ឯកឧត្តមវេជ្ជបណ្ឌិត សុះ មុះសិន ជួបសំណេះសំណាល ជាមួយនិស្សិតជាប់អាហារូបករណ៍សិក្សាផ្នែកវិទ្យាសាស្ត្រសុខាភិបាល ចំនួន២៤រូប នៅតាមសាកលវិទ្យាល័យនានា

ភ្នំពេញ៖ ឯកឧត្តមវេជ្ជបណ្ឌិត សុះ មុះសិន សមាជិករដ្ឋសភា សមាជិកគណៈកម្មាធិការកណ្តាលគណបក្សប្រជាជនកម្ពុជា និងអនុប្រធានគណៈចលនាសាសនិកឥស្លាមកម្ពុជា បានអញ្ជើញជួបសំណេះសំណាល ជាមួយនិស្សិតជាប់អាហារូបករណ៍ ផ្នែកវិទ្យាសាស្រ្តសុខាភិបាល ចំនួន ២៤រូប ដែលកំពុងសិក្សានៅតាមសាកលវិទ្យាល័យមួយចំនួនក្នុងព្រះរាជាណាចក្រកម្ពុជា។

ពិធីនេះមានការចូលរួមពីសំណាក់ឯកឧត្តមវេជ្ជបណ្ឌិត សាន់ សាប់អី រដ្ឋលេខាធិការក្រសួងសុខាភិបាល និងសហការីសមាគមគ្រូពេទ្យអ៊ីស្លាមកម្ពុជាជាច្រើនរូប នារសៀលថ្ងៃទី៨ ខែមិថុនា ឆ្នាំ២០២៤។

ក្នុងមតិសំណេះសំណាល ឯកឧត្តមវេជ្ជបណ្ឌិត សុះ មុះសិន បានគូសបញ្ជាក់ និងជម្រាបជូនដល់ក្មួយៗជានិស្សិតជ័យលាភីអាហារូបករណ៍ទាំងអស់ថា ក្រោមម្លប់សន្តិភាព ពលរដ្ឋខ្មែរគ្រប់រូបមានឱកាសសិក្សាពេញមួយជីវិតប្រកបដោយគុណភាព សមធម៌ និងបរិយាបន្ន។ រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ប្រកបដោយចក្ខុវិស័យច្បាស់លាស់ ជាកម្លាំងយុវជនបន្តវេនមានថាមពល សក្តានុពលខ្លាំងក្លា បាននិងកំពុងដឹកនាំប្រទេស ដោយបន្តថែរក្សានូវសមិទ្ធផល សម្រេចបានរបស់រាជរដ្ឋាភិបាល នីតិកាលកន្លងមក និងបន្តអភិវឌ្ឍប្រទេស តាមរយៈការដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និងចីរភាព និងអាទិភាពគន្លឹះ ចំនួន ៥ គឺ៖ មនុស្ស ផ្លូវ ទឹក ភ្លើង និងបច្ចេកវិទ្យា។ ក្នុងនោះ រាជរដ្ឋាភិបាលយកចិត្តទុកដាក់លើការបណ្តុះបណ្ដាលធនធានមនុស្សផ្នែកវិទ្យាសាស្រ្តសុខាភិបាលឱ្យមានជំនាញច្បាស់លាស់ ដើម្បីលើកកម្ពស់សុខភាព និងសុខុមាលភាពប្រជាជនប្រកបដោយគុណភាព។

ឯកឧត្តមវេជ្ជបណ្ឌិត បានបន្តថា ក្រោយថ្ងៃរំដោះ ៧ មករា ១៩៧៩ សម្រាប់សហគមន៍ឥស្លាមកម្ពុជា មានធនធានមនុស្សផ្នែកវិទ្យាសាស្រ្តសុខាភិបាលតិចតួចណាស់បំផុត ប៉ុន្តែចាប់ពីទសវត្សរ៍ ១៩៩០ មកដល់បច្ចុប្បន្ន ធនធានមនុស្សផ្នែកនេះបានកើនឡើងជាលំដាប់ និងមានមោទនភាពសម្រាប់សង្គម និងសហគមន៍ ដោយសារក្រោយពីបញ្ចប់ការសិក្សាទាំងក្នុងប្រទេស និងក្រៅប្រទេសជាបន្តបន្ទាប់ ធនធានទាំងនោះបាននិងកំពុងប្រើប្រាស់ជំនាញដែលខ្លូនបានសិក្សា ដើម្បីរួមចំណែកក្នុងវិស័យសុខាភិបាល។ កំឡុងពេលផ្ទុះរីករាលនៃជំងឺកូវីដ-១៩ ក្រុមគ្រូពេទ្យដែលជាមុស្លិមបានរួមចំណែកយ៉ាងសកម្មជាប្រវត្តិសាស្ត្រជាមួយក្រុមគ្រូពេទសម្តេចតេជោ ប្រឆាំងកូវីដ-១៩ និងក្រុមគ្រូពេទ្យស្ម័គ្រសម្តេចពិជ័យសេនា ទៀ បាញ់ ដើម្បីសង្គ្រោះអាយុជីវិតប្រជាជនខ្មែរ។

ឯកឧត្តមវេជ្ជបណ្ឌិត ក៏បានផ្ដាំផ្ញើដល់ក្មួយៗជានិស្សិតជ័យលាភីអាហារូបករណ៍ទាំងអស់ត្រូវខិតខំរៀនសូត្រ ចាប់ជំនាញឱ្យបានច្បាស់លាស់ ហើយគោរពតាមគោលការណ៍អាហារូបករណ៍ឱ្យខ្ជាប់ខ្ជួន ព្រមទាំងចាប់យកឱកាសការងារស្ម័គ្រចិត្តក្នុងកិច្ចការលើកកម្ពស់សុខភាពនៅតាមសហគមន៍ ដើម្បីបង្កើនចំណេះដឹងបន្ថែម ការអនុវត្តនិងបទពិសោធន៍ជាក់ស្ដែង ក្រៅពីការសិក្សាទ្រឹស្ដីនៅក្នុងសាលារៀន។

គួរបញ្ជាក់ថា អាហារូបករណ៍នេះ ជាជំនួយរបស់អង្គការអន្តរជាតិហាសាណះ តាមរយៈសមាគមគ្រូពេទ្យអុីស្លាមកម្ពុជា ជូនដល់និស្សិត ចំនួន ២៤រូប សិក្សាផ្នែកវិទ្យាសាស្រ្តសុខាភិបាល លើជំនាញ ដូចជា វេជ្ជបណ្ឌិតទូទៅ ឱសថសាស្ត្រ គិលានុបដ្ឋាក និងមន្ទីរពិសោធន៍ សរុបថវិកាជិត ៤០.០០០ដុល្លាអាមេរិក ក្នុងមួយឆ្នាំ ដោយគិតចាប់ពីឆ្នាំសិក្សា២០២៣-២០២៤ នេះតទៅ ៕