ទិវាបរិស្ថានពិភពលោកឆ្នាំ២០២៤! សិល្បករម្នាក់ប្រមូលសំណាញ់មងចាស់ៗពីទន្លេមកធ្វើជារូបសំណាក «ត្រីរាជ»

ភ្នំពេញ៖ ដើម្បីអបអរសាទរ «ទិវាបរិស្ថានពិភពលោកឆ្នាំ២០២៤» សិល្បករនៅក្នុងសហគមន៍នៃភូមិនេសាទផ្ទះមានជើងសសរខ្ពស់ៗ នៃឃុំកំពង់ឃ្លាំង បឹងទន្លេសាប បានប្រមូលសំណាញ់មងដែលបោះចោលពាសពេញទន្លេ និងតាមច្រាំងទន្លេប្រមាណ ៩៩គីឡូក្រាម មកសាងសងជារូបសំណាក «ត្រីរាជ» ក្នុងន័យលើកកម្ពស់ការយល់ដឹងពីការបោះចោលសំណល់ប្លាស្ទិច ក៏ដូចជាសំណាញ់មងក្នុងសហគមន៍ផ្ទាល់។

Wonders of the Mekong នៅថ្ងៃទី៥ ខែមិថុនា ឆ្នាំ២០២៤នេះ បានបញ្ជាក់ថា រូបសំណាកត្រីរាជ ដែលសិល្បករឈ្មោះ រៀម មុនីស៊ីឡុង ដាក់តាំងក្នុងរោងជាងរបស់លោកផ្ទាល់ ដើម្បីបង្ហាញទៅកាន់សិស្សានុសិស្ស និងប្រជាជនក្នុងភូមិ ដើម្បីប្រារព្ធទិវាបរិស្ថានពិភពលោក ឆ្នាំ២០២៤។

លោក រៀម មុនីស៊ីឡុង បានបញ្ជាក់ថា៖ វាដល់ពេលដែលក្មេងជំនាន់ក្រោយព្រមទាំងអ្នកភូមិក្នុងសហគមន៍កំពង់ឃ្លាំងយើង មានអំនួតដែលបានរស់នៅក្បែរបឹងទន្លេសាប ហើយក៏ជាឱកាសដែលយើងរួមដៃគ្នាការពារប្រភេទត្រីដ៏កម្រនេះ ជាពិសេស គឺមិនចោលសំរាមប្លាស្ទិកចូលក្នុងទន្លេ ជាទីដែលមានសារសំខាន់សម្រាប់ទាំងមនុស្ស និងត្រី។

ទន្ទឹមគ្នានេះ Wonders of the Mekong បានអបអរដល់លោក រៀម មុនីស៊ី ក្នុងគំនិតផ្តួចផ្តើម និងចំណាយពេលធ្វើការងារ ដើម្បីកាត់បន្ថយសំណល់ប្លាស្ទិក ព្រមទាំងលើកកម្ពស់ការយល់ដឹងការទុកដាក់សំណល់ប្លាស្ទិកនេះទៅកាន់សិស្សានុសិស្សនិងសហគមន៍របស់លោក។

សូមជម្រាបជូនថា ត្រីរាជ គឺជាត្រីដែលមានដងខ្លួនធំបំផុតមួយ ហើយក៏ជាត្រីកំពុងរងគ្រោះជិតផុតពូជ ក្នុងប្រទេសកម្ពុជាផងដែរ។ ត្រីយក្សទឹកសាបប្រភេទនេះ អាចធំធាត់រហូតដល់ ៣០០គីឡូក្រាម បើសិនជាមិនមានការរំខានក្នុងដំណើរវដ្តនៃជីវិត ឬជម្រករបស់វា។ វាត្រូវបានហាមឃាត់ការធ្វើនេសាទ ទិញ-លក់ និងដឹកជញ្ជូន តាំងពីសម័យសង្គមរាស្ត្រនិយមមកម្ល៉េះ តាមរយៈក្រមនេសាទលេខ៨០ ន.ស ចុះថ្ងៃទី២៣ ខែមេសា ឆ្នាំ១៩៥៦ និងបច្ចុប្បន្នតាមរយៈអនុក្រឹត្យលេខ១២៣ អនក្រ.បក ចុះថ្ងៃទី១២ ខែសីហា ឆ្នាំ២០០៩ ស្តីពីប្រភេទធនធានជលផលដែលកំពុងរងគ្រោះថ្នាក់នៅកម្ពុជា (ទឹកសាប)។

ត្រីរាជ ក៏ស្ថិតក្នុងបញ្ជីក្រហម ដែលមានចំណាត់ថ្នាក់កំពុងរងការគំរាមកំហែងយ៉ាងខ្លាំងឈានទៅរកការផុតពូជ (Critical Endangered) របស់អង្គការសហភាពអន្តរជាតិ ដើម្បីការអភិរក្សធម្មជាតិ IUCN ហើយត្រីនេះ ត្រូវបានចុះបញ្ជីឧបសម្ព័ន្ធ១របស់អនុសញ្ញាសាយតេស (CITES) ដែលហាមដាច់ខាត ការធ្វើនេសាទ ទិញលក់ និងដឹកជញ្ជូនផ្សេងៗ ៕