ឯកឧត្ដម សក់ សេដ្ឋា៖ ឈរលើមូលដ្ឋាន នៃជោគជ័យក្នុងការបោះឆ្នោតជាតិ លើកទី៧ បានបង្កលក្ខណៈសម្បត្តិដល់បក្សប្រជាជន រៀបចំជួរមន្ត្រីវ័យក្មេង ប្រកបដោយថាមពល សម្រាប់ ជាកម្លាំងបន្តវេនដឹកនាំ រាជរដ្ឋាភិបាល នីតិកាលទី៧ នៃរដ្ឋសភា

ភ្នំពេញ៖​ ឯកឧត្ដម សក់ សេដ្ឋា សមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាប្រធានក្រុមការងារគណបក្សប្រជាជនកម្ពុជា ចុះមូលដ្ឋានស្រុកបវេល បានថ្លែងបញ្ជាក់ថា លើមូលដ្ឋាននៃជោគជ័យរបស់ គណបក្សក្នុងការបោះឆ្នោតជាតិលើកទី៧ បានបង្កលក្ខណៈសម្បត្តិដល់គណបក្សប្រជាជនកម្ពុជា រៀបចំជួរមន្ត្រីវ័យក្មេង ប្រកបដោយថាមពល សម្រាប់ ជាកម្លាំងបន្តវេនដឹកនាំរាជរដ្ឋាភិបាលសម្រាប់ នីតិកាលទី៧ នៃរដ្ឋសភា ដែលក្នុងរយៈពេល៩ខែ កន្លងមកនេះ រាជរដ្ឋាភិបាល នីតិកាលទី៧ បានបន្តដឹកនាំគ្រប់គ្រងអភិវឌ្ឍប្រទេសជាតិប្រកបដោយ ភាពស្វាហាប់ ក្នុងស្មារតីទទួលខុសត្រូវខ្ពស់ចំពោះប្រជាជាតិ និងប្រជាជនកម្ពុជា សម្រេចបាននូវ សមិទ្ធផលនានាជាច្រើន ។

ក្នុងឱកាសអញ្ជើញបើកយុទ្ធនាការឃោសនា បោះឆ្ពោះជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ ក្នុងស្រុកបវេលខេត្តបាត់ដំបង នៅស្នាក់ការគណបក្សស្រុកបវេល នាថ្ងៃទី១៧ ខែឧសភា ឆ្នាំ២០២៤នេះ ឯកឧត្ដម សក់ សេដ្ឋា បានបន្តថា សមិទ្ធផលនានាជាច្រើន ដែលរាជរដ្ឋាភិបាល សម្រេចបានក្នុងរយៈបេល ៩ខែកន្លមកនេះ រួមមានជាអាទិ៍៖

-បន្តថែរក្សាការពារបានយ៉ាងរឹងមាំនូវសុខសន្តិភាព ស្ថិរភាពនយោបាយ និងស្ថិរភាព សង្គមលើគ្រប់វិស័យ។

-ខិតខំថែរក្សាការពារបានយ៉ាងគត់មត់នូវសន្តិសុខ សណ្តាប់ធ្នាប់សាធារណៈ បង្កលក្ខណៈសម្បត្តិដល់ការធ្វើសកម្មភាពគ្រប់វិស័យក្នុងសង្គម រួមទាំងការកំសាន្ត សប្បាយរបស់ប្រជា ជនក្នុងពិធីបុណ្យជាតិនានា ក៏ដូចពិធីនានាតាមប្រពៃណី ទំនៀមទម្លាប់របស់ប្រជាជនតាមមូលដ្ឋាន ទូទាំងប្រទេស។

-រាជរដ្ឋាភិបាល នីតិកាលទី៧ នៃរដ្ឋសភា បានដាក់ចេញ និងកំពុងអនុវត្ត ប្រកបដោយ ផ្លែផ្កានូវយុទ្ធសាស្ត្របញ្ចកោណដំណាក់កាលទី១ និងកម្មវិធីគោល នយោបាយជាអាទិភាព ព្រមទាំង វិធានការជាគន្លឹះនានាដើម្បីអភិវឌ្ឍប្រទេសជាតិឱ្យឈានឆ្ពោះទៅសម្រេចបានចក្ខុវិស័យកម្ពុជាឆ្នាំ២០៣០ ជាប្រទេសដែលមានចំណូលមធ្យមកម្រិតខ្ពស់ និងជាប្រទេសដែលមានប្រាក់ចំណូលខ្ពស់ ក្នុងឆ្នាំ ២០៥០។ រាជរដ្ឋាភិបាលបាននិងកំពុងខិតខំទាក់ទាញការវិនិយោគទាំងក្នុង និងក្រៅប្រទេស ដើម្បីស្តារសេដ្ឋកិច្ចជាតិ និងជីវភាពរស់នៅរបស់ប្រជាពលរដ្ឋ ដែលទទួលរងផលប៉ះពាល់ពី វិបត្តិនៃជំងឺកូវីដ-១៩ និងវិបត្តិនានាជាសកល ធ្វើឱ្យសេដ្ឋកិច្ចជាតិមានកំណើនឡើងវិញ ដែលតាម ការព្យាករណ៍ក្នុងឆ្នាំ២០២៤ នេះ សេដ្ឋកិច្ចកម្ពុជានឹងមានកំណើនក្នុងរង្វង់ ៦,៦%។

-លើមូលដ្ឋាននៃកំណើនសេដ្ឋកិច្ច រាជរដ្ឋាភិបាលក៏បានខិតខំប្រមូល និង គ្រប់គ្រង ចំណូលចូលថវិកាជាតិ ដើម្បីទ្រទ្រង់ការចំណាយសាធារណៈ រួមទាំងការ បង្កើនប្រាក់បៀវត្សជូន កងកម្លាំងប្រដាប់អាវុធ មន្ត្រីរាជការស៊ីវិល ប្រាក់ឧបត្ថម្ភ ប្រចាំខែដល់ក្រុមប្រឹក្សានៃរដ្ឋបាលថ្នាក់ ក្រោមជាតិគ្រប់ថ្នាក់ និងថ្នាក់ដឹកនាំភូមិ ផងដែរ ៕