អ្នកនាំពាក្យក្រសួងការងារ បង្ហាញយន្តការសំខាន់ៗ ៨ចំណុច ក្នុងកិច្ចគាំពារពលករទេសន្តរប្រវេសន៍កម្ពុជា
ភ្នំពេញ៖ ឯកឧត្ដម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានបង្ហោះលើទំព័រហ្វេសប៊ុកផ្លូវការនៅថ្ងៃទី៤ ខែមិថុនា ឆ្នាំ២០២៤នេះដោយបានបង្ហាញយន្តការ ៨ចំនុចក្នុងកិច្ចគាំពារពលករទេសន្តរប្រវេសន៍កម្ពុជា។
យន្តការទាំង៨ចំណុចនោះរួមមាន៖
ទី១. រាជរដ្ឋាភិបាលបាន និងកំពុងបន្តចុះអនុស្សារណៈយោគយល់គ្នាជាមួយប្រទេសទទួលពលករដើម្បីធានាការទទួលខុសត្រូវ និងកិច្ចការពារសិទ្ធិពលករធ្វើការនៅក្រៅប្រទេស។
ទី២. កិច្ចការមុនពេលចេញដំណើររបស់ពលករគឺ ការភ្ជាប់ប្រព័ន្ធទិន្នន័យតាមអនឡាញ(Online) ដោយដាក់ឱ្យដំណើរការលិខិតបញ្ជាក់តម្រូវការកម្លាំងពលកម្ម និងបញ្ជីឈ្មោះពលករ ក្នុងគោលបំណងកាត់បន្ថយរយៈពេលដំណើរការការងារឱ្យកាន់តែខ្លី។ ទន្ទឹមនេះ ធ្វើការបណ្តុះបណ្តាលពលករអំពីបែបបទរស់នៅ វប្បធ៌ម ប្រពៃណី សិទ្ធិ និងច្បាប់នៃប្រទេសទទួលពលករ។
ទី៣ .ជំរុញឱ្យមានចល័តភាពនៃរបបសន្តិសុខសង្គមសម្រាប់ពលករធ្វើការនៅក្រៅប្រទេស និងពេលត្រឡប់មកវិញ ដើម្បីពលកររក្សាបានរបបសន្តិសុខសង្គម។
ទី៤ .បន្តណែនាំទីភ្នាក់ងារជ្រើសរើសពលករឯកជនឱ្យបំពេញបែបបទសហគ្រាស និងមានការទទួលខុសត្រូវចំពោះពលករ។ ចាត់វិធានការច្បាប់យ៉ាងម៉ឺងម៉ាត់ចំពោះក្រុមហ៊ុនជ្រើសរើសពលករដែលបំពានច្បាប់ និងរំលោភសិទ្ធិពលករ។
ទី៥.ផ្តល់កិច្ចការពារ និងជំនួយផ្នែកច្បាប់ដល់ពលករតាមរយៈស្ថានឯកអគ្គរាជទូត ស្ថានកុងស៊ុល និងអនុព័ន្ធការងារកម្ពុជាក្នុងករណីមានបញ្ហាកើតឡើងចំពោះពលករ។ ពលករអាចទំនាក់ទំនងតាមរយៈ លេខទាក់ទងបន្ទាន់ (Hotline) ១២៩៧ ឬ ១២៨៦, ក្រុមតេលេក្រាម«សម្រាប់ពលករទេសន្តរប្រវេសន៍, នាយកដ្ឋានមុខរបរ និងហត្ថពលកម្ម ឬទូរស័ព្ទលេខ ០១១ ៨៩៨ ៩១២ ឬ ០៩៧ ៩២០ ២០២៣ ឬ ០៨៧ ២១៥ ២១៥ ឬ ០៨៩ ៩៥៧ ៧៨៩, មន្ទីរការងារ និងបណ្តុះបណ្តាលវិជ្ជាជីវៈរាជធានី ខេត្ត។
ទី៦.សហការជាមួយភាគីពាក់ព័ន្ធក្នុងការផ្លាស់ប្តូរព័ត៌មាន និងគាំទ្រដល់ពលករ។
ទី៧.បន្តផ្តល់ការអប់រំណែនាំពលករអំពីអត្ថប្រយោជន៍ និងការចេញទៅធ្វើការនៅក្រៅប្រទេសស្របច្បាប់ ចៀសវាងការទៅធ្វើការក្រៅប្រទេសដោយខុសច្បាប់។
និងទី៨.ផ្តល់ការបណ្តុះបណ្តាលជំនាញ និងស្វែងរកការងារជូនពលករពេលត្រឡប់មកមាតុប្រទេសវិញ។
តាមការបញ្ជាក់បន្ថែមរបស់ឯកឧត្ដម កក្តា អ៊ន ការដាក់ចេញនូវវិធានការទាំងនេះគឺដើម្បីលើកកម្ពស់សិទ្ធិ និងកិច្ចគាំពារពលករខ្មែរដែលធ្វើការនៅក្រៅប្រទេស។ បច្ចុប្បន្នកម្ពុជា មានពលករជាង ១,៣ លាននាក់ ធ្វើការនៅតាមប្រទេសដូចជា ថៃ ជប៉ុន កូរ៉េខាងត្បូង ម៉ាឡេស៊ី សិង្ហបុរី តំបន់រដ្ឋបាលពិសេសហុងកុង និងប្រទេសអារ៉ាប៊ីសាអូឌីត។ ពលករទេសន្តរប្រវេសន៍ បានផ្ញើរថវិកាមកក្រុមគ្រួសារប្រមាណជិត៣ពាន់លានដុល្លារអាមេរិករៀងរាល់ឆ្នាំ ដែលថវិកាទាំងនេះបានជួយលើកកម្ពស់ជីវភាពគ្រួសារ និងសេដ្ឋកិច្ចជាតិកាន់តែរីកចម្រើនបន្ថែមទៀត៕
