ ពិធីដ៏ចម្លែកមួយនេះ គេសង្កេត់ឃើញថា អ្នកចូលរួមពិធីបុណ្យបែបប្រពៃណីដង្ហែអ្នកតាព្រីងក្អែក បានរៀបចំតុបតែងកាយលាបមុខមាត់យ៉ាងចម្លែក ដូចជាមនុស្សព្រៃ ឬតួអង្គអមនុស្សព្រាយខ្មោច ខ្លះទៀតលាបធ្យូងពេញផ្ទៃមុខដងខ្លួនពាក់ស្លឹកឈើយ៉ាងចម្លែក ដើម្បីប្រារព្ធពិធីបុណ្យបន់ស្រន់ អ្នកតាព្រីងក្អែក ក្នុងគោលបំណងសុំទឹកភ្លៀង និងក្តីសុខចម្រើន តាមទំនៀមអ្នកភូមិនៅតំបន់នោះ។
ក្រុមមនុស្សផាត់មុខមាត់ និងតុបតែងកាយចម្លែកៗបែបជាមនុស្សព្រៃ សត្វ និងតួអង្គអមនុស្សជាព្រាយខ្មោច ឬម្រិញគង្វាល ព្រមទាំងក្រុមមនុស្សមានឈុតជាមេទ័ពកាន់ព្រះខ័នរាជ្យ នាំមុខគេ បានចេញដង្ហែក្បួនតាមផ្លូវចេញពីទីតាំងនៃសាលាបឋមសិក្សាពញាពន់ ក្បែរផ្សារត្រពាំងព្រាយ មកកាន់តំបន់វាលស្រែនៃទឹកដីទួលអ្នកតាព្រីងក្អែក ឬអ្នកតាកាហ៊េ ដោយការចូលទស្សនាពីសំណាក់ពលរដ្ឋក្នុងតំបន់ និងក្រៅតំបន់យ៉ាងច្រើនកុះករ ៕
