លោកជំទាវ ហ៊ុន ចាន់ធី ម៉ៅ ធនិន៖ ស្ត្រីមានតួនាទីសំខាន់ក្នុងការចូលរួមថែរក្សាសុខសន្តិភាព និងអភិវឌ្ឍប្រទេសជាតិឲ្យកាន់តែរីកចម្រើន

ភ្នំពេញ៖ លោកជំទាវ ហ៊ុន ចាន់ធី ម៉ៅ ធនិន ប្រធានកិត្តិយសសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តកំពត បានលើកឡើងថា ស្ត្រីជាច្រើនបានចូលរួមចំណែកតស៊ូរំដោះជាតិមាតុភូមិពីរបបប្រល័យពូជសាសន៍ប៉ុលពត និងបានចូលរួមក្នុងដំណើរស្វែងរកសុខសន្តិភាពជាមួយសម្តេចតេជោ ហ៊ុនសែនផងដែរ។ហើយបច្ចុប្បន្ន ស្ត្រីក៏នៅតែមានតួនាទីសំខាន់ ក្នុងចូលរួមថែរក្សាសុខសន្តិភាព និងអភិវឌ្ឍន៍ប្រទេសជាតិឲ្យកាន់រីកចម្រើន។

ថ្លែងក្នុងពិធីជួបសំណេះសំណាល និងសួរសុខទុក្ខ ជាមួយអតីតសមាជិកាអនុសាខាសមាគមនារីក្រុង-ស្រុក ទាំង៩ ចំនួន៨៩រូប នាថ្ងៃទី៤ ខែមិថុនា ឆ្នាំ២០២៤ លោកជំទាវ ហ៊ុន ចាន់ធី ម៉ៅ ធនិន បានលើកឡើងថា “បងប្អូនស្ត្រីបានតស៊ូ លះបង់កម្លាំងកាយ ចិត្ត ប្រថុយជីវិតដើម្បីរំដោះជាតិ ចេញពីរបបប្រល័យពូជសាសន៍ប៉ុល ពត  និងបានចូលរួមផងដែរក្នុងដំណើរស្វែងរកសុខសន្តិភាព ជាមួយសម្តេចតេជោ ហ៊ុន សែន មកជូនប្រទេសជាតិ និងប្រជាជន។ ហេតុដូច្នេះហើយ ទើបរាជរដ្ឋាភិបាលតែងតែលើកទឹកចិត្តដល់ស្ត្រី ឲ្យចូលរួមក្នុងសកម្មភាពដឹកនាំក្រសួង ស្ថាប័ន អាជ្ញាធរគ្រប់លំដាប់ថ្នាក់ផងដែរ  ហើយគ្រប់កាលៈទេសៈ ស្ត្រីនៅតែមានតួនាទីសំខាន់ជានិច្ច។ ជាក់ស្តែងនៅក្នុងរង្វង់គ្រួសារដ៏តូចមួយ បើសិនគ្មានការជ្រោមជ្រែង និងការចូលរួមពីស្ត្រីទេ គ្រួសារនោះនឹងមិនអាចមានភាពកក់ក្តៅ ឬរីកចម្រើនបានដូចគេឡើយ”។

លោកជំទាវបានស្នើដល់ស្ត្រីទាំងអស់ត្រូវ ខិតខំប្រឹងប្រែង អភិវឌ្ឍសមត្ថភាព បន្តចូលរួមជាមួយរាជរដ្ឋាភិបាលដើម្បីសម្រេចបាននូវចក្ខុវិស័យឆ្នាំ២០៣០ កម្ពុជាជាប្រទេសមានប្រាក់ចំណូលមធ្យមកម្រិតខ្ពស់ និងឆ្នាំ២០៥០ ជាប្រទេសមានចំណូលខ្ពស់ ពិសេសស្ត្រីត្រូវប្តេជ្ញាចូលរួមគាំទ្រគម្រោងព្រែកជីកហ្វូណនតេជោ ដែលរាជរដ្ឋាភិបាលប្រកាសបើកការដ្ឋានសាងសង់ជាផ្លូវការ នៅខែសីហា ឆ្នាំ២០២៤ ខាងមុខនេះ ឲ្យបានកាន់តែផុសផុល និងចូលរួមគ្រប់សកម្មភាពដើម្បីធ្វើយ៉ាងណាឲ្យព្រែកជីកនេះលេចចេញជារូបរាងឆាប់រហ័ស។

ក្នុងឱកាសនោះ លោកជំទាវប្រធានកិត្តិយសសាខាសមាគមក៏បាននាំយកការផ្តាំផ្ញើសាកសួរសុខទុក្ខពីសំណាក់ ឯកឧត្តម បណ្ឌិត ម៉ៅ ធនិន អភិបាលខេត្ត ដែលជានិច្ចជាកាលលោកតែងតែគិតគូរយកចិត្តទុកដាក់ខ្ពស់ក្នុងការដោះស្រាយបញ្ហាប្រឈមនានា ជូនបងប្អូនប្រជាពលរដ្ឋពិសេសបញ្ហាប្រឈមនានាពាក់ព័ន្ធនឹងស្ត្រីផងដែរ។

ក្នុងពិធីនោះដែរ លោកជំទាវប្រធានកិត្តិយសសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តកំពត បានផ្តល់អំណោយជូនអតីតសមាជិកាអនុសាខាសមាគមនារីក្រុង-ស្រុកទាំង ៨៩នាក់ ដោយក្នុងម្នាក់ៗទទួលបាន អង្ករ ២០គីឡូក្រាម ,ទឹកត្រី ១យួរ, ត្រីខ១យួរ,ស្ករស១គីឡូកា្រម,ទឹកដោះគោឆៅ ១ឡូ ប្រេងឆា ១ដប, មី១កេស និងថវិកាចំនួន ៥ ម៉ឺនរៀលផងដែរ៕