ស៊ុតបក្សីគ្មានច្បាប់អនុញ្ញាតរាប់សែនគ្រាប់ក្នុង១ថ្ងៃៗ ឆ្លងដែនខុសច្បាប់ពីវៀតណាមចូលមកកម្ពុជា ខណៈមន្ត្រីចាប់បានមួយៗគឺមកពីក្រុមឈ្មួញលួចដឹកឆ្លងដែនមិនបង់លុយឱ្យសមត្ថកិច្ចច្រក

ភ្នំពេញ៖ មានសេចក្តីរាយការណ៍ពីប្រជាពលរដ្ឋនៅមូលដ្ឋានច្រកព្រំដែនកម្ពុជាវៀតណាមក្នុងស្រុកគិរីវង់ បង្ហើបប្រាប់ថា ក្រុមឈ្មួញជួញពងសត្វបក្សី(មាន់-ទា) បានដឹកជញ្ជូនស៊ុតសត្វបក្សីឆ្លងព្រំដែនដូចហែរកឋិនក្នុងមួយថ្ងៃៗ ចែកចាយក្នុងប្រទេសកម្ពុជា ខណៈមានដំណឹងល្ហៀងៗថា ករណីមន្ត្រីចាប់បានមួយៗគឺមកពីក្រុមឈ្មួញខិលខូចទាំងនោះ លួចដឹកឆ្លងដែនមិនបង់លុយឱ្យ សមត្ថកិច្ចច្រក ទើបមានការបោះដៃឱ្យអ្នកនៅខាងក្នុងស្កាត់ស្ទាក់ចាប់។

លោក ហ៊ុន សារ៉ាត់ អនុប្រធាននាយកដ្ឋានសុខភាពសត្វ បានគូសបញ្ជាក់ឱ្យដឹងថា ក្រុមការងារ អន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ កាលពីវេលាម៉ោង១២:៣០នាទីថ្ងៃទី៣មិថុនា ឆ្នាំ២០២៤ បានចុះស្ទាក់ចាប់រថយន្ត១គ្រឿង ម៉ាក Ssang Yong ជាប្រភេទរថយន្តដឹកអ្នកដំណើរចំណុះ១៥កៅអី ស្លាកលេខភ្នំពេញ ២AH-៧៩៥៤ ពណ៌សម្បកឪឡឹកដឹកស៊ុតសត្វមាន់ចំនួន៣៦០០០គ្រាប់ ឃាត់បាននៅជិតវត្តស្លែង លើផ្លូវជាតិលេខ៣ សង្កាត់ពងទឹក ខណ្ឌដង្កោ រាជធានីភ្នំពេញ។

ក្រោយធ្វើការសាកសួរទើបដឹងថា រថយន្តខាងលើបានដឹកស៊ុតមាន់អត់ច្បាប់អនុញ្ញាតមកពីប្រទេសវៀតណាម តាមច្រករបៀងស្រុកគិរីវង់ ខេត្តតាកែវ ឆ្ពោះទៅចែកចាយនៅរាជធានីភ្នំពេញ។

ជាមួយគ្នា ក្រុមការងារបាននាំយកវត្ថុតាងទៅរក្សាទុកនៅអគ្គនាយកដ្ឋានសុខភាពសត្វ និងផលិតកម្មសត្វ ដើម្បីអនុវត្តតាមនីតិវិធីច្បាប់។ យ៉ាងណា មហាជនជាច្រើនបានលើកទ្បើងក្នុងន័យចម្អកឱ្យមន្ត្រីច្រកព្រំដែនថា នេះសំណាងហើយដែលអាជ្ញាធររាជធានីប្រឹងប្រែងតាមឃាត់ចាប់បាន ចុះបើចាប់មិនបាន..? ហើយក្រុមឈ្មួញដឹកចែកចាយពេញផ្ទៃប្រទេស ឯប្រជាពលរដ្ឋនាំគ្នាទិញយកទៅបរិភោគដោយមិនដឹងប្រវត្តិច្បាស់លាស់ តើអាចបង្កផលប៉ះពាល់ដល់សុខភាពប៉ុណ្ណា? ប៉ុន្តែប្រជាពលរដ្ឋមួយចំនួនលើកឡើងថា អ្នកដែលឈឺ ឬស្លាប់ មិនមែនជាបងប្អូនមន្ត្រីច្រកព្រំដែនទេ ដូច្នេះពួកគេកុំមិនខ្វល់ពីសុខទុក្ខរបស់បងប្អូនជនរួមឈាមខ្លួនឡើយ ទើបបើកដៃឱ្យក្រុមឈ្មួញទុច្ចរិតដឹកយកមកលក់ចែកចាយយ៉ាងគគ្លើនបែបនេះ។

ចំណែក ប្រជាពលរដ្ឋនៅក្នុងប្រទេសបានស្នើសុំយ៉ាងទទូចដល់អាជ្ញាធរនៅច្រកព្រំដែនកម្ពុជា-វៀតណាម ដែលមានស្មារតីជាតិនិយម សូមឱ្យជួយត្រួតពិនិត្យទំនិញដែលគ្មានច្បាប់ និងខូចគុណភាពដែលបានដឹកចូលមកជាហូរហែមកចែកចាយក្នុងប្រទេសនេះផង ព្រោះជាក់ស្តែង កាលពីថ្ងៃទី១មិថុនា កន្លងទៅថ្មីៗ ក្រុមការងារអន្តរាគមន៍បង្ក្រាបបទល្មើសចលនាសត្វ សហការជាមួយការិយាល័យផលិតកម្ម និងបសុព្យាបាលនៃមន្ទីរកសិកម្មខេត្តតាកែវ ទើបនឹងឃាត់ចាប់រថយន្ត១គ្រឿងនៅភូមិវះពោះ ឃុំខ្វាវ ស្រុកសំរោង ខណៈដែលរថយន្តនោះដឹកស៊ុតសត្វមាន់ចំនួន៣៩០០០គ្រាប់ នាំចូលមកពីប្រទេសវៀតណាមតាមច្រករបៀងស្រុកគិរីវង់ ឆ្ពោះទៅលក់ចែកចាយនៅរាជធានីភ្នំពេញ ដោយគ្មានលិខិតអនុញ្ញាត។ ហើយលេចឭថា ករណីខាងលើនេះ ដោយសារតែឈ្មួញនោះលួចមិនបង់លុយឱ្យមន្ត្រីច្រកព្រំដែន ទើបបានជាពួកគេបោះដៃឱ្យអ្នកនៅខាងក្នុងស្ទាក់ចាប់ តែបើចំពោះអ្នកបង់លុយក្រោមតុ គឺអាចដឹកចែកចាយបានដោយសុវត្ថិភាព៕