ឯកឧត្ដម សក់ សេដ្ឋា ថ្លែងអំណរគុណ ថ្នាក់ដឹកនាំ មន្ត្រីក្រុមការងារគ្រប់ជំនាន់ ដែលចូលរួមយ៉ាងធំធេង ក្នុងការកសាងស្រុកបវេល ឱ្យមានការអភិវឌ្ឍគ្រប់វិស័យរហូតដល់សព្វថ្ងៃ
ភ្នំពេញ៖ ឯកឧត្ដម សក់ សេដ្ឋា សមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាប្រធានក្រុមការងារគណបក្សប្រជាជនកម្ពុជា ចុះមូលដ្ឋានស្រុកបវេល បានថ្លែងអំណរគុណ និងដឹងគុណយ៉ាងជ្រាលជ្រៅបំផុតចំពោះ ឯកឧត្តម លោកជំទាវ អស់លោក លោកស្រី ជាថ្នាក់ដឹកនាំ មន្ត្រីក្រុមការងារគ្រប់ជំនាន់ដែលបានចូលរួមយ៉ាងធំធេង មិនអាចកាត់ថ្លៃបានក្នុងការចូលរួមកសាងអភិវឌ្ឍន៍ស្រុកបវេលឱ្យមានការអភិវឌ្ឍគ្រប់វិស័យរហូត មកដល់សព្វថ្ងៃនេះ ។
ថ្លែងក្នុងពិធីប្រកាសសមាសភាពក្រុមការងារ គណបក្សចុះមូលដ្ឋានស្រុកបវេល នៃខេត្តបាត់ដំបងនៅទីស្នាក់ការគណបក្សស្រុកបវេល នាថ្ងៃទី១៦ ខែឧសភា ឆ្នាំ២០២៤នេះ ឯកឧត្ដម សក់ សេដ្ឋា បានមានប្រសាសន៍ថា ដោយពិនិត្យឃើញអំពីតួនាទី និងសារសំខាន់របស់ក្រុមការងារគណបក្សចុះមូលដ្ឋាន គណបក្ស និងរាជរដ្ឋាភិបាលសម្រាប់នីតិកាលទី៧ នៃរដ្ឋសភា បានសម្រេចបន្តចាត់តាំងក្រុម ការងារគណបក្ស និងក្រុមការងាររាជរដ្ឋាភិបាលចុះជួយមូលដ្ឋានជាបន្តទៀត។
ឯកឧត្ដមបន្តថា ដោយសារមានការកែសម្រួលសមាសភាពគណៈរដ្ឋមន្ត្រី ក្នុងនីតិកាលទី៧ នៃរដ្ឋសភា ដែលមានការពាក់ព័ន្ធក្រុមការងារគណបក្ស ទើបសមាសភាពក្រុមការងារគណបក្ស និងក្រុមការងាររាជរដ្ឋាភិបាលចុះមូលដ្ឋានរាជធានី ខេត្ត ភាគច្រើនត្រូវបានធ្វើការកែសម្រួលផ្លាស់ប្តូរ សមាសភាព។ ចំពោះខេត្តបាត់ដំបងរបស់យើង គណបក្សប្រជាជនកម្ពុជាបានសម្រេចចាត់តាំង សម្តេច ក្រឡាហោម ស ខេង បន្តតួនាទីជាប្រធានក្រុមការងារគណបក្សចុះមូលដ្ឋានខេត្តបាត់ដំបងជា បន្តទៀត។
ឯកឧត្ដមលើកឡើងថា ឈរលើមូលដ្ឋាននៃការកែសម្រួលសមាសភាពក្រុមការងារគណបក្សចុះមូលដ្ឋានរាជធានី ខេត្ត ក្រុមការងារគណបក្សចុះមូលដ្ឋានក្រុង ស្រុក ក៏មានការកែសម្រួលផ្លាស់ប្តូរសមាសភាពផងដែរ។ ដោយឡែកចំពោះស្រុកបវេលរបស់យើង ក្រុមការងារគណបក្សចុះមូលដ្ឋានស្រុក និងឃុំ នានាក្នុងស្រុកបវេល មិនមានការរុះរើកែសម្រួលផ្លាស់ប្តូរសមាសភាពធំដុំនោះឡើយ។
ឯកឧត្ដម សក់ សេដ្ឋា គូសបញ្ជាក់ថា ជារួមក្នុងរយៈពេលជាង ២០ឆ្នាំកន្លងមកនេះ មន្ត្រីគណបក្សមកពីអង្គភាពស្នូលចំនួន ៥ ត្រូវបានចាត់តាំងឱ្យចុះមូលដ្ឋានស្រុកបវេល រួមមាន ថ្នាក់ដឹកនាំ និងមន្ត្រីគណបក្សនៃ លេខាធិការដ្ឋាន គ.ជ.អ.ប អគ្គនាយកដ្ឋានរដ្ឋបាល សាលាជាតិរដ្ឋបាលមូលដ្ឋានដែលបានបំបែក ចេញពីអគ្គនាយកដ្ឋានរដ្ឋបាល នៃក្រសួងមហាផ្ទៃ មន្ទីរសាធារណការនិងដឹកជញ្ជូនខេត្តបាត់ដំបង និងសាខាគយនិងរដ្ឋាករខេត្តបាត់ដំបង។
ឆ្លៀតយកឱកាសដ៏វិសេសវិសាលថ្លៃថ្លានេះ ក្នុងនាមក្រុមការងារគណបក្សចុះមូលដ្ឋាន ស្រុកបវេល ក្នុងនាមគណបក្សស្រុក ឃុំ និងក្នុងនាមប្រជាពលរដ្ឋនៃស្រុកបវេលទាំងមូល ឯកឧត្ដម សក់ សេដ្ឋា បានគោរពថ្លែងអំណរគុណ និងដឹងគុណយ៉ាងជ្រាលជ្រៅបំផុតចំពោះ ឯកឧត្តម លោកជំទាវ អស់លោក លោកស្រី ជាថ្នាក់ដឹកនាំ មន្ត្រីក្រុមការងារគ្រប់ជំនាន់ដែលបានចូលរួមយ៉ាងធំធេង មិនអាចកាត់ថ្លៃបានក្នុងការចូលរួមកសាងអភិវឌ្ឍន៍ស្រុកបវេលឱ្យមានការអភិវឌ្ឍគ្រប់វិស័យរហូត មកដល់សព្វថ្ងៃនេះ ៕
